လါဖ့ၤဘြူၤအါရံၤ (၁၉) သီ, ၂၀၂၁

ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ် ကညီသးစၢ်ကရၢ (Karen Youth Organization) ဒီး ကညီပိၥ်မုၣ်ကရၢ (Karen Women Organization) ပၥ်ဖှိၣ်ထီၣ်သးဒီး မၤသကိးဝဲ တၢ်အိၣ်ဖှိၣ်ဖးဒိၣ် (ခီကရဲး) တၢ်ဃုထၢ ဖဲလါဖ့ၤဘြူၤအါရံၤ (၁၅) သီတုၤ (၁၈) သီ လၢဆီထံးကီၢ်ဆၣ်, ကီၢ်ဆၣ်ဝဲၤလီၢ် န့ၣ်လီၤ.
ကတီၢ်အံၤ ခီဖျိထံလီၢ်ကီၢ်ပူၤ တၢ်အိၣ်သးလၢ တၢ်ဆူးတၢ်ဆါတကပၤ ဒီး လၢကီၢ်ပယီၤသုး ဟံက့ၤဝဲ တၢ်စိတၢ်မီၤ အဖီခိၣ် တၢ်လဲၤတၢ်က့ၤတညီဘၣ်အဃိ ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ် ကညီသးစၢ်ကရၢ ဒီး ကညီပိၥ်မုၣ်ကရၢ ပိၥ်ဖှိၣ်မၤသကိးဝဲ တၢ်အိၣ်ဖှိၣ်ဖးဒိၣ် (ခီကရဲး) တၢ်ဃုထၢလၢဘျီဝဲအံၤန့ၣ်လီၤ.
ဆီထံးကီၢ်ဆၣ် ကညီသးစၢ်ကရၢ တၢ်အိၣ်ဖးဒိၣ် (ခီကရဲး) တၢ်ဃုထၢတဘျီအံၤ လၢထံရူၢ်ကီၢ်သဲးတၢ်အိၣ်သးကပၤကပၤအဖီခိၣ်အဃိ မ့ၢ်ဝဲ တၢ်အိၣ်ဖှိၣ်ဖးဒိၣ် (ခီကရဲး) တၢ်ဃုထၢ (၄) ဝီတဝီ ဒီး ဘၣ်တၢ်မၤစးထီၣ်အီၤဖဲ လါဖ့ၤဘြူၤအါရံၤ (၁၅) သီတုၤ (၁၆) သီ အနံၤန့ၣ်လီၤ.
လၢတၢ်ဟ့ၣ်ဂံၢ်ဟ့ၣ်ဘါ ကညီသးစၢ်တဖၣ်အဂီၢ် ကီၢ်ရ့ၣ်ချၢၣ်လွံၢ်ထူၣ် ကညီသးစၢ်ကရၢ, ကရၢခိၣ် (၂) စီၤဆၢခုၣ်ကီၢ် စံးဝဲ "ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကရၢမိၢ်ပှၢ် ထံၣ်လၢ သးစၢ်န့ၣ် အိၣ်ဒီးဂံၢ်ဘါ လၢပှဲၤ ဒီး တကးဒံးဘၣ် ပကဘၣ်မ့ၢ်သးစၢ်လၢ ဒုးဆူၣ်ထီၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အဂံၢ်အဘါန့ၣ်လီၤ."
"ကညီသးစၢ် မ့ၢ်ပှၤလၢအရ့ဒိၣ်လၢ ကရၢမိၢ်ပှၢ် တၢ်ဂံၢ်တၢ်ဘါအဂီၢ်အဃိ ပတကြၢးအိၣ်မံခ့မံသပ့ၤဘၣ်. ပကဘၣ်ပၥ်ဖှိၣ်ထီၣ်ပသး လၢပလီၢ်ပကျဲဒၣ်ဝဲ ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကရၢမိၢ်ပှၢ် လိၣ်ဘၣ်ပှၤကတီၢ်န့ၣ်လီၤ. ကညီသးစၢ် အိၣ်လၢထံချၢကီၢ်ချၢမ့ၢ်ဂ့ၤ, ထံလီၢ်ကီၢ်ပူၤမ့ၢ်ဂ့ၤ ပသုတသးပ့ၤနီၣ် လၢပမ့ၢ်ကညီသးစၢ်တဂ့ၤ, ပကဘၣ်ဖှိၣ်ထီၣ်ပသးဒီး ဂဲၤလိၥ်သကိးတၢ်လၢ ပကျိၤပကျဲ သနၢၣ်ဒၣ်ဝဲ လၢကညီသးစၢ်ကရၢ တၢ်ပညိၣ် ဒီး တၢ်မုၢ်လၢ်ကွၢ်စိ ကလၢထီၣ်ပှဲၤထီၣ်အဂီၢ်န့ၣ်လီၤ" န့ၣ် ဆီထံးကီၢ်ဆၣ် ကညီသးစၢ်ကရၢ နဲၣ်ရွဲၣ်ထီၣ်အသီ စီၤဆၣ်ဘျ့ထူ ပၥ်ဖျါအါထီၣ်ဝဲန့ၣ်လီၤ.
တကတီၢ်ဃီ ကညီသးစၢ်ကရၢ မၤတၢ်အိၣ်ဖှိၣ်ဖးဒိၣ် (ခီကရဲး) တၢ်ဃုထၢဝံၤအလီၢ်ခံ ကညီပိၥ်မုၣ်ကရၢ စးထီၣ်မၤဝဲ တၢ်အိၣ်ဖှိၣ်ဖးဒိၣ် (ခီကရဲး) တၢ်ဃုထၢ (၂) ဝီတဝီ စးထီၣ်ဖဲ လါဖ့ၤဘြူၤအါရံၤ (၁၇) သီတုၤ (၁၈) သီ အနံၤဒီး ပိၥ်မုၣ်ခၢၣ်စးခဲလၢၥ် ဟဲထီၣ်ဝဲ (၃၆) ဂၤန့ၣ်လီၤ.
ဆီထံးကီၢ်ဆၣ် ကညီပိၥ်မုၣ်ကရၢ, ကရၢခိၣ်ထီၣ်သီ နီၢ်မုၣ်ဃါဖိ ပၥ်ဖျါထီၣ်ဝဲလၢ "စိၤအစိၤစိၤအပူၤ ပိၥ်မုၣ်တဖၣ် ဘၣ်တၢ်ဆီၣ်တံၢ်မၤနၢၤ, ထံၣ်အံၣ်ထံၣ်ဆံးအီၤအါမးန့ၣ်လီၤ. ကတီၢ်အံၤ လၢတၢ်ထူၣ်ဖျဲးထီၣ်လၢ တၢ်ဆီၣ်တံၢ်မၤနၢၤဒီး တၢ်ထံၣ်အံၣ်ထံၣ်ဆံးအပူၤအဂီၢ် မူဒါအိၣ်လၢ ပဝဲပိၥ်မုၣ်တဖၣ် အစုပူၤန့ၣ်လီၤ. ပမ့ၢ်တဂုၥ်ထူၣ်ဖျဲးထီၣ်ပသးဘၣ်န့ၣ် ပှၤအဂၤကဟဲမၤစၢၤပှၤအဂီၢ် တဘၣ်မုၢ်လၢ်တဂ့ၤ" န့ၣ်လီၤ.
ကညီသးစၢ်ကရၢ ဒီး ကညီပိၥ်မုၣ်ကရၢအံၤ အိၣ်ဝဲဒၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ကရၢကရိဒီး တၢ်ဘိးဘၣ်ရၤလီၤဝဲၤကျိၤ တၢ်တီခိၣ်ရိၣ်မဲအဖီလၥ် န့ၣ်လီၤ. ဒံးန့ၢ်အသိး ကညီသးစၢ်ကရၢ ဒီး ကညီပိၥ်မုၣ်ကရၢ အိၣ်ဒီးတၢ်ဘျၢခိၣ်သ့ၣ်လၢ ကီၢ်ဆၣ်ပတီၢ် တၢ်ကဘၣ်မၤဝဲ တၢ်အိၣ်ဖှိၣ်ဖးဒိၣ် (ခီကရဲး) (၂) နံၣ် တဝီန့ၣ်လီၤ.
ကညီသးစၢ်ကရၢ ဒီး ကညီပိၥ်မုၣ်ကရၢ တၢ်အိၣ်ဖှိၣ်ဖးဒိၣ် ဘျီဝဲအံၤ ခၢၣ်စးလၢ အဟဲထီၣ်တဖၣ် မ့ၢ်ဒၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်လီၢ်ဂံၢ်ခိၣ်သ့ၣ်တဖၣ်န့ၣ်လီၤ. ကတီၢ်အံၤ ခီဖျိ Covid-19 တၢ်ဆါတၢ်ဘၣ်ကူဘၣ်ဂၥ် တၢ်ဘၣ်ယိၥ်အဖီခိၣ် ဒီး တကီၢ်ခါ ကီၢ်ပယီၤ ထံဂူၢ်ကီၢ်သဲး တၢ်အိၣ်သးလၢ ကီၢ်ပဒိၣ် သုးဟံန့ၢ်ဆူၣ်က့ၤ တၢ်စိတၢ်ကမီၤအဖီခိၣ် တၢ်ကကွဲဝဲ သးစၢ်လၢတၢ်လီၢ်အယံၤတဖၣ် ကဲထီၣ်ဝဲ တၢ်ကီတၢ်ခဲန့ၣ်လီၤ.