ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်, ဘံလ့ကီၢ်ဆၣ် ဟီၣ်ကဝီၤ ပှၤဃ့ၢ်မှံဟးဖျိး အိၣ်ထီၣ်ဝဲ (၂၀၀၀) ဂၤအဂ့ၢ်

၂၀၂၁ နံၣ်, လါဒံၣ်စ့ဘၢၣ် ၂၅ သီ, ဒူသထူၣ်ကီၢ်ရ့ၣ်
ခီဖျိလၢ သုးမီၤစိရိၤအသုး ဒီး သုးခိးကီၢ်ဆၢ BGF အသုးပၥ်ဖှိၣ်တဖၣ် ဟူးဂဲၤအါထီၣ်ဝဲ သုးဂ့ၢ်ဝီတၢ်ဟူးတၢ်ဂဲၤတဖၣ်အဃိ တၢ်ဘၣ်ယိၢ်အိၣ်ထီၣ်လၢ တၢ်ဒုးတၢ်ယၤကကဲထီၣ်အဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ဘံလ့ကီၢ်ဆၣ် တၢ်ပၢဟီၣ်ကဝီၤ သဝီလၢအမ့ၢ် ယိၤကျါသဝီ (မုၢ်နုၥ်, မုၢ်ထီၣ်), ထိးကျိးထၣ် သဝီ, ထံဖးဒိၣ်ခံသဝီ, ကီးခိၣ်သဝီ, လ့ခီၣ်ထံးသဝီ သဝီဖိခဲလၢၥ် (၂၀၀၀) ဂၤတဖၣ် ဘၣ်ပၥ်တ့ၢ်ကွံၥ်ဟံၣ်ဃီ ဒီး ဃ့ၢ်အိၣ်ကဒုလၢ တၢ်ပူၤဖျဲးအလီၢ်န့ၣ်လီၤ.
သဝီဖိတဂၤ စံးဝဲဒၣ်လၢ "သုးမီၤစိရိၤအသုးတဖၣ် မၤအါထီၣ်အသုးဂံၢ်ဘါ ဒီး ဟူးဂဲၤဝဲဒၣ်အဃိ ပဘၣ်ယိၢ်လၢ တၢ်ဒုးကကဲထီၣ်ကဒီး လၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ် အသုးတဖၣ်အဘၢၣ်စၢၤန့ၣ်လီၤ. လၢတၢ်န့ၣ်အဃိ ပဃ့ၢ်ပူၤဖျဲးပသးန့ၣ်လီၤ. ပှၤတနီၤ လဲၤဃ့ၢ်အိၣ်ကဒုလၢ သဝီလၢအအိၣ်ဘူးတဖၣ်လီၤ" အဂ့ၢ်န့ၣ် ပၥ်ဖျါဝဲဒၣ်န့ၣ်လီၤ.
ဖဲလါဒံၣ်စ့ဘၢၣ် ၁၇ သီအနံၤန့ၣ် ခ့ၣ်အဲၣ်ယူၣ်-ဘံလ့ကီၢ်ဆၣ် ဟီၣ်ကဝီၤ သုးခိးကီၢ်ဆၢ (BGF) အသုးကလၢၤ ဖဲယိၤကျါသဝီ တဖျၢၣ်န့ၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ ၁ ဒီး သုးပၥ်ဖှိၣ်တဖၣ် လဲၤထီၣ်ဒုးမၤန့ၢ်ဝဲဒၣ်န့ၣ်လီၤ. တၢ်အံၤဝံၤအလီၢ်ခံ သုးမီၤစိရိၤအသုးဒီး သုးခိးကီၢ်ဆၢ BGF သုးတဖၣ် မၤအါထီၣ်ဝဲ အသုးဂံၢ်ဘါ လၢဝ့တပၣ်သုးကလၢၤ, လ့က့ၣ်သုးကလၢၤ ဒီး ဟူးဂဲၤအါထီၣ်ဝဲဒၣ်န့ၣ်လီၤ.