ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤ တၢ်ပၢဟီၣ်ကဝီၤပူၤ ၂၀၂၂ နံၣ်, လါယူၤလံ ဒီတလါကတီၢ်ပူၤ တၢ်ဒုးကစီၣ် ပၥ်ဖှိၣ်

၈-၈-၂၀၂၂ ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤ တၢ်ပၢဟီၣ်ကဝီၤပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) ဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ကိးနံၤဒဲးန့ၣ်လီၤ. ခီဖျိလၢ သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး မၤထီဒါဝဲ ကမျၢၢ်ဖိခွဲးယၥ် တပယူၥ်ဃီအဃိ လၢတၢ်ဒီသဒၢလီၤက့ၤဟီၣ်ကဝီၤ ဒီး တၢ်ဒီသဒၢက့ၤကမျၢၢ်ဖိ အသးသမူ တၢ်ဘံၣ်တၢ်ဘၢအဂီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) လီၢ်ကဝီၤသုးသ့ၣ်တဖၣ် ဘၣ်ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤန့ၣ်လီၤ.
ဒူသထူၣ်ကီၢ်ရ့ၣ် သုးက့ (၁) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၂၅) ဘျီ ဒီး သုးမီၤစိရိၤအသုး သံဝဲခဲလၢၥ် (၂၄) ဂၤ ဒီး ဘၣ်ဒိဝဲ (၄၅) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) မၤဟးဂီၤကွံၥ်စ့ၢ်ကီးဝဲ သုးမီၤစိရိၤအသုး သိလ့ၣ်ခဲလၢၥ် (၈) ခိၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဒီး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ တၢ်ဖံးအီၣ်မၤအီၣ်လီၢ်ကျဲအဃိ ဘၣ်သံဝဲကမျၢၢ်ဖိ (၂) ဂၤဒီးဘၣ်ဒိဝဲ (၃) ဂၤန့ၣ်လီၤ. ခီဖျိလၢ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ခဲအံၤခဲအံၤဒီး ဖဲတၢ်ဘၣ်သဂၢၢ်ခးလိၥ်သး အိၣ်ထီၣ်တဘျီလၢ်လၢ် သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ခးလီၤဃုၥ်ကျိဖးဒိၣ် လၢကမျၢၢ်ဖိအဒူသဝီပူၤအဃိ ကမျၢၢ်ဖိသ့ၣ်တဖၣ် ဘၣ်ဃ့ၢ်ပူၤဖျဲးအသးလၢ တၢ်ပူၤဖျဲးအလီၢ်န့ၣ်လီၤ. ဒူသထူၣ်ကီၢ်ရ့ၣ်, သထူၣ်ကီၢ်ဆၣ်, ကၠဲၣ်ထိၣ်ကီၢ်ဆၣ်, ဘံလ့ကီၢ်ဆၣ် ဒီး ဖၣ်အၣ်ကီၢ်ဆၣ် ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ် အနီၣ်ဂံၢ်ခဲလၢၥ်အိၣ်ဝဲ (၉၄၇၆၈) ဂၤန့ၣ်လီၤ.
တီအူကီၢ်ရ့ၣ် သုးက့ (၂) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ကဲထီၣ်ဝဲခဲလၢၥ် (၃၃) ဘျီ ဒီး သုးမီၤစိရိၤအသုး သံဝဲ (၈၇) ဂၤ ဒီး ဘၣ်ဒိဝဲ (၁၅) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) မၤဟးဂီၤကွံၥ်စ့ၣ်ကီးဝဲ သုးမီၤစိရိၤအသုးသိလ့ၣ် ခဲလၢၥ် (၂) ခိၣ်န့ၣ်လီၤ. တီအူကီၢ်ရ့ၣ် ဟီၣ်ကဝီၤပူၤ ခီဖျိလၢတၢ်ဒုးကဲထီၣ်ဝဲအဃိ ကမျၢၢ်ဖိသ့ၣ်တဖၣ် ဘၣ်ဃ့ၢ်မှံဟးဖျိး အိၣ်စ့ၢ်ကီးဝဲဒၣ်န့ၣ်လီၤ. သုးမီၤစိရိၤအသုး ခမရ-၅၈၁ သ့ၣ်တဖၣ် ဟးဒိးလီၤမ့ၣ်ပိၢ်လၢ ကမျၢၢ်ဖိဟးထီၣ်ဟးလီၤကျဲအဃိ ကမျၢၢ်ဖိယီၢ်ဘၣ်မ့ၣ်ပိၢ် ဒီး သံဝဲ (၁) ဂၤ, ဘၣ်ဒိဝဲ (၂) ဂၤန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ကဲထီၣ်ဝဲခဲလၢၥ် (၄၂) ဘျီ ဒီး သုးမီၤစိရိၤအသုး သံဝဲ (၇၄) ဂၤ ဒီး ဘၣ်ဒိဝဲ (၅၀) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) မၤဟးဂီၤကွံၥ်စ့ၢ်ကီးဝဲ သုးမီၤစိရိၤအသုး သိလ့ၣ်ခဲလၢၥ် (၆) ခိၣ်န့ၣ်လီၤ. သုမီၤစိရိၤအသုး သူဝဲကဘီယူၤဒုးသုး ဒီး ဟဲခးလီၤတၢ်ခဲလၢၥ် အိၣ်ဝဲ (၇) ဘျီန့ၣ်လီၤ. သုးမီၤစိရိၤ ခးလီၤတၢ်လၢ ကဘီယူၤဃိ ဘၣ်သံဝဲကမျၢၢ် (၁) ဂၤ ဒီး ဘၣ်ဒိဝဲကမျၢၢ် (၆) ဂၤန့ၣ်လီၤ. သုးမီၤစိရိၤအသုး ခးလီၤကျိဖးဒိၣ်လၢ ကမျၢၢ်ဖိအဒူသဝီပူၤအဃိ ဘၣ်သံဝဲကမျၢၢ်ဖိ (၁) ဂၤ ဒီး ဘၣ်ဒိဝဲကမျၢၢ်ဖိ (၅) ဂၤန့ၣ်လီၤ. သုးမီၤစိရိၤအသုး ခးသံဝဲကမျၢၢ်ခဲလၢၥ် (၈) ဂၤ ဒီး ခးဘၣ်ဒိဝဲ (၁) ဂၤန့ၣ်လီၤ. သုးမီၤစိရိၤအသုး ခးလီၤကျိဖးဒိၣ်ဃိ ဘၣ်ဟးဂီၤဝဲ ကမျၢၢ်ဖိအဟံၣ် (၇) ဖျၢၣ်န့ၣ်လီၤ. သုးမီၤစိရိၤအသုး ဒွဲၣ်အူကွံၥ်ဝဲ ကမျၢၢ်ဖိအဟံၣ်ခဲလၢၥ် (၂၂) ဖျၢၣ်န့ၣ်လီၤ. သုးမီၤစိရိၤအသုး ဖီၣ်ဝဲကမျၢၢ်ဖိ လၢအတၢ်ကမၣ်တအိၣ်ဘၣ် ခဲလၢၥ် (၃၉) ဂၤန့ၣ်လီၤ. ကမျၢၢ်ဖိလၢ သုးမီၤစိရိၤအသုး ဖီၣ်အီၤတဖၣ် ဘၣ်တူၢ်ဘၣ်ခီၣ်ဝဲ သုးမီၤစိရိၤ အတၢ်မၤဒၢၣ်မၤလီၤ, မၤဆူးမၤဆါအီၤ တကးဘၣ် သုးမီၤစိရိၤအသုးတဖၣ် သူဝဲလၢကဘၣ်ဟးဒုးနဲၣ်န့ၣ်အကျဲ န့ၣ်လီၤ. သုးမီၤစိရိၤအသုး မၤဟးဂီၤဝဲ ကမျၢၢ်အဆဲၣ်ကဲၣ် ခဲလၢၥ် (၁၃) ခိၣ် ဒီး လ့ၣ်ယီၢ် (၁၂) ခိၣ်န့ၣ်လီၤ. ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ်, မူကီၢ်ဆၣ်, ဆီထံးကီၢ်ဆၣ် ဟီၣ်ကဝီၤပူၤ ကမျၢၢ်ဖိဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် ခဲလၢၥ်အိၣ်ဝဲ (၆၁၈၉၈) ဂၤန့ၣ်လီၤ.
ဘျံးဒဝဲၢ်ကီၢ်ရ့ၣ် သုးက့ (၄) ဟီၣ်ကဝီၤပူၤ တၢ်ဒုးကဲထီၣ်ဝဲ ခဲလၢၥ် (၁၄) ဘျီ ဒီး သုးမီၤစိရိၤအသုး သံဝဲ (၃၁) ဂၤ ဒီး ဘၣ်ဒိဝဲ (၄၀) ဂၤန့ၣ်လီၤ. ဘျံးဒဝဲၢ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုး ခလရ-၂၈၅ တဖၣ် ခးလီၤကျိဖးဒိၣ်အဃိ ဘၣ်သံဝဲကမျၢၢ်ဖိ (၁) ဂၤ ဒီး ဘၣ်ဒိဝဲ (၁) ဂၤန့ၣ်လီၤ. သုးမီၤစိရိၤအသုး ဖီၣ်မၤသံဝဲကမျၢၢ် (၂) ဂၤ ဒီး ဒွဲၣ်အူကမျၢၢ်အဟံၣ် (၁) ဖျၢၣ် ဒီး ဖီၣ်စ့ၢ်ကီးဝဲ ကမျၢၢ်ဖိ လၢအတၢ်ကမၣ်တအိၣ်ဘၣ် (၉) ဂၤ ဒီး သူဝဲလၢ ကဘၣ်ဟးဒုၣ်နဲၣ်န့ၣ်အဝဲသ့ၣ်တဖၣ်အကျဲ န့ၣ်လီၤ. ဘျံးဒဝဲၢ်ကီၢ်ရ့ၣ် ဟီၣ်ကဝီၤပူၤ ကမျၢၢ်ဖိဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် အိၣ်စ့ၢ်ကီးဝဲဒၣ်န့ၣ်လီၤ.
မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ (၇၂) ဘျီ ဒီး တၢ်ဒုးစဲၥ်ပြဲၥ် ကဲထီၣ်ဝဲ (၃၈) ဘျီ ခဲလၢၥ် (၁၁၀) ဘျီ ဒီး သုးမီၤစိရိၤအသုး သံဝဲ (၉၅) ဂၤ ဒီး ဘၣ်ဒိဝဲ (၅၅) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) မၤဟးဂီၤကွံၥ်စ့ၢ်ကီးဝဲ သုးမီၤစိရိၤအသုးသိလ့ၣ် ခဲလၢၥ် (၁) ခိၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ခးလီၤကျိဖးဒိၣ်အဃိ ဘၣ်သံဝဲကမျၢၢ် (၂) ဂၤ ဒီး ဘၣ်ဒိဝဲ (၅) ဂၤ ဒီး ဘၣ်ဟးဂီၤဝဲ တၢ်ဘါယွၤသရိၥ်တဖျၢၣ် ဒီး ကမျၢၢ်ဖိအဟံၣ် (၄) ဖျၢၣ်န့ၣ်လီၤ. သုးမီၤစိရိၤအသုး ဖီၣ်စ့ၢ်ကီးဝဲ ကမျၢၢ်ဖိလၢ အတၢ်ကမၣ်တအိၣ်ဘၣ် (၁) ဂၤန့ၣ်လီၤ. မုၢ်တြီၢ်ကီၢ်ရ့ၣ် ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် အိၣ်စ့ၢ်ကီးဝဲဒၣ်န့ၣ်လီၤ.
ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ကဲထီၣ်ဝဲ ခဲလၢၥ် (၃၅) ဘျီ ဒီး သုးမီၤစိရိၤအသုး သံဝဲ (၇၅) ဂၤ ဒီး ဘၣ်ဒိဝဲ (၇၁) ဂၤန့ၣ်လီၤ. သုးမီၤစိရိၤအသုးသ့ၣ်တဖၣ် ခးလီၤကျိဖးဒိၣ်အဃိ ဘၣ်ဒိဝဲကမျၢၢ်ဖိ (၂) ဂၤ ဒီး ဘၣ်ဟးဂီၤဝဲ တၢ်ဘါယွၤသရိၥ် တဖျၢၣ်, ဘၣ်ဟးဂီၤဝဲကမျၢၢ်ဖိ အဟံၣ် (၁၀) ဖျၢၣ် ဒီး ကမျၢၢ်ဖိ တၢ်ဆါတၢ်ပှ့ၤကျး (၁) ဖျၢၣ်န့ၣ်လီၤ. ဒူပျၥ်ယၥ်ကီၢ်ရ့ၣ် ဟီၣ်ကဝီၤပူၤ ကမျၢၢ်ဖိလၢဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် အိၣ်စ့ၢ်ကီးဝဲဒၣ်န့ၣ်လီၤ.
၂၀၂၂ နံၣ် လါယူၤလံ တလါကတီၢ်ပူၤ တၢ်ဒုးဖးဒိၣ်, တၢ်ဒုးဖိ, တၢ်ဒုးစဲၥ်ပြဲၥ် ကဲထီၣ်ဝဲ ခဲလၢၥ် (၂၅၉) ဘျီ ဒီး သုးမီၤစိရိၤအသုး သံဝဲခဲလၢၥ် (၃၈၆) ဂၤ, ဘၣ်ဒိဝဲ (၂၈၀) ဂၤန့ၣ်လီၤ, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) တကပၤတခီ ဟ့ၣ်လီၤအသးသမူ လၢထံကီၢ်ဒီးကလုၥ်တၢ်သဘျ့ဂီၢ် ခဲလၢၥ် (၁၂) ဂၤ ဒီး ဘၣ်ဒိဝဲ (၂၆) ဂၤန့ၣ်လီၤ. ကမျၢၢ်ဖိလၢ အတၢ်ကမၣ်တအိၣ်ဘၣ်တဖၣ် ဘၣ်သံဝဲ (၁၉) ဂၤ ဒီး ဘၣ်ဒိဝဲ (၂၆) ဂၤန့ၣ်လီၤ.