ကညီဒီကလုၥ် တၢ်ကူၣ်လိၥ်တၢၣ်ပီၣ်သကိး တၢ်အိၣ်ဖှိၣ် ကမံးတံၥ်
ကညီထံရူၢ်ကီၢ်သဲး မူးကဲထီၣ်လိၥ်ထီၣ် ကမံးတံၥ်
ကညီဒီကလုၥ် တၢ်ကူၣ်လိၥ်တၢၣ်ပီၣ်သကိး အမူးကဲထီၣ်လိၣ်ထီၣ် ကမံးတံၥ်



ဖဲလါနိၣ်ဝ့ဘၢၣ် ၂၁ သီ ၂၀၁၆ နံၣ် ကညီဖီၣ်စုကဝဲၤ ၃ ဖု လၢအမ့ၢ် (KNU, KNLA-PC, DKBA) တဖၣ် အိၣ်ဖှိၣ်သကိးဝဲ ဖဲ လ့က့ၣ်ကီၣ် တၢ်လီၢ် န့ၣ်လီၤ. ကညီဖီၣ်စုကဝဲၤကရၢ ၃ ဖုအံၤ ပၥ်ဖှိၣ်ထီၣ်အသး ဒီး ကရၢကရိထီၣ်ဝဲဒၣ် (Karen National Dialogue Convening Committee) ကညီဒီကလုၥ် တၢ်ကူၣ်လိၥ် တၢၣ်ပီၣ်သကိး တၢ်အိၣ်ဖှိၣ် ကမံးတံၥ်တဖု ဒ်သိး ကဆီၣ်ထွဲမၤစၢၤ ဟ့ၣ်ဂံၢ်ဟ့ၣ်ဘါ ကညီဒီကလုၥ် တၢ်ကူၣ်လိၥ်တၢ်အိၣ်ဖှိၣ် တဖၣ် (Karen National Dialogue) လၢ တၢ်မၤအီၤလၢ ကညီအိၣ်တၢ်လီၢ် ဟီၣ်ကဝီၤတဖၣ် အဂီၢ်န့ၣ်လီၤ.

တၢ်ကရၢကရိထီၣ် ကညီဒီကလုၥ် တၢ်ကူၣ်လိၥ်တၢၣ်ပီၣ်သကိး တၢ်အိၣ်ဖှိၣ် ကမံးတံၥ် ဝံၤအလီၢ်ခံ ကမံးတံၥ်အံၤ ကရၢကရိထီၣ်ကဒီးဝဲ တၢ်ကွၢ်စူၣ်ကယၥ် ကမံးတံၥ် (Steering Committee), မူးကဲထီၣ်လိၣ်ထီၣ် ကမံးတံၥ် (Convening Committee) ဒီး ကမံးအဒ့ဖိ အဂၤတဖၣ် (Sub-Committee), တၢ်တီခိၣ်ရိၣ်မဲ ကရူၢ် (Management Team) သ့ၣ်တဖၣ် လၢကတီခိၣ်ရိၣ်မဲ ဒီး မၤဖျါထီၣ် ကမံးတံၥ်အံၤ အတၢ်ဖံးတၢ်မၤ အဂီၢ်န့ၣ်လီၤ. ကမံးတံၥ်အံၤအပူၤ ထံရူၢ်ကီၢ်သဲး ကရၢခိၣ်နၢ်ခၢၣ်စးတဖၣ် (Political Parties), လီၢ်ကဝီၤ ကညီကရၢ ခိၣ်နၢ်ခၢၣ်စးတဖၣ် (KCSOs), ကညီတၢ်ဃူတၢ်ဖိးဒီး တၢ်မုၥ်တၢ်ခုၣ် ကမံးတံၥ် ခိၣ်နၢ်ခၢၣ်စးတဖၣ် (Karen Unity and Peace Committee), ပိၥ်မုၣ်ပိၥ်မၢၤတဖၣ် ဒီး ပှၤသ့ပှၤဘၣ်တဖၣ် (Technical Team) ပၥ်ဃုၥ်ဝဲဒၣ်န့ၣ်လီၤ. ကမံးတံၥ်အံၤ အတၢ်ပညိၣ်မ့ၢ်ဒ်သိး ကဂုၥ်ကျဲးစၢးလၢ ကညီဖိလၢ တၢ်လီၢ်ကိးတီၤဒဲး ကအိၣ်ဒီးတၢ်ဃူတၢ်ဖိး ဒီး ကပၣ်ဃုၥ်ပၣ်ဂီၢ်လၢ တၢ်တဲသကိး တၢ်မုၥ်တၢ်ခုၣ် အတၢ်လဲၤကျဲ အဂီၢ်န့ၣ်လီၤ.



ကမံးတံၥ်အံၤ အတၢ်ဖံးတၢ်မၤတဖၣ် မ့ၢ်ဝဲ

(၁) ကတဲသကိး ဂံၢ်ထီၣ်ထံးသနူတဖၣ် ဒီး တၢ်ဘျၢတဖၣ် လၢအဘၣ်ဃးဒီး ဂ့ၢ်ဝီ (Sectors) ၄ ခါ ဒ်အမ့ၢ် ထံရူၢ်ကီၢ်သဲးဂ့ၢ်ဝီ (Political Sector), မုၢ်ကျိၤဝဲၤကွၥ် ဂ့ၢ်ဝီ (Economic Sector), ပှၤဂ့ၢ်ဝီခွဲးယၥ် ဂ့ၢ်ဝီ (Social Sector), ဟီၣ်ခိၣ်ကပံၥ် ဒီး ဟီၣ်လၥ်တၢ်ထူးတၢ်တီၤ ဂ့ၢ်ဝီ (Land and Natural Resources sector) တဖၣ် လၢအဘၣ်လိၥ်ဖိးမံဒီး ကညီဖိ အတၢ်အတၢ်မိၢ်န့ၢ်သးလီ န့ၣ်လီၤ. လၢတၢ်တဲသကိးအဖီခိၣ် ကဘၣ်ဟံးန့ၢ် တၢ်ထံၣ်တၢ်ဆိကမိၣ်လၢ အဒ်သိးလိၥ်သးတဖၣ် ခီဖျိ ကညီကလုၥ်ခၢၣ်စး လၢအဟဲထီၣ် လၢဟီၣ်ကဝီၤလီၤဆီလိၥ်သးတဖၣ် အတၢ်ထံၣ် အတၢ်ပၥ်ဖျါအဖီၣ်ခိၣ် ဝံၤကဘၣ်ဒုးကဲထီၣ်လၢ လံၥ်တဘ့ၣ်ဒီး ကဘၣ်တီၣ်ထီၣ်ဝဲဒၣ်ဆူ Union Peace Dialogue Joint Committee UPDJC-EAOs (ကီၢ်စၢဖှိၣ် တၢ်တဲသကိး တၢ်မုၥ်တၢ်ခုၣ် ကမံးတံၥ် သဃဲၤ - ကလုၥ်ဒူၣ်ဖီၣ်စုကဝဲၤကရူၢ်) အအိၣ်ဒီး ဆူကီၢ်စၢဖှိၣ်ပတီၢ် တၢ်ကူၣ်လိၥ်တၢၣ်ပီၣ်သကိး တၢ်မုၥ်တၢ်ခုၣ်အမူး (Union Peace Conference UPC) န့ၣ်လီၤ.
(၂) ဒ်သိးကမၤသ့ထီၣ်ဘၣ်ထီၣ်ဒီး ဟ့ၣ်တၢ်သ့ၣ်ညါနၢ်ပၢၢ် ဘၣ်ဃး ဂံၢ်ခီၣ်ထံး တၢ်ဘျၢခိၣ်သ့ၣ်ဒီး သနူဖီလ်စံၣ် (Policy) တဖၣ် လၢတၢ်ကသူၣ်ထီၣ် ဒံၣ်မိၣ်ကရံၣ်စံၣ် ဖဲၣ်ဒရၢၣ်ကီၢ်စၢဖှိၣ် ခါဆူညါအဂီၢ်
(၃) ဒ်သိး ကတီခိၣ်ရိၣ်မဲဒီး ရဲၣ်ကျဲၤဒုးအိၣ်ထီၣ် တၢ်ထံၣ်လိၥ်တၢၣ်ပီၣ်သကိးအမူးတဖၣ် လၢအဘၣ်ဃးဒီး တၢ်မုၥ်တၢ်ခုၣ်တၢ်လဲၤကျဲ ဒီး ထံဖိကီၢ်ဖိကမျၢၢ်တဖၣ် ကပၣ်ဃုၥ်ပၣ်ဂီၢ်အါထီၣ်လၢ တၢ်ဂဲၤလိၥ် ထံလီၢ်ကီၢ်ပူၤ တၢ်မုၥ်တၢ်ခုၣ်အဂီၢ်န့ၣ်လီၤ.



ကမံးတံၥ် အတၢ်သူၣ်ထီၣ်ဆီလီၤသး

KNDCC Steering Committee ကမံးတံၥ်အံၤ တၢ်ကရၢကရိထီၣ်အီၤဒီး ကမံးတံၥ်ခဲလၢၥ် အိၣ်ဝဲ ၉ ဂၤန့ၣ်လီၤ. လၢကညီဖီၣ်စုကဝဲၤကရူၢ် (KEAOs) တဖၣ် ခၢၣ်စး ၃ ဂၤ, ကညီထံရူၢ်ကီၢ်သဲးကရၢတဖၣ် (Karen Political Parties) ခၢၣ်စး ၄ ဂၤ, ကညီပှၤတ၀ၢ တၢ်ကရၢကရိတဖၣ် (KCSOs) ခၢၣ်စး ၁ ဂၤ, ဒီး ပိၥ်မုၣ်ခၢၣ်စး ၁ ဂၤ ပၣ်ဃုၥ်လၢ ကမံးတံၥ်ပူၤအံၤ န့ၣ်လီၤ. (Convening Committee) မူးတၢ်ကဲထီၣ်လိၣ်ထီၣ် ကမံးတံၥ် စ့ၢ်ကီး တၢ်ကရၢကရိထီၣ်အီၤဒီး ခိၣ်နၢ်ခၢၣ်စး ခဲလၢၥ် ၂၄ ဂၤ ပၣ်ဃုၥ်ဝဲလၢ ကမံးတံၥ်အံၤ အပူၤန့ၣ်လီၤ. ခိၣ်နၢ်ခၢၣ်စးတဖၣ်အကျါ ကညီဖီၣ်စုကဝဲၤ ခိၣ်နၢ်ခၢၣ်စး (KEAOs) ၉ ဂၤ, ကညီထံရူၢ်ကီၢ်သဲးကရူၢ်ကရၢ ခိၣ်နၢ်ခၢၣ်စး (Karen Political Parties) ၄ ဂၤ, ကညီလီၢ်ကဝီၤကရၢသဘျ့ ခိၣ်နၢ်ခၢၣ်စး (KCSOs) ၁ ဂၤ, ကညီဒီကလုၥ် တၢ်ဃူတၢ်ဖိးဒီး တၢ်မုၥ်တၢ်ခုၣ်ကရၢ ခိၣ်နၢ်ခၢၣ်စး (KUPC) ၁ ဂၤ ဒီး လီၢ်ကဝီၤ ၉ တီၤ ခိၣ်နၢ်ခၢၣ်စး ၉ ဂၤ ပၣ်ဃုၥ်ပၣ်ဂီၢ်လၢ ကမံးတံၥ်အံၤ အပူၤန့ၣ်လီၤ.



ကမံးတံၥ်အဒ့စ့ၢ်ကီး တၢ်ဒုးအိၣ်ထီၣ်အီၤန့ၣ်လီၤ. လၢကမံးတံၥ်အဒ့ (Sub-committee) အပူၤ တၢ်ဃုထၢထီၣ်ကမံးတံၥ်ဖိ ၉ ဂၤ လၢဟီၣ်ကဝီၤတဘ့ၣ်ဒၣ်ဝဲစုၥ်စုၥ် လၢကမၤကဲထီၣ်လိၣ်ထီၣ် (Karen National Dialogue Meetings) ကညီဒီကလုၥ် တၢ်ကူၣ်လိၥ်တၢၣ်ပီၣ်သကိး တၢ်အိၣ်ဖှိၣ် အဂီၢ်န့ၣ်လီၤ. ပှၤသ့ပှၤဘၣ်တဖၣ် မၤစၢၤဝဲဒၣ် တၢ်တီခိၣ်ရိၣ်မဲဒီး မၤစၢၤစ့ၢ်ကီး ကမံးတံၥ်တဖၣ် ဖဲတၢ်အိၣ်ဖှိၣ် အဆၢကတီၢ်န့ၣ်လီၤ.

ဟီၣ်ကဝီၤတဖၣ်

၁. ကီၢ်သူလ့ၤ ဟီၣ်ကဝီၤ
၂. ကီၢ်ပယီၤ ထးခီ
၃. ကရ့ၣ်နံၣ် ကီၢ်စဲၣ်
၄. တနီသရံး ကီၢ်ခီ
၅. အ့ၤရၤဝ့ၤတံၤ ကီၢ်ခီ
၆. တကူၣ် ကီၢ်ခီ
၇. ပကိ ကီၢ်ခီ
၈. တလၢၤ ကီၢ်စဲၣ်
၉. ကညီဟီၣ်ကဝီၤတဖၣ် န့ၣ်လီၤ.