ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ လၢ (၁၅) သီ အကတီၢ်ပူၤ တၢ်ဒုးကဲထီၣ်ဝဲ (၆၉) ဘျီ

၂၀၂၃ နံၣ်, လါယနူၤအါရံၤ (၂၀) သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) တၢ်ပၢဟီၣ်ကဝီၤပူၤ စးထီၣ် ၂၀၂၃ နံၣ် လါယနူၤအါရံၤ (၁) သီအနံၤ တုၤလါယနူၤအါရံၤ (၁၅) သီအနံၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၃) စုဒုၣ်တီၤဖီလၥ် သုးရ့ၣ် (၈), သုးရ့ၣ် (၉), ဂၢၤသးသုးရ့ၣ် (၃) ဒီး (Federal Wings Drone) သ့ၣ်တဖၣ် ဘၣ်သဂၢၢ်ခးလိၥ်သးဒီး သုးမီၤစိရိၤအသုး ကိးမုၢ်နံၤဒဲးန့ၣ်လီၤ. လၢ (၁၅) သီအကတီၢ်ပူၤ ဟီၣ်ခိၣ်မဲၥ်ဖံးခိၣ် တၢ်ဒုးကဲထီၣ်ဝဲ ခဲလၢၥ် (၅၅) ဘျီ ဒီး (Federal Wings Drone) ကလံၤကျါတၢ်ဒုးကဲထီၣ်ဝဲ ခဲလၢၥ် (၁၄) ဘျီန့ၣ်လီၤ. သုးမီၤစိရိၤအသုး သံဝဲ (၄၇) ဂၤအကျါ ပၣ်ဃုၥ်ဒီး သုးရ့ၣ်ခိၣ် (၂) တဂၤ ဒီး ဘၣ်ဒိဝဲ (၁၉) ဂၤန့ၣ်လီၤ. သုးမီၤစိရိၤအသုး လၢအသံဒီးဘၣ်ဒိလၢ ပမၤလီၤတံၢ် အနီၣ်ဂံၢ်နီၣ်ဒွး တန့ၢ်ဘၣ်သ့ၣ်တဖၣ် အိၣ်ဒံးဝဲအါမးန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ တကပၤ ဟ့ၣ်လီၤအသးသမူလၢ ထံကီၢ်ဒီးကလုၥ်ဂီၢ် (၂) ဂၤ ဒီး ဘၣ်ဒိဝဲ (၂) ဂၤန့ၣ်လီၤ. လၢ (၁၅) သီအကတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၃) စုဒုၣ်တီၤဖီလၥ် သုးရ့ၣ် (၈), သုးရ့ၣ် (၉), ဂၢၤသးသုးရ့ၣ် (၃) ဒီး (Federal Wings Drone) သ့ၣ်တဖၣ် မၤဟးဂီၤကွံၥ်ဝဲ သုးမီၤစိရိၤအသုး သိလ့ၣ်ခဲလၢၥ် အိၣ်ဝဲ (၂၁) ခိၣ်န့ၣ်လီၤ.
ခီဖျိလၢ တၢ်ဒုးကဲထီၣ်ဝဲ ကိးမုၢ်နံၤဒဲး ဒီး သုးမီၤစိရိၤအသုးသ့ၣ်တဖၣ် ခးလီၤဝဲကျိဖးဒိၣ်လၢ ကမျၢၢ်ဖိအဒူသဝီ တၢ်ဖံးအီၣ်မၤအီၣ်လီၢ်ကျဲအဃိ လၢၢ်ဒိၣ်ကီၢ်ဆၣ်, မူကီၢ်ဆၣ် ဟီၣ်ကဝီၤပူၤ ကမျၢၢ်ဖိ (၅၀၀၀) ဘျဲၣ် ဘၣ်ဃ့ၢ်အိၣ်ခူသူၣ်ဝဲလၢ တၢ်ပူၤဖျဲးအလီၢ် ဒီး ကမျၢၢ်ဖိ ပိၥ်မုၣ်တဂၤစ့ၢ်ကီး ဘၣ်ဒိဝဲလၢ သုးမီၤစိရိၤအသုးတဖၣ် ခးလီၤကျိဖးဒိၣ် အဃိန့ၣ်လီၤ.