တၢ်ဟ့ၣ်လီၤကၠိဖိဖျိထီၣ်လံၥ်အုၣ်သးတၢ်လၤကပီၤ ဖဲထိၣ်လွံၢ်၀ါတီၤထီကၠိဒီး ထိၣ်လွံၢ်၀ါတီၤဒိၣ်တုၥ်ကၠိ(Junior College) ကၠိပျၢ် တၢ်ရဲၣ်တၢ်ကျဲၤအပူၤ .

တၢ်ဟ့ၣ်လီၤကၠိဖိဖျိထီၣ်လံၥ်အုၣ်သးတၢ်လၤကပီၤ ဖဲထိၣ်လွံၢ်၀ါတီၤထီကၠိဒီး ထိၣ်လွံၢ်၀ါတီၤဒိၣ်တုၥ်ကၠိ(Junior College) ကၠိပျၢ် တၢ်ရဲၣ်တၢ်ကျဲၤအပူၤ .

လါအ့ဖြ့ၣ်(၉)သီ, ၂၀၂၅ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, တီအူကီၢ်ရ့ၣ်အပူၤ တၢ်ရဲၣ်ကျဲၤမၤ၀ဲ ထိၣ်လွံၢ်၀ါတီၤထီကၠိ ကၠိပျၢ်တၢ်ရဲၣ်တၢ်ကျဲၤ ဒီး တၢ်ဟ့ၣ်လၤကပီၤ ကၠိဖိဖျိထီၣ်ပဒိၣ်တၢ်ဒိးစဲးလံၥ်အုၣ်သး ဃုၥ်ဒီး ထိၣ်လွံၢ်၀ါတီၤဒိၣ်တုၥ်ကၠိ(Junior College) (၅)၀ီတ၀ီ ဒီး (၆)၀ီတ၀ီ တၢ်ဟ့ၣ်လၤကပီၤ ဖျိကၠိလံၥ်အုၣ်သး တၢ်ရဲၣ်တၢ်ကျဲၤန့ၣ်လီၤ.

တၢ်ရဲၣ်တၢ်ကျဲၤဘၣ်တၢ်မၤအီၤဖဲ (၂၀၂၅)နံၣ်, လါအ့ဖြ့ၣ်(၇)သီ ဒီးလၢတၢ်ရဲၣ်တၢ်ကျဲၤအပူၤ လီၢ်ခၢၣ်သး-ကညီသးစၢ်ကရၢခိၣ်(KYO)/ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထီဘိကမံးတံၥ် ပဒိၣ်စီၤလၢၢ်နၢၣ်, တီအူ ကီၢ်ရ့ၣ်နဲၣ်ရွဲၣ် ပဒိၣ်စီၤအဲၣ်၀ါ, ကီၢ်ရ့ၣ်နဲၣ်ရွဲၣ်သဃဲၤ ပဒိၣ်စီၤသီတူၢ်ထူ, ကီၢ်ရ့ၣ်ကူၣ်သ့ဆဲးလၤ၀ဲၤခိၣ် ပဒိၣ်စီၤဟဲစိ, သုးက့နီၣ်ဂံၢ်(၂) ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် ဒုးယၤခိၣ် စီၤပီလူး, ထီတထူၣ်ကီၢ်ဆၣ်နဲၣ်ရွဲၣ် ပဒိၣ်နီၢ်စလဲ, ဒီၣ်ဖးခိၣ်ကီၢ်ဆၣ်နဲၣ်ရွဲၣ် ပဒိၣ်နီၢ်စ့ဖီ, ထိၣ်လွံၢ်၀ါကၠိခိၣ် သရၣ်မုၣ်နီၢ်ဟ့ၣ်သံၣ်ကၠူ တဖၣ် ကတိၤဟ့ၣ်ဂံၢ်ဟ့ၣ်ဘါဒီး ဟံးစုနဲၣ်ကျဲ၀ဲ ကၠိဖိဖျိထီၣ်တဖၣ်န့ၣ်လီၤ.

လၢတၢ်ရဲၣ်တၢ်ကျဲၤအပူၤ (၂၀၂၄-၂၀၂၅)နံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကညီကူၣ်သ့ဆဲးလၤ၀ဲၤကျိၤ ဟ့ၣ်လၤကပီၤဖျိကၠိလံၥ်အုၣ်သး လၢကၠိဖိ(၉)တီၤ (Grade-9) ဒီး ကၠိဖိ(၁၂)တီၤ(Grade-12)ဖျိထီၣ်၀ဲ ကီၢ်သူလ့ၤပဒိၣ်တၢ်ဒိးစဲး သ့ၣ်တဖၣ်န့ၣ်လီၤ.

ကီၢ်သူ့လ့ၤပဒိၣ်တၢ်ဒိးစဲးတၢ်ဟ့ၣ်လၤကပီၤ ကၠိဖိ(၁၀)ဂၤပှၤဖျိစိတၢ်လၤကပီၤအဖီခိၣ် ထိၣ်လွံၢ်၀ါကၠိ ကၠိဖိ(၉)တီၤ(Grade-9) ပၥ်၀ဲ(၄)ဂၤ လၢပှၤ(၁၀)ဂၤအကျါ ပှၤ(၂)ဂၤတဂၤ, ပှၤ(၃)ဂၤတဂၤ, ပှၤ(၆)ဂၤတဂၤဒီး ပှၤ(၉)ဂၤတဂၤန့ၣ်လီၤ. တကတီၢ်ဃီ လၢကၠိဖိ(၁၂)တီၤ(Grade-12) ကၠိဖိ(၁၀)ဂၤ ပှၤဖျိစိတၢ်ဟ့ၣ်လၤကပီၤန့ၣ် ထိၣ်လွံၢ်၀ါကၠိ မၤန့ၢ်၀ဲ ပှၤ(၂)ဂၤတဂၤ, ပှၤ(၃)ဂၤတဂၤ, ပှၤလွံၢ်ဂၤတဂၤ, ပှၤ(၈)ဂၤတဂၤဒီး ပှၤ(၁၀)ဂၤတဂၤ န့ၣ်လီၤ.

လၢန့ၢ်အမဲၥ်ညါ ထိၣ်လွံၢ်၀ါကၠိ တီၤဒိၣ်တုၥ်(Junior College) ၂၀၂၂-၂၀၂၄ နံၣ်, (၅)၀ီတ၀ီတၢ်မၤလိနံၣ်န့ၣ် ကၠိဖိပိၥ်ခွါအိၣ်၀ဲ(၃၃)ဂၤ, ကၠိဖိပိၥ်မုၣ်အိၣ်၀ဲ(၅၂)ဂၤ ဒီး ၂၀၂၃-၂၀၂၅ တၢ်မၤလိနံၣ်န့ၣ် ကၠိဖိပိၥ်ခွါအိၣ်၀ဲ(၂၄)ဂၤ, ကၠိဖိပိၥ်မုၣ်အိၣ်၀ဲ(၄၂)ဂၤ ကၠိဖိခဲလၢၥ်ပၥ်ဖှိၣ်အိၣ်၀ဲ(၁၅၁)ဂၤ ဖျိထီၣ်၀ဲဂ့ၤဂ့ၤဘၣ်ဘၣ်ဒီးမၤန့ၢ်ဘၣ်၀ဲ တၢ်ဟ့ၣ် လၤကပီၤဖျိကၠိ လံၥ်အုၣ်သးန့ၣ်လီၤ.

လၢတၢ်ပျၢ်ကၠိတၢ်ရဲၣ်တၢ်ကျဲၤတဘျီအံၤန့ၣ် လီၢ်ခၢၣ်သး-ကညီကူၣ်သ့ဆဲးလၤ၀ဲၤကျိၤ (Institute of High Education-IHE)မူဒါခိၣ် သရၣ်မုၣ်နီၢ်ဖီမူ ရဲၣ်ကျဲၤမၤ၀ဲ ဖျိကၠိတၢ်ရဲၣ်တၢ်ကျဲၤတဘျီအံၤလၢ တၢ်တိၥ်ထူ ‘’Resilience and triumph in the face of Adversity “ ဒီး တၢ်ပျၢ်ကၠိတၢ်ရဲၣ်တၢ်ကျဲၤဘျီ၀ဲအံၤ ကၠိသရၣ်/သရၣ်မုၣ်, ကၠိကမံးတံၥ်, ကၠိဖိမိၢ်ပၢ်ဒီးဟီၣ်က၀ီၤဒူဖိသ၀ီဖိ ဟဲထီၣ်၀ဲ ပှၤဂံၢ်ဘါခဲလၢၥ်(၁၀၀၀)ဂၤ ဘျဲၣ်န့ၣ်လီၤ.