လါမ့ၤ ၂၀ သီ, ၂၀၂၂ နံၣ်, ခ့ၣ်အဲၣ်ယူၣ်-လီၢ်ခၢၣ်သး
သုးမီၤစိရိၤအသုး ခလရ-၃၂ ဒီး ခမရ-၅၅၉ လၢအအိၣ်ဆီလီၤအသးဖဲ ဘ့ၣ်ဘီဘိ သုးကလၢၤတဖၣ် ခးနါစိၤဝဲ ကျိဖးဒိၣ်, ကျိဖိ ဆူသဝီအိၣ်ဘူးတဖၣ်အပူၤ တလီၢ်လီၢ်န့ၣ်လီၤ. တကးဘၣ် ထံဖိကီၢ်ဖိကမျၢၢ် ဟးထီၣ်ဟးလီၤမ့ၢ်ဘူးဒီး အဝဲသ့ၣ်အသုးကလၢၤန့ၣ် ခးပျံၤခးဖုးဝဲဒီးကျိတဖၣ် ထီဘိန့ၣ်လီၤ. ခီဖျိလၢ ခးနါစိၤကျိဒ်အံၤအဃိ ဘၣ်ဒိဝဲ ထံဖိကီၢ်ဖိ တကးဘၣ် ဘးသံဝဲ ထံဖိကီၢ်ဖိ အိၣ်ဝဲဒၣ်စ့ၢ်ကီးန့ၣ်လီၤ. လၢတၢ်န့ၣ်အဃိ ထံဖိကီၢ်ဖိလၢ အအိၣ်ဘူးဖဲ သုးကလၢၤအဃၢၤတဖၣ် ထီဘိဘၣ်အိၣ်မူဝဲလၢ တၢ်ပျံၤတၢ်ဖုး, တၢ်ဘၣ်ယိၢ်ဘၣ်ဘှီ အပူၤန့ၣ်လီၤ. ခီဖျိလၢတၢ်ဂ့ၢ်ဒ်အံၤအဃိ ဒူဖိသဝီဖိတဖၣ် ပၥ်ဖျါထီၣ်ဝဲ တၢ်ဂ့ၢ်ကဲထီၣ်သးတဖၣ်အံၤဆူ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) အအိၣ် ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) တခီ ဒ်အမူဒါအိၣ်အသိး ရဲၣ်ကျဲၤလီၤဝဲလၢ ကထီၣ်ဟံးန့ၢ်က့ၤ သုးကလၢၤအံၤန့ၣ်လီၤ.

လၢတၢ်ကထီၣ်ဟံးန့ၢ်ကွံၥ် သ့ၣ်ဘီဘိ သုးမီၤစိရိၤအသုးကလၢၤတဖျၢၣ်အံၤအဂီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် စုတီၤဖီလၥ် သုးက့နီၣ်ဂံၢ် (၆), သုးရ့ၣ် (၂၇), သုးဒ့ (၂) သုးဒ့ခိၣ်-၂ သုးခိၣ်ဒးဘီ (ခဲအံၤ Cobra သုးကျိၤခိၣ်) တီခိၣ်ရိၣ်မဲဝဲ ဒီး ပၥ်ဖှိၣ်ထီၣ်အသးဒီး ကညီဒီကလုၥ်ဂၢၤသးကရၢ (KNDO) သုးခိၣ် အဲၣ်စ့ဝါ တီခိၣ်ရိၣ်မဲ သုးတဖၣ် ဒီး ထီၣ်ဒုးဝဲ သုးကလၢၤအံၤန့ၣ်လီၤ. ဖဲလါမ့ၤ ၁၇ သီ, ၂၀၂၂ နံၣ် ဟါခီ ၉ နၣ်ရံၣ် တုၤ ၁၂ နၣ်ရံၣ်န့ၣ် တၢ်ခးနုၥ်ဝဲကျိဖးဒိၣ် ဆူသုးကလၢၤပူၤ ဒီး ဖဲ ၁၈ သီ ဂီၤခီ ၉ နၣ်ရံၣ် အဆၢကတီၢ် တၢ်စးထီၣ် ထီၣ်ဒုးဝဲ သုးကလၢၤ ဒီး မုၢ်ဟါလီၤ ၄ နၣ်ရံၣ် အဆၢကတီၢ် တၢ်မၤန့ၢ်ကွံၥ်ဝဲ သ့ၣ်ဘီဘိ သုးမီၤစိရိၤအသုးကလၢၤအံၤန့ၣ်လီၤ.

ဖဲတၢ်ထီၣ်ရှဲပျီကွံၥ် သ့ၣ်ဘီဘိ သုးကလၢၤအဆၢကတီၢ် တၢ်ထံၣ်န့ၢ်ဝဲ သုးမီၤစိရိၤအသုး အစိၣ် ၅ စိၣ် လၢအမ့ၢ်ဝဲ သုးရ့ၣ်ခိၣ် ၂ ပတီၢ်၁ ဂၤ, သုးဒ့ခိၣ်ပတီၢ် ၁ ဂၤ ဒီး သုးဖိ ၃ ဂၤန့ၣ်လီၤ. ဖဲတၢ်ထီၣ်ဒုးဝဲ သုးမီၤစိရိၤအသုးကလၢၤ အဆၢကတီၢ် တၢ်ဖီၣ်န့ၢ်ဝဲ သုးမီၤစိရိၤအသုးစကီၤ ၂ ဂၤ, သုးစကီၤဖိ ၁ ဂၤ, သုးစကီၤပြံ ၁ ဂၤ ဒီး သုးဖိ ၂ ဂၤန့ၣ်လီၤ. မုၢ်ဆ့ၣ်ထီၣ်တနံၤ တၢ်ဖီၣ်န့ၢ်ကဒီးဝဲ သုးမီၤစိရိၤအသုးဖိ ၁ ဂၤန့ၣ်လီၤ. လၢတၢ်ဒုးတဘျီအံၤအပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်-KNLA, ကညီဒီကလုၥ်ဂၤသးကရၢ-KNDO ဒီး သုးပၥ်ဖှိၣ်ကရူၢ်တဖၣ် ဟ့ၣ်လီၤကွံၥ်သးလၢ ထံကီၢ်ဒီးကလုၥ်ဂီၢ် ၃ ဂၤ ဒီး ဘၣ်ဒိဝဲ ၄ ဂၤန့ၣ်လီၤ.
တၢ်ထီၣ်ဒုးသုးမီၤစိရိၤအသုးကလၢၤ အဆၢကတီၢ် တၢ်မၤန့ၢ်ဝဲ (၈၈ မးမး) ၁ ခိၣ်, (၆၀ မးမး) ၂ ခိၣ်, (RPG) ၁ ခိၣ်, (MG-3) ၁ ခိၣ်, (MA-2) ၄ ခိၣ်, (MA-3) ၂ ခိၣ်, (MA-5) ၁ ခိၣ် ဒီး ကျိခံပှၥ်သၣ် ဃုၥ်ဒီးသုးတၢ်ပီးတၢ်လီ အကလုၥ်ကလုၥ်န့ၣ်လီၤ. ဖဲတၢ်ထီၣ်ဒုးဝဲ သုးမီၤစိရိၤအသုးကလၢၤ ဒီတကတီၢ်န့ၣ် ပယီၤသုးအဘီယူၤ ဟဲဆှၣ်ကွၢ်တၢ်ဒီး ခးလီၤဝဲကျိဖးဒိၣ် တဖၣ်န့ၣ်လီၤ. တၢ်ထီၣ်ဒုးသုးမီၤစိရိၤအသုးကလၢၤ ဒီတကတီၢ်န့ၣ် သုးမီၤစိရိၤအသုးကဘီယူၤ ဟဲခးလီၤတၢ် အိၣ်ဝဲ ၃၅ ဘျီန့ၣ်လီၤ.
တၢ်ထီၣ်ဒုးမၤန့ၢ် သုးမီၤစိရိၤအသုးကလၢၤ ဝံၤအလီၢ်ခံ ဒ်သိးဒူဖိသဝီဖိတဖၣ် အိၣ်ဆိး, ဖံးအီၣ်မၤအီၣ် ကသဘျ့ ဒီး တၢ်ဘၣ်ယိၢ်ဘၣ်ဘှီ သုတအိၣ်တဂ့ၤအဂီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးပၥ်ဖှိၣ်ကရူၢ်တဖၣ် မၤဝဲတၢ်ရှဲလဲကွံၥ် ဟီၣ်ကဝီၤန့ၣ်လီၤ.