လါမ့ၤ ၁၈ သီ ၂၀၂၂ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤ တၢ်တီခိၣ်ရိၣ်မဲဖီလၥ် တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤဝဲၤဒ့ ရဲၣ်ကျဲၤမၤဝဲ (FRT- Federal Refresher Training) တၢ်မၤလိ ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤ တၢ်လီၢ်တတီၤန့ၣ်လီၤ.

တၢ်မၤလိအံၤအပူၤ ကညီသးစၢ်လၢ ခ့ၣ်အဲၣ်ယူၣ်တၢ်ပၢဟီၣ်ကဝီၤပူၤတဖၣ်, ကလုၥ်ဒူၣ်အဂၤတဖၣ် ဃုၥ်ဒီး ပယီၤကလုၥ်ဒူၣ်သးစၢ်တဖၣ် ခဲလၢၥ် ၂၂ ဂၤဟဲထီၣ်ဝဲဒၣ်န့ၣ်လီၤ.

တၢ်မၤလိအံၤအပူၤ ပှၤလၢဟံးမူဒါ သိၣ်လိဟ့ၣ်ခီဟ့ၣ်နီၤတၢ်တဖၣ် မ့ၢ်ဝဲ ပဒိၣ်စီၤလးထိ, ပဒိၣ်စီၤပိပိၣ်ထူအီၣ်, ပဒိၣ်စီၤသမ့ၣ်ထိ ဒီး သရၣ်အဲၣ်ကတၢၢ် တဖၣ်န့ၣ်လီၤ. တၢ်ဂ့ၢ်ခိၣ်တီလၢတၢ်သိၣ်လိအီၤတဖၣ် မ့ၢ်ဝဲ ပဒိၣ်တၢ်ပၢတၢ်ပြးက့ၢ်ဂီၤ အကလုၥ်ကလုၥ်, ဒံၣ်မိၣ်ကရံၣ်စံၣ် စံးတၢ်န့ၣ်မ့ၢ်တၢ်မနုၤလဲၣ်, ဘၣ်မနုၤအဃိ တၢ်ဘၣ်စူးကါသူဝဲ ဒံၣ်မိၣ်ကရံၣ်စံၣ်သနူအံၤလဲၣ်, က့ၢ်ဂီၤပနီၣ်ဂ့ၤလၢ တၢ်စူးကါအီၤလၢ ဒံၣ်မိၣ်ကရံၣ်စံၣ်သနူ တၢ်ပၢတၢ်ပြးတဖၣ်, ဖဲၣ်ဒရၢၣ်သနူ, (Comparative politics( different between the concept of Federation, Confederation and Independence), ကီၢ်ပယီၤတၢ်စံၣ်စိၤတဲစိၤ, ကလုၥ်ဒူၣ်တၢ်ပၢၢ်ဆၢ အတၢ်စံၣ်စိၤတဲစိၤ, ခ့ၣ်အဲၣ်ယူၣ်ကျဲသနူ ဒီး တၢ်မၤကျဲ, ဃုၥ်ဒီး ကတီၢ်ခါထံရူၢ်ကီၢ်သဲးတၢ်အိၣ်သး တဖၣ်တၢ်သိၣ်လိတၢၣ်ပီၣ်တၢၣ်ပီသကိးအီၤန့ၣ်လီၤ.

ပဒိၣ်စီၤသမ့ၣ်ထိ သိၣ်လိဟ့ၣ်ခီဟ့ၣ်နီၤဝဲ ကီၢ်ပယီၤတၢ်စံၣ်စိၤတဲစိၤ ဒီး ကလုၥ်ဒူၣ်တၢ်ပၢၢ်ဆၢကရၢတဖၣ် အဂ့ၢ်အကျိၤ, ပဒိၣ်စီၤပိၣ်ပိၣ်ထူအီၣ် သိၣ်လိဟ့ၣ်ခီဟ့ၣ်နီၤဝဲ ခ့ၣ်အဲၣ်ယူၣ် ဂံၢ်ခီၣ်ထံးတၢ်ဘျၢခိၣ်သ့ၣ် ဒီး တၢ်မၤကျဲသနူ,  ဒီး ပဒိၣ်စီၤလးထိ သိၣ်လိဟ့ၣ်ခီဟ့ၣ်နီၤဝဲ တကီၢ်ခါထံရူၢ်ကီၢ်သဲးတၢ်အိၣ်သး အဂ့ၢ်အကျိၤတဖၣ်န့ၣ်လီၤ.

တၢ်မၤလိအံၤ အတၢ်ပညိၣ်မ့ၢ်ဒ်သိး သူၣ်ဘီၣ်သးစၢ်တဖၣ် ကသ့ၣ်ညါနၢ်ပၢၢ် ကီၢ်ပယီၤအထံရူၢ်ကီၢ်သဲးတၢ်အိၣ်သး ဒီး ကလုၥ်ဒူတဖၣ် အတၢ်ဂုၥ်ကျဲးစၢးလၢ ထံရူၢ်ကီၢ်သဲးဂ့ၢ်ဝီ, တၢ်ပညိၣ်ကွၢ်စိ ဒီး တၢ်အိၣ်ဆၢထၢၣ်တဖၣ်, ဒီး ကသ့ၣ်ညါနၢ်ပၢၢ်စ့ၢ်ကီး တၢ်ကသူၣ်ထီၣ် ဖဲၣ်ဒရၢၣ်ဒံၣ်မိၣ်ကရံၣ်စံၣ် ထံကီၢ်အဂီၢ် ဂံၢ်ခီၣ်ထံးတၢ်လိၣ်တဖၣ် ဒီး ကျဲသနူတဖၣ် လၢအကြၢးဒီးပဟီၣ်ကဝီၤ တၢ်အိၣ်သးတဖၣ်အဂီၢ်န့ၣ်လီၤ.