လၢတသီအတီၢ်ပူၤ သုးမီၤစိရိၤအသုး သံဒီးဘၣ်ဒိ အိၣ်ဝဲ (၅၀) ဘျဲၣ်အဂ့ၢ်

၂၀၂၁ နံၣ်, လါအီးကထိဘၢၣ် ၃ သီ, ခ့ၣ်အဲၣ်ယူၣ်-လီၢ်ခၢၣ်သး

ဒ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, မုၢ်တြီၤကီၢ်ရ့ၣ်, သုးက့ (၅) ဝဲၤဒၢးတၢ်မၤနီၣ်မၤဃါအိၣ်အသိး ဖဲ လါစဲးပထ့ဘၢၣ် ၃၀ သီအနံၤန့ၣ် တၢ်ဒုးကဲထီၣ်ဝဲ ၆ ဘျီ လၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး သုးမီၤစိရိၤအသုးတဖၣ် အဘၢၣ်စၢၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးထံးလၢ အဘၣ်သဂၢၢ်ခးလိၥ်သးဒီး ဒုၣ်ဒါတဖၣ် မ့ၢ်ဝဲ သုးရ့ၣ် (၁၀၂), သုးဒ့ (၁) ဒီး သုးဒ့ (၂) ဒီး မ့မ့ၢ်လၢ သုးမီၤစိရိၤအသုးတဖၣ်တခီ မ့ၢ်ဝဲ စကခ (၈) စုတီၤဖီလၥ် ခမရ (၄၀၈), သုးတဖၣ်န့ၣ်လီၤ. တနံၤဃီအတီၢ်ပူၤ တၢ်ဒုးကဲထီၣ်ဝဲ ၆ ဘျီ ဒီး သုးမီၤစိရိၤအသုးတကပၤ သံဝဲ ၂၃ ဂၤ ဒီး ဘၣ်ဒိဝဲ ၃၀ အဂၤန့ၣ်လီၤ. သုးမီၤစိရိၤအသုး လၢအဘၣ်ဒိတဖၣ်အကျါ ပၣ်ဃုၥ်ဝဲဒၣ်ဒီး သုးရ့ၣ်ခိၣ်ပတီၢ် ၂ ဂၤ အဂ့ၢ် သ့ၣ်ညါဘၣ်န့ၣ်လီၤ. မ့မ့ၢ်လၢ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် တကပၤ တၢ်သံတၢ်ပှၢ် တအိၣ်ဝဲဘၣ်အဂ့ၢ် သ့ၣ်ညါဘၣ်န့ၣ်လီၤ.

ခီဖျိလၢ သုးမီၤစိရိၤအသုးတဖၣ် မၤအါထီၣ်အသုးဂံၢ်ဘါ ဒီး ဟူးဂဲၤဝဲလၢ ဟီၣ်ကဝီၤတၢ်ဒိၣ်စိအဂီၢ်အဃိ လၢတၢ်ဒီသဒၢက့ၤဟီၣ်ကဝီၤအဂီၢ် မူတြီၢ်ကီၢ်ရ့ၣ်, သုးက့ ၅ သုးခိၣ်နၢ်ဘၣ်မူဘၣ်ဒါတဖၣ် ဘၣ်ဒီသဒၢတြီဆၢက့ၤဝဲ သုးမီၤစိရိၤအသုး တဖၣ်အံၤန့ၣ်လီၤ.