သုးဟံးန့ၢ်ဆူၣ် တၢ်စိတၢ်ကမီၤ သုးကီၣ်ကးအသုးတဖၣ် ဟဲခးလီၤတၢ်လၢ ကဘီယူၤ လၢ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ

လါအီကူး (၈) သီ, ၂၀၂၂ နံၣ်
တဂီၤအံၤ ဖဲအနၣ်ရံၣ် (၁၀) ဘျဲၣ် အဆၢကတီၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် လၢၢ်ဒိၣ်ကီၢ်ဆၣ် ဟီၣ်ကဝီၤပူၤ သုးဟံးန့ၢ်ဆူၣ် တၢ်စိတၢ်ကမီၤ သုးကီၣ်ကးအသုးတဖၣ် ဟဲခးလီၤတၢ်လၢ ကဘီယူၤခံဘ့ၣ် န့ၣ်လီၤ. ခးလီၤဝဲဖဲ လၢၢ်ဒိၣ်ကီၢ်ဆၣ် ပဲသီသဝီခိၣ်ထိး တၢ်သိၣ်လိကၠိ အကပိၥ်ကပၤန့ၣ်လီၤ. ခးလီၤဝဲဒၣ်ခဲလၢၥ် ၅ ဘျီ ဒီး တၢ်ဘၣ်ဒိဘၣ်ထံး တၢ်ဟးဂုၥ်ဟးဂီၤ လီၤလီၤဆီဆီတအိၣ်ဘၣ်. ဘၣ်ဒၣ်သ့ၣ်မုၢ်၀ၣ်ဘိ န့ၣ်လီၤ. မ့မ့ၢ်သုးကီၣ်ကး အကဘီယူၤတဘ့ၣ်န့ၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၉) ခးဘၣ်ဝဲအဃိ က့ၤစီၢ်လီၤလၢ ကည့ၣ်ကၠိသဝီ တၢ်သိၣ်လိကၠိ ကရၢၢ်ပူၤန့ၣ်လီၤ.
တချုးသုးဟံးန့ၢ်ဆူၣ် တၢ်စိတၢ်ကမီၤ သုးကီၣ်ကးအသုးတဖၣ် ဟဲခးလီၤတၢ်လၢ ကဘီယူၤအခါ ဖဲမဟါတနံၤ (၄) နၣ်ရံၣ် အဆၢကတီၢ် သုးဟံးန့ၢ်ဆူၣ် တၢ်စိတၢ်ကမီၤ သုးကီၣ်ကးအသုးတဖၣ် အိၣ်ဝဲလၢ ဒိတါတကပၤ ဒီး ဟဲဃီၤဆူ ကၠီးစယ့း အဃိ ဘၣ်သဂၢၢ်ခးလိၥ်သးဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၉) န့ၣ်လီၤ. ဘၣ်သဂၢၢ်ခးလိၥ်သးဖဲ လ့ၤပ့ၣ်သဝီ ဒီး ပဲသီၣ်သဝီ အကဆူးတဘျီ န့ၣ်လီၤ. တၢ်ဘၣ်သဂၢၢ်ခးလိၥ်သးအပူၤ သုးဟံးန့ၢ်ဆူၣ်တၢ်စိတၢ်ကမီၤ သုးကီၣ်ကးအသုး ဘၣ်ဒိသံစရီ တသ့ၣ်ညါဘၣ်န့ၣ်လီၤ. မ့မ့ၢ်သုးရ့ၣ် (၉) တခီ တၢ်ဘၣ်ဒိဘၣ်ထံး တအိၣ်ဘၣ်န့ၣ်လီၤ. သဝီလၢအအိၣ်ဘူးဒီးတၢ်ဘၣ်သဂၢၢ်ခးလိၥ်သးသ့ၣ်တဖၣ် လၢအမ့ၢ် ပဲသီၣ်သဝီ, လ့ၤပ့ၣ်သဝီ, ကၠီးစယ့းသဝီ, သီၣ်ဘူးသဝီ, ၀့ၢ်ဒီခိၣ်သဝီ ဒီး တီကၠီၣ်ပီးသဝီ သ့ၣ်တဖၣ်အံၤ ဘၣ်သုးကွံၥ်ကဒီးအသး န့ၣ်လီၤ.