ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ လါမးရှးတလါကတီၢ်ပူၤ တၢ်ဒုးကစီၣ်

ခ့ၣ်အဲၣ်ယူၣ်-လီၢ်ခၢၣ်သး
၂၀၂၂ နံၣ်, လါအ့ဖြ့ၣ် ၄ သီ
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤ တၢ်ပၢဟီၣ်ကဝီၤပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) ဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲကိးနံၤဒဲးန့ၣ်လီၤ. တလါကတီၢ်ပူၤ တၢ်ဒုးကဲထီၣ်ဝဲ (၅၁၀) ဘျီ ဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် သံဝဲ (၄၂၉) ဂၤ ဒီး ဘၣ်ဒိဝဲ (၂၆၀) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) မၤဟးဂီၤကွံၥ်ဝဲ သုးမီၤစိရိၤအသုး သိလ့ၣ် ခဲလၢၥ် (၃၅) ခိၣ်န့ၣ်လီၤ.
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA) ဒီး ကညီဒီကလုၥ်ဂၢၤသးကရၢ (KNDO) တကပၤတခီ ဟ့ၣ်လီၤကွံၥ်အသးသမူလၢ ထံကီၢ် ဒီး ပှၤကလုၥ်အဂီၢ် (၂၂) ဂၤ ဒီး လုၢ်ထီၣ်အနီၢ်ခိက့ၢ်ဂီၤ လၢထံကီၢ်ဒီး ကလုၥ်ဂီၢ် (၃၅) ဂၤန့ၣ်လီၤ.
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) ဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ကိးနံၤဒဲးအဖီခိၣ် သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤနါစိၤကျိဖးဒိၣ်, ကျိဖိ လၢကမျၢၢ်ဖိအဒူသဝီ ကမျၢၢ်ဖိအတၢ်ဖံးအီၣ်မၤအီၣ်အလီၢ်အကျဲ ကိးမုၢ်နံၤဒဲးန့ၣ်လီၤ. ကမျၢၢ်ဖိလၢအတၢ်ကမၣ်တအိၣ် သံဝဲ (၂၅) ဂၤ ဒီး ဘၣ်ဒိဝဲ (၃၁) ဂၤ ခီဖျိ သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤကျိဖးဒိၣ် အဃိန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်, မုၢ်တြီၢ်ကီၢ်ရ့ၣ်, ဒူပျၥ်ယၥ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုး သူဝဲကဘီယူၤဒီး ဟဲခးလီၤတၢ် အိၣ်ဝဲခဲလၢၥ် (၈) ဘျီန့ၣ်လီၤ. သုးမီၤစိရိၤအသုး သူဝဲကဘီယူၤ ဒီး ဟဲခးလီၤတၢ်အဖီခိၣ် ကမျၢၢ်ဖိ ဘၣ်ဒိဝဲ (၂) ဂၤ ဒီး ကမျၢၢ်ဖိအဟံၣ်အဃီ တၢ်သူၣ်ထီၣ်ဟးဂီၤ အိၣ်ဝဲဒၣ်အါမးန့ၣ်လီၤ.
သုးမီၤစိရိၤအသုး ဟံးန့ၢ်ဆူၣ်ဝဲ ကမျၢၢ်ဖိအစ့ (၃၇) ကလီၢ်ကၠးန့ၣ်လီၤ. သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် ခးလီၤကျိဖးဒိၣ်အဃိမ့ၢ်ဂ့ၤ, ဟဲခးလီၤတၢ်လၢကဘီယူၤမ့ၢ်ဂ့ၤ, မၤဟးဂီၤကမျၢၢ်ဖိ အတၢ်ဖိတၢ်လံၤမ့ၢ်ဂ့ၤ ပထိၣ်ဒွးက့ၤလၢ စိၤခဲအံၤအလုၢ်အပှ့ၤအဖီခိၣ် လီၤလၢဝဲစ့အကလီၢ် တကထိဃၣ်ဃၣ် န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်မှံဟးဖျိး ခီဖျိတၢ်ဒုးတၢ်ယၤအဃိမ့ၢ်ဂ့ၤ, သုးမီၤစိရိၤအသုး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤနါစိၤကျိဖးဒိၣ်မ့ၢ်ဂ့ၤ, ဟဲခးလီၤတၢ်လၢ ကဘီယူၤအဃိမ့ၢ်ဂ့ၤ ကမျၢၢ်နီၢ်ဂံၢ်အိၣ်ဝဲလၢ တကလီၢ်ဘျဲၣ် န့ၣ်လီၤ.