၂၀၂၂ နံၣ်, လါယူၤ တလါအကတီၢ်ပူၤ သုးမီၤစိရိၤအသုးသ့ၣ်တဖၣ်, သုးခိးကီၢ်ဆၢ (BGF) အသုးသ့ၣ်တဖၣ်အဃိ ကမျၢၢ်ဖိလၢ အတၢ်ကမၣ်တအိၣ်ဘၣ် ဘၣ်သံဝဲ (၁၂) ဂၤ ဒီး ဘၣ်ဒိဝဲ (၁၅) ဂၤ

၂၀၂၂ နံၣ်, လါယူၤလံ ၄ သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ်, သုးခိးကီၢ်ဆၢ (BGF) အသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး ဆှၢအါထီၣ်အသုးအဃိ လၢတၢ်ဒီသဒၢက့ၤ ဟီၣ်ကဝီၤ ဒီး ကမျၢၢ်ဖိအသးသမူ တၢ်ဘံၣ်တၢ်ဘၢအဂီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) လီၢ်ကဝီၤသုးသ့ၣ်တဖၣ် ဖဲဟံးန့ၢ်မူဒါလၢ လီၢ်ကဝီၤတၢ်ဘံၣ်တၢ်ဘၢ အဆၢကတီၢ် ဘၣ်သဂၢၢ်ခးလိၥ်သးဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် ကိးနံၤဒဲးန့ၣ်လီၤ.

သုးမီၤစိရိၤအသုး, သုးခိးကီၢ်ဆၢ (BGF) အသုး လၢဟဲနုၥ်လီၤဟူးဂဲၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤသ့ၣ်တဖၣ် မၤပျံၤမၤဖုးကမျၢၢ်, ခးလီၤကျိဖးဒိၣ်လၢ ကမျၢၢ်ဖိအဒူသဝီ တၢ်ဖံးအီၣ်မၤအီၣ်အလီၢ်အကျဲ ကိးနံၤဒဲးဃၣ်ဃၣ်န့ၣ်လီၤ. သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် မၤဆူးမၤဆါကမျၢၢ်, မၤသံမၤဝီကမျၢၢ်, ဟံဆူၣ်ကမျၢၢ်ဖိအတၢ်ဖိတၢ်လံၤ, တၢ်စုလီၢ်ခီၣ်ခိၣ်, မၤဟးဂီၤကမျၢၢ်ဖိ အတၢ်စုလီၢ်ခီၣ်ခိၣ်, ဟံအီၣ်ဆူၣ်ကမျၢၢ်အဆၣ်ဖိကီၢ်ဖိ, တၢ်အီၣ်တၢ်အီသ့ၣ်တဖၣ်, မၤဟးဂီၤကမျၢၢ်အဟံၣ်အဃီ, ဒွဲၣ်အူကမျၢၢ်အဟံၣ်အဃီ အိၣ်ဝဲအါမးန့ၣ်လီၤ.

၂၀၂၂ နံၣ် လါယူၤ တလါအကတီၢ်ပူၤ သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤကျိဖးဒိၣ်လၢ ကမျၢၢ်ဖိအဒူသဝီ တၢ်ဖံးအီၣ်မၤအီၣ်အလီၢ်ကျဲအဃိ ဘၣ်ဟးဂီၤဝဲ ကမၢၢ်ဖိအဟံၣ် ခဲလၢၥ် (၇၅) ဖၢၣ်, သီခါဖၠၣ် (၂) ဖျၢၣ်, ကၠိ (၂) ဖျၢၣ် န့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ဒွဲၣ်အူကွံၥ်ဝဲ ကမျၢၢ်ဖိအဟံၣ် ခဲလၢၥ် (၆၁) ဖျၢၣ်န့ၣ်လီၤ.

သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ဖဲဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ အဆၢကတီၢ် ကွဲဆူၣ်ဃုၥ်ဝဲ ကမျၢၢ်ဖိ လၢကဘၣ်ဟးဒုးနဲၣ်န့ၢ်အဝဲသ့ၣ်ကျဲ, ဒိးန့ၢ်ဆူၣ်ဝဲ ကမျၢၢ်အသိလ့ၣ် လၢကတီန့ၢ်အပှၤသုးဖိမ့ၢ်ဂ့ၤ, တီန့ၢ်အသုးတၢ်အီၣ်မ့ၢ်ဂ့ၤ အိၣ်ဝဲဒၣ်န့ၣ်လီၤ.

ကမျၢၢ်ဖိလၢ အတၢ်ကမၣ်တအိၣ်ဘၣ်တဖၣ် ဘၣ်သံဝဲလၢ သုးမီၤစိရိၤအသုး ခးသံအီၤအဃိမ့ၢ်ဂ့ၤ, ခးလီၤကျိဖးဒိၣ်အဃိမ့ၢ်ဂ့ၤ ခဲလၢၥ်အိၣ်ဝဲ (၁၂) ဂၤ အကျါ ပၣ်ဃုၥ်ဒီး သီခါတပါ န့ၣ်လီၤ. ကမျၢၢ်ဖိဘၣ်ဒိဝဲ ခီဖျိလၢ သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤကျိဖးဒိၣ်အဃိ ခဲလၢၥ် (၁၅) ဂၤအကျါ ပၣ်ဃုၥ်စ့ၢ်ကီးဒီး သီခါ(၁)ပါန့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်ကဝီၤပူၤ ဒ်အမ့ၢ် ဒူသထူၣ်ကီၢ်ရ့ၣ် သုးက့ (၁), တီအူကီၢ်ရ့ၣ် သုးက့ (၂), ချၢၣ်လွံၢ်ထူၣ်ကီၢ်ရ့ၣ် သုးက့ (၃), ဘျံးဒဝဲၢ် ကီၢ်ရ့ၣ် သုးက့ (၄), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆), ဟီၣ်ကဝီၤပူၤ ခီဖျိလၢ တၢ်ဒုးတၢ်ယၤအိၣ်ဝဲတပယူၥ်ဃီအဃိ ကမျၢၢ်ဖိအါမး ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် န့ၣ်လီၤ. ဒူသထူၣ်ကီၢ်ရ့ၣ် သုးက့ (၁), ချၢၣ်လွံၢ်ထူၣ်ကီၢ်ရ့ၣ် သုးက့ (၃), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆), ဟီၣ်ကဝီၤပူၤ ခီဖျိလၢတၢ်ဒုးဆူၣ်အဃိ ကမျၢၢ်ဖိဘၣ်ဃ့ၢ်မှံဟးဖျိး အနီၣ်ဂံၢ်အါထီၣ်ဝဲဒၣ်န့ၣ်လီၤ. ကမျၢၢ်ဖိသ့ၣ်တဖၣ် လိၣ်ဘၣ်ဝဲ ဂ့ၢ်ဂီၢ်အူတၢ်ဆီၣ်ထွဲမၤစၢၤ ဒ်အမ့ၢ် တၢ်အီၣ်တၢ်အီ သ့ၣ်တဖၣ်န့ၣ်လီၤ. ခီဖျိလၢ တၢ်စူၤဒိၣ်အဃိ ကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်အိၣ်တၢ်ဆိးအလီၢ်အကျဲ န့ၣ်လီၤ. ပှၤတဂၤလၢ်လၢ် လၢအဲၣ်ဒိးမၤစၢၤ ကမျၢၢ်ဖိလၢဘၣ်ဃ့ၢ်မှံဟးဖျိး လၢတၢ်ဒုးတၢ်ယၤအဃိသ့ၣ်တဖၣ်မ့ၢ်ဂ့ၤ, အဲၣ်ဒိးသ့ၣ်ညါအါထီၣ် ကမျၢၢ်ဖိအတၢ်အိၣ်သးမ့ၢ်ဂ့ၤ ဆဲးကျိးသံကွၢ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ကစီၣ်ဒီးတၢ်ဘိးဘၣ်ရၤလီၤသန့ သ့ဝဲဒၣ်န့ၣ်လီၤ.