Notice

  "From the Karen National Political Dialogue to ward the Political Will of the Karen National"  

  "From the Karen National Political Dialogue to establish a Federal Democratic Union"  

  • English
  • Karen
  • Myanmar

News

News

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ၂၀၂၁ နံၣ် အကတီၢ်ပူၤ တၢ်ဒုးကစီၣ် ပၥ်ဖှိၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ၂၀၂၁ နံၣ် အကတီၢ်ပူၤ တၢ်ဒုးကစီၣ် ပၥ်ဖှိၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ၂၀၂၁ နံၣ် ဒီတနံၣ်အကတီၢ်ပူၤ သုးမီၤစိရိၤအသုး, သုးခိးကီၢ်ဆၢအသုး သ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဆှၢအါထီၣ် အသုးဂံၢ်ဘါ, ဟံးန့ၢ်ဝဲ ဟီၣ်ကဝီၤတၢ်ဒိၣ်စိ, တကးဒံးဘၣ် မၤပျံၤမၤဖုးကမျၢၢ်, မၤဘၣ်ဒိဝဲ ဟီၣ်ခိၣ်ဖိခွဲးယၥ်, ဟံးန့ၢ်ဆူၣ်ကမျၢၢ်အတၢ်ဖိတၢ်လံၤ တၢ်စုလီၣ်ခီၣ်ခိၣ်, ဟံးအီၣ်ဆူၣ်ကမျၢၢ်အဆၣ်ဖိကီၢ်ဖိ အိၣ်ဝဲတပယူၥ်ဃီန့ၣ်လီၤ. ခီဖျိလၢ သုးမီၤစိရိၤအသုးတဖၣ် အတၢ်ဟူးတၢ်ဂဲၤဒ်အံၤ အဖီခိၣ် လၢတၢ်ဒီသဒၢလီၤက့ၤဟီၣ်ကဝီၤအဂီၢ်မ့ၢ်ဂ့ၤ, တၢ်ဒီသဒၢက့ၤ ကမျၢၢ်ဖိအသးသမူ တၢ်ဘံၣ်တၢ်ဘၢအဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) ဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး အိၣ်ထီၣ်ဝဲ ကိးနံၤဒဲးန့ၣ်လီၤ.
ဒူသထူၣ်ကီၢ်ရ့ၣ် သုးက့ (၁) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၂၄၉) ဘျီ, တီအူကီၢ်ရ့ၣ် သုးက့ (၂) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၅၀) ဘျီ, ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၁၀၀) ဘျီ, ဘျံးဒဝဲၢ်ကီၢ်ရ့ၣ် သုးက့ (၄) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၉) ဘျီ, မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၂၆၉၂) ဘျီ, ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၅၂) ဘျီန့ၣ်လီၤ. ဒီတနံၣ်အကတီၢ်ပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၃၁၅၂) ဘျီ ဒီး သုးမီၤစိရိၤအသုး သံဝဲ (၂၁၉၀) ဂၤ ဒီး ဘၣ်ဒိဝဲ (၂၀၄၈) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) သိၣ်ဒူသ့ၣ်တဖၣ် လုၢ်ထီၣ်အသးသမူလၢ ထံကီၢ်ဒီးပှၤကလုၥ်အဂီၢ် အိၣ်ဝဲ (၄၂) ဂၤ ဒီး ဘၣ်ဒိဝဲခဲလၢၥ် (၁၃၀) ဂၤန့ၣ်လီၤ.
ဒီတနံၣ်အကတီၢ်ပူၤ သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် ခးလီၤဝဲကျိဖးဒိၣ်လၢ ကမျၢၢ်ဖိအဒူသဝီပူၤ ကမျၢၢ်ဖိအတၢ်ဖံးအီၣ်မၤအီၣ် အလီၢ်အကျဲ ခဲလၢၥ်အိၣ်ဝဲ အထံၣ် (၁၅၀၀) ဘျဲၣ်န့ၣ်လီၤ. ကမျၢၢ်ဖိသံဒီးဘၣ်ဒိ အိၣ်စ့ၢ်ကီးဝဲ ဒီး ကမျၢၢ်ဖိအဟံၣ်အဃီ ဘၣ်ဟးဂီၤကွံၥ်ဝဲ, ကမျၢၢ်ဖိအဆၣ်ဖိကီၢ်ဖိ သံဒီးဘၣ်ဒိ ဘၣ်ထံးအိၣ်စ့ၢ်ကီးဝဲဒၣ် ခီဖျိလၢ သုးမီၤစိရိၤအသုး, သုးခိးကီၢ်ဆၢ (BGF) အသုး ခးလီၤကျိဖးဒိၣ် ဒ်အံၤအဖီခိၣ်န့ၣ်လီၤ. ချၢၣ်လွံၢ်ထူၣ်ကီၢ်ရ့ၣ်, မုၢ်တြီၢ်ကီၢ်ရ့ၣ်, ဒူပျၥ်ယၥ်ကီၢ်ရ့ၣ် အဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအိၣ်ဆိးလီၢ်ကျဲအဃိ ကမျၢၢ်ဖိသံဒီး ဘၣ်ဒိအိၣ်စ့ၢ်ကီးဝဲဒၣ်န့ၣ်လီၤ. တနံၣ်အကတီၢ်ပူၤ ကမျၢၢ်ဖိသံဝဲ (၃၁) ဂၤ ဒီး ဘၣ်ဒိဝဲ (၈၆) ဂၤန့ၣ်လီၤ.
လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ကမျၢၢ်ဖိတဖၣ် ဘၣ်အိၣ်မူဝဲလၢ တၢ်ပျံၤတၢ်ဖုးအဖီခိၣ် န့ၣ်လီၤ. ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် ခီဖျိလၢ တၢ်ဒုးတၢ်ယၤအဃိ အနီၣ်ဂံၢ်ခဲလၢၥ်အိၣ်ဝဲ (၅၀၀၀၀) ဘျဲၣ်ဃၣ်ဃၣ်န့ၣ်လီၤ. ကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ အကလုၥ်ကလုၥ်န့ၣ်လီၤ.