ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ် သုးက့ (၆) ကီးတရံးကီၢ်ဆၣ် ဒီး ဝီၢ်ရ့ၣ်ကီၢ်ဆၣ် ဟီၣ်ကဝီၤပူၤ လါဒံၣ်စ့ဘၢၣ် ၁၅ သီ ဒီး ၁၆ သီ လၢခံသီအကတီၢ်ပူၤ တၢ်ဒုးကဲထီၣ်ဝဲ (၇) ဘျီ ဒီး သုးမီၤစိရိၤအသုး သံဝဲ (၁၅) ဂၤဘၣ်ဒိဝဲ (၉) ဂၤ

ခ့ၣ်အဲၣ်ယူၣ်-လီၢ်ခၢၣ်သး (၁၉-၁၂-၂၀၂၁)
ဒူပျၥ်ယၥ်ကီၢ်ရ့ၣ်, ကီးတရံးကီၢ်ဆၣ်အပူၤ ဖဲလါဒံၣ်စ့ဘၢၣ် ၁၅ သီအနံၤ သုးမီၤစိရိၤအသုး စကခ (၁၃) စုဒုၣ်တီၤဖီလၥ် ခမရ (၅၆၀) လၢအဘၣ်တၢ်တီခိၣ်ရိၣ်မဲအီၤလၢ သုးရ့ၣ်ခိၣ် (ထင်လင်းအေၥင်) အသုးတဖၣ် နုၥ်လီၤလၢလ့က့ၣ်ကိၥ်ဝ့ၢ်ပူၤ ဒီး ဘၣ်သဂၢၢ်ခးလိၥ်သးဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၂၇) လီၢ်ကဝီၤသုး ပၥ်ဖှိၣ်သးဒီး (PDF) တဖၣ်န့ၣ်လီၤ. တၢ်ဘၣ်သဂၢၢ်ခးလိၥ်သး စးထီၣ်ကဲထီၣ်ဝဲ ဖဲဂီၤခီ (၁၁း၁၅) မံးနံးအဆၢကတီၢ် တဘျီန့ၣ်လီၤ. သုးမီၤစိရိၤအသုးတဖုအံၤ ဟဲထီၣ်လူၤဝဲ ပပှၤအဃိ ဖဲဟါခီ (၆း၀၀) နၣ်ရံၣ်အဆၢကတီၢ် တၢ်ဘၣ်သဂၢၢ်ခးလိၥ်သး ကဲထီၣ်ကဒီးဝဲ တဘျီန့ၣ်လီၤ. တၢ်ဒုးခံဘျီလၢၥ် သုးမီၤစိရိၤအသုး သံဝဲ (၄) ဂၤအကျါ ပၣ်ဃုၥ်ဒီး သုးဒ့ခိၣ် (၁) ဂၤ, သုးကသံၣ်သရၣ် (၁) ဂၤန့ၣ်လီၤ. သုးမီၤစိရိၤအသုး ဘၣ်ဒိဝဲ (၂) ဂၤအကျါ ပၣ်ဃုၥ်ဒီး သုးရ့ၣ်ခိၣ် (ထင်လင်းအေၥင်) ဘၣ်ဒိဝဲ အကံၣ်ဒုၣ်န့ၣ်လီၤ. ပပှၤမၤန့ၢ်ဝဲ သုးမီၤစိရိၤအကျိ (MA-4) တခိၣ်န့ၣ်လီၤ.
လါဒံၣ်စ့ဘၢၣ် ၁၆ သီအနံၤ သုးမီၤစိရိၤအသုး ပၥ်ဖှိၣ်ထီၣ်လိၥ်အသးဒီး သုးခိးကီၢ်ဆၢအသုးတဖၣ် ဒီး ဟဲထီၣ်လၢကဟဲမၤပှဲၤ ဂံၢ်ဘါလၢ လ့က့ၣ်ကိၥ်ဝ့ၢ်ပူၤ ဒီး ဖဲဟဲလၢကျဲအဆၢကတီၢ် ဘၣ်သဂၢၢ်ခးလိၥ်အသးဒီး သုးရ့ၣ် (၂၇) အသုးပၥ်ဖှိၣ်တဖၣ် ဖဲပဟံၣ်ကျီး တၢ်လီၢ် ဒီး သုးမီၤစိရိၤအသုး သံဝဲ (၄) ဂၤ ဒီး ပပှၤမၤန့ၢ် သုးမီၤစိရိၤအသုးကျိ (၄) ခိၣ်န့ၣ်လီၤ.
လါဒံၣ်စ့ဘၢၣ် ၁၆ သီအနံၤ သုးမီၤစိရိၤအသုး စကခ (၁၃) စုဒုၣ်တီၤဖီလၥ် ခမရ (၅၅၆) သုးရ့ၣ်ခိၣ် (နိုင်နိုင်လင်း) ဒီးအပှၤတဖၣ် ဟဲထီၣ်ဝဲလၢ အ့ရှၣ်ကါကျဲ အဖၢမုၢ် ဘၣ်သဂၢၢ်ခးလိၥ်သးဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၁၈), သုးရ့ၣ် (၁၉) လီၢ်ကဝီၤသုးသ့ၣ်တဖၣ် န့ၣ်လီၤ. ဖဲမုၢ်ဃ့ၢ်လီၤ (၂း၅၈) နၢ်ရံၣ်အဆၢကတီၢ် ဘၣ်သဂၢၢ်ခးလိၥ်သးဖဲ အ့ရှၣ်ကါကျဲမုၢ်ဃၢၤ မီမီၣ်ထၣ်တၢ်လီၢ် တဘျီ ဖဲ (၃း၂၀) နၢ်ရံၣ်အဆၢကတီၢ် ဘၣ်သဂၢၢ်ခးလိၥ်သး ဖဲတၢ်ဘီဟ့ထၣ် တဘျီ, လၢၢ်ထူၣ်ဖျိထၣ် တဘျီန့ၣ်လီၤ. တၢ်ဒုး (၃) ဘျီလၢၥ် သုးမီၤစိရိၤအသုး သံဝဲ (၄) ဂၤအကျါ ပၣ်ဃုၥ်ဒီး သုးရ့ၣ်ခိၣ်တဂၤ, သုးဒ့ခိၣ်တဂၤ, သုးဒ့ခိၣ် (၂) တဂၤ ဒီး ဘၣ်ဒိဝဲခဲလၢၥ် (၇) ဂၤန့ၣ်လီၤ.
လါဒံၣ်စ့ဘၢၣ် ၁၆ သီအနံၤ သုးမီၤစိရိၤအသုး ဂံၢ်ဘါကအိၣ် (၁၀) ဂၤဟဲနုၥ်လီၤဝဲလၢ ဝီၢ်ရ့ၣ်ကီၢ်ဆၣ် သုးရ့ၣ် (၁၆) ဟီၣ်ကဝီၤပူၤအဃိ ဖဲ (၂း၄၄) နၢ်ရံၣ်အဆၢကတီၢ် ဘၣ်သဂၢၢ်ခးလိၥ်သးဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၁၆) သုးဒ့ (၃) ဖဲပူးလ့ၣ်တၢ်လီၢ် ဒီး သုးမီၤစိရိၤအသုး သံဝဲ (၃) ဂၤန့ၣ်လီၤ.
ခီဖျိသုးမီၤစိရိၤ ဟူးဂဲၤဝဲ ဒုးယၤဂ့ၢ်ဝီအတၢ်ရဲၣ်တၢ်ကျဲၤအဃိ တၢ်ဘၣ်သဂၢၢ်ခးလိၥ်သး အိၣ်ထီၣ်အဖီခိၣ် လ့က့ၣ်ကိၥ်, ထံမဲးဝါခံ, မဲၤထီၣ်တလ့, ပဟံၣ်ကျီး ဒီး ယသ့းကူၣ် ကမျၢၢ်ဖိ (၇၀၀၀) ဃၣ်ဃၣ် ဘၣ်ဃ့ၢ်အိၣ်ခူသူၣ်ဝဲ ဒီး ကမျၢၢ်ဖိ (၂၅၀၀) ဘျဲ ၣ်ဟဲဃ့ၢ်အိၣ်ကဒုလၢ ယိၤကီၢ်တကပၤန့ၣ်လီၤ. ကမျၢၢ်ဖိလၢ ဃ့ၢ်အိၣ်ခူသူၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ လၢအမ့ၢ် တၢ်အီၣ်တၢ်အီ, တၢ်အိၣ်တၢ်ဆိးလီၢ်ကျဲ ဒီး တၢ်ကူတၢ်ကၤ, ဆ့, ယၣ် တလၢတလီၥ်လၢ အဝဲသ့ၣ်တဖၣ်အဂီၢ်ဘၣ်န့ၣ်လီၤ.