Districts
ကီၢ်ရ့ၣ်ချၢၣ်လွံၢ်ထူၣ် ဟီၣ်ကဝီၤပူၤ တၢ်မၤလၤကပီၤ မၤထူရၤမုၢ်နံၤ ပှဲၤထီၣ် (၇၂) ဝီတဝီ လၢတၢ်လီၢ် (၁၂) တီၤ
လါအီကူး (၁၃) သီ, ၂၀၂၂ နံၣ်,
ခ့ၣ်အဲၣ်ယူၣ်-လီၢ်ခၢၣ်သး
ဖဲလါအီကူး (၁၂) သီန့ၣ် ကီၢ်ရ့ၣ်ချၢၣ်လွံၢ်ထူၣ် ဟီၣ်ကဝီၤပူၤ တၢ်မၤလၤကပီၤ မၤထူရၤမုၢ်နံၤ (၇၂) ဝီတဝီ လၢတၢ်လီၢ် (၁၂) တီၤ ဒီး ပှၤနီၣ်ဂံၢ်ခဲလၢၥ်အိၣ်ဝဲ (၂၃၀၀) ဃၣ်ဃၣ်န့ၣ်လီၤ. တၢ်လီၢ် (၁၂) တီၤန့ၣ်မ့ၢ်ဝဲ သုးက့ဝဲၤလီၢ်ခိၣ်သ့ၣ်, ကီၢ်ရ့ၣ်ဝဲၤလီၢ်ခိၣ်သ့ၣ်, ဆီထံးကီၢ်ဆၣ်န့ၣ် တၢ်မၤဝဲတၢ်လီၢ် (၄) တီၤလၢအမ့ၢ် ဆီထံးကီၢ်ဆၣ် ဝဲၤလီၢ်ခိၣ်သ့ၣ်, သုးရ့ၣ် (၇) ဝဲၤလီၢ်ခိၣ်သ့ၣ်, မဲၥ်စံၥ်ခံသဝီ ဒီး ထံဖးဒိၣ်ထၣ်တီၤခၢၣ်သးကၠိ န့ၣ်လီၤ. မူကီၢ်ဆၣ်န့ၣ် မၤဝဲတၢ်လီၢ်ခံတီၤ လၢအမ့ၢ် မူကီၢ်ဆၣ်ဝဲၤလီၢ်ခိၣ်သ့ၣ် ဒီး နိၣ်ရှဲသဝီ န့ၣ်လီၤ. မ့မ့ၢ်လၢၢ်ဒိၣ်ကီၢ်ဆၣ်န့ၣ် မၤဝဲတၢ်လီၢ် (၄) တီၤလၢအမ့ၢ် ပၢၤဖိခံ, ကီၢ်သၣ်စ့, ကျီမီၤခိၣ် ဒီး လီၢ်မုၢ်သီန့ၣ်လီၤ.
တၢ်မၤလၤကပီၤ မၤထူရၤလၢ သုးက့ဝဲၤလီၢ်န့ၣ် ပှၤနီၣ်ဂံၢ်အိၣ်ဝဲ (၂၀၀) ဘျဲၣ် ဒီး တၢ်မၤအီၤအက့ၢ်အဂီၤလၢ တၢ်ဟ့ၣ်တၢ်ယူးယီၣ်ဆူ ခိၣ်နၢ်သိၣ်ဒူ, ထံဖိကီၢ်ဖိကမျၢၢ် လၢအဟ့ၣ်လီၤအသးသမူလၢ ထံကီၢ်ဒီးကလုၥ်အဂီၢ်တဖၣ်, တၢ်ပၥ်လီၤဖီကွီၤလၢ မၤထူရၤလၢၢ်ထူၣ်ခီၣ်ထံး, တၢ်ယူၥ်လီၤနီၣ်တယၢ်တ၀ၥ်, တၢ်ဖးဖျါထီၣ်လံၥ်ဟ့ၣ်ယုၢ် ဒီး ခိၣ်နၢ်တၢ်စံးတၢ်ကတိၤန့ၣ်လီၤ. မ့မ့ၢ်ကီၢ်ရ့ၣ်ဝဲၤလီၢ်န့ၣ် ပှၤနီၢ်ဂံၢ်အိၣ်ဝဲ (၂၀၀) ဘျဲၣ် ဒီး တၢ်မၤအီၤအက့ၢ်အဂီၤန့ၣ် တၢ်ဟ့ၣ်တၢ်ယူးယီၣ်, တၢ်ဖးဖျါထီၣ်လံၥ်ဟ့ၣ်ယုၢ် ဒီး ခိၣ်နၢ်တၢ်စံးတၢ်ကတိၤ န့ၣ်လီၤ.
ဆီထံးကီၢ်ဆၣ် ဟီၣ်ကဝီၤပူၤ တၢ်မၤအီၤ (၄) တီၤန့ၣ် ပှၤနီၣ်ဂံၢ်ခဲလၢၥ်အိၣ်ဝဲ (၅၀၇) ဂၤန့ၣ်လီၤ. ဆီထံးကီၢ်ဆၣ် ဝဲလီၢ်ခိၣ်သ့ၣ်န့ၣ် မၤဝဲတၢ်ရဲၣ်တၢ်ကျဲၤ သၢပတီၢ် လၢအမ့ၢ် (၁) တပတီၢ်န့ၣ် တၢ်ဘူၣ်ထူဘါယွၤ, (၂) တပတီၢ်န့ၣ် တၢ်ဟ့ၣ်တၢ်ယူးယီၣ်, တၢ်ဖးဖျါထီၣ်လံၥ်ဟ့ၣ်ယူၢ် ဒီးခိၣ်နၢ်တၢ်စံးတၢ်ကတိၤ ဒီး (၃) တပတီၢ်န့ၣ် တၢ်ပြၢတၢ်ကတိၤဂ့ၢ်လိၥ်န့ၣ်လီၤ. မ့မ့ၢ်အဂၤ (၃) တီၤန့ၣ် တၢ်မၤအီၤဒ်တၢ်ဟ့ၣ်တၢ်ယူးယီၣ်, တၢ်ဖးဖျါထီၣ်လံၥ်ဟ့ၣ်ယုၢ် ဒီး ခိၣ်နၢ်တၢ်စံးတၢ်ကတိၤန့ၣ်လီၤ.
မူကီၢ်ဆၣ်ဟီၣ်ကဝီၤပူၤ တၢ်မၤဝဲ တၢ်လီၢ်ခံတီၤန့ၣ် ပှၤနီၣ်ဂံၢ်ခဲလၢၥ်အိၣ်ဝဲ (၃၇၀) ဂၤ ဒီး တၢ်မၤအီၤအက့ၢ်အဂီၤန့ၣ် တၢ်ဟ့ၣ်တၢ်ယူးယီၣ်, တၢ်ပၥ်လီၤနီၣ်တယၢ်တ၀ၥ်, တၢ်ဖးဖျါထီၣ်လံၥ်ဟ့ၣ်ယုၢ် ဒီး ခိၣ်နၢ်တၢ်စံးတၢ်ကတိၤန့ၣ်လီၤ.
လၢၢ်ဒိၣ်ကီၢ်ဆၣ်ဟီၣ်ကဝီၤပူၤ တၢ်မၤအီၤ (၄) တီၤန့ၣ် ပှၤနီၣ်ဂံၢ်ခဲလၢၥ်အိၣ်ဝဲ (၁၀၀၀) ဃၣ်ဃၣ်န့ၣ်လီၤ. ပၢၤဖိခံသဝီ ဒီး လီၢ်မုၢ်သီသဝီန့ၣ် တၢ်မၤအီၤအက့ၢ်အဂီၤ ဒ်တၢ်ဟ့ၣ်တၢ်ယူးယီၣ်, တၢ်ဖးဖျါထီၣ်လံၥ်ဟ့ၣ်ယုၢ် ဒီး ခိၣ်နၢ်တၢ်စံးတၢ်ကတိၤန့ၣ်လီၤ. ကီၢ်သၣ်စ့သဝီန့ၣ် တၢ်မၤအီၤတၢ်ရဲၣ်တၢ်ကျဲၤ ခံပတီၢ် ဒ်အမ့ၢ် တၢ်ဟ့ၣ်တၢ်ယူးယီၣ်, တၢ်ပၥ်လီၤဖီကွီၤ လၢမၤထူရၤလၢၢ်ထူၣ်ခီၣ်ထံး ဒီး တၢ်ယူၥ်လီၤနီၣ်တယၢ်တ၀ၥ် တပတီၢ် ဒီး ခံပတီၢ်တပတီၢ်လၢအမ့ၢ် တၢ်ဖးဖျါထီၣ်လံၥ်ဟ့ၣ်ယုၢ် ဒီး ခိၣ်နၢ်တၢ်စံးတၢ်ကတိၤ န့ၣ်လီၤ. မ့မ့ၢ်ကျီမီၤခိၣ်န့ၣ် တၢ်မၤဒၣ် တၢ်ယူးယီၣ်, တၢ်ပၥ်လီၤဖီကွီၤ လၢမၤထူရၤလၢၢ်ထူၣ်ခီၣ်ထံး ဒီး တၢ်ပၥ်လီၤနီၣ်တယၢ်တ၀ၥ်န့ၣ်လီၤ.
လၢၢ်ဒိၣ်ကီၢ်ဆၣ် ဒီး မူကီၢ်ဆၣ်ဟီၣ်ကဝီၤပူၤန့ၣ် သုးဟံန့ၢ်ဆူၣ်တၢ်စိတၢ်ကမီၤ သုးကီၣ်ကးအသုးတဖၣ် ခးလီၤကျိဖးဒိၣ်ကျိဖိ ကိးဆၢကတီၢ်သနၥ်က့ တၢ်မၤလၤကပီၤ မၤထူရၤမုၢ်နံၤပှဲၤထီၣ် (၇၂) ဝီတဝီ ဂ့ၤဂ့ၤန့ၣ်လီၤ.
Related Activity
