ခီဖျိ သုးမီၤစိရိၤအသုးတဖၣ် ခးလီၤကျိဖးဒိၣ် လၢသဝီပူၤအဃိ ဒူသဝီကမျၢၢ်တဖၣ် ဘၣ်ဃ့ၢ်မှံဟးဖျိး

၂၀၂၁ နံၣ်, လါစဲးပထ့ဘၢၣ် ၂၇ သီ, ခ့ၣ်အဲၣ်ယူၣ်-လီၢ်ခၢၣ်သး

ဖဲလါစဲးပထ့ဘၢၣ် ၂၆ သီ ဟါလီၤခီအဆၢကတီၢ်န့ၣ် သုးမီၤစိရိၤအသုးတဖၣ် ခးလီၤဝဲကျိဖးဒိၣ် လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ်, ကၠီၤပၠၤသဝီ မုၢ်ထီၣ်တကပၤအဃိ သဝီဖိတဖၣ် ပျံၤတၢ်ဖုးတၢ် ဒီး ဘၣ်ဃ့ၢ်ထီၣ်ကွံၥ်လၢသဝီပူၤ ဒီး ဃ့ၢ်အိၣ်လၢတၢ်အိၣ်သဒၢအလီၢ်န့ၣ်လီၤ.

သုးမီၤစိရိၤအသုး ခမရ (၅၉၉), ခမရ (၅၉၀) ဒီး ခမရ (၃၄၉) ပၥ်ဖှိၣ်သုးဂံၢ်ဘါ ကအိၣ် ၂၀၀ ဘျဲၣ် တဖၣ် ခးလီၤဝဲကျိဖးဒိၣ် လၢကၠီၣ်ပၠၤသဝီမုၢ်ထီၣ်, နၣ်တ့ၤ တၢ်လီၢ် လၢကျိဖးဒိၣ် ၃ ဖျၢၣ် ဒီး ကျိဖိတဖၣ်အဃိ ကမျၢၢ်တဖၣ် ပျံၤတၢ်ဖုးတၢ် ဒီး ဘၣ်ဃ့ၢ်မှံဟးဖျိးဝဲဒၣ်န့ၣ်လီၤ. ကမျၢၢ်လၢအအိၣ်ဘူး ဒီး သုးမီၤစိရိၤအသုး ခးလီၤကျိဖးဒိၣ်အလီၢ်တဖၣ် ဘၣ်ဃ့ၢ်မှံဟးဖျိးဝဲ ဟံၣ်ခိၣ်ခဲလၢၥ် ၂၀ ဘျဲၣ် ဒီး ပှၤနီၣ်ဂံၢ်ကအိၣ်ဝဲ ၈၀ ဂၤဃၣ်ဃၣ်န့ၣ်လီၤ.
ခီဖျိသုးမီၤစိရိၤအသုးတဖၣ် ခးနါစိၤဝဲကျိဒ်အံၤအဃိ ကမျၢၢ်တဖၣ် ဘၣ်ပျံၤတၢ်ဖုးတၢ် ဒီး ကၠိတနီၤဘၣ်ပတုၥ်ကွံၥ်အသး န့ၣ်လီၤ. လၢအဂၤတကပၤ ကတီၢ်အံၤ မ့ၢ်စ့ၢ်ကီးဆၢကတီၢ် လီၤဘၣ်ယိၢ်လၢ Covid-19 တၢ်ဆါအဃိ ကမျၢၢ်တဖၣ် ဘၣ်ပျံၤဘၣ်ဖုးတၢ် အကပၤကပၤန့ၣ်လီၤ.