ခ့ၣ်အဲၣ်ယူၣ်-လီၢ်ခၢၣ်သး
၂၀၂၂ နံၣ်, လါမ့ၤ ၂၈ သီ

လီၢ်ခၢၣ်သး တၢ်ကရၢကရိ ဒီး တၢ်ဘိးဘၣ်ရၤလီၤဝဲၤကျိၤ ဖီလၥ် တၢ်ဟ့ၣ်တၢ်သ့ၣ်ညါ ဒီး တၢ်သူၣ်ထီၣ်ဆီလီၤဝဲၤဒ့ တီခိၣ်ရိၣ်မဲ ဒီး ရဲၣ်ကျဲၤမၤဝဲ တၢ်ဟ့ၣ်ခီဟ့ၣ်နီၤလိၥ်သး တကီၢ်ခါ တၢ်အိၣ်သး တၢ်တၢၣ်ပီၣ်တဲသကိးတဘျီ ဖဲ ၂၀၂၂ နံၣ်, လါမ့ၤ ၂၇ သီ အနံၤန့ၣ်လီၤ. တၢ်တၢၣ်ပီၣ်တဲသကိးအမူးအံၤ ဘၣ်တၢ်မၤအီၤဖဲ ကညီကူၣ်သ့ဆဲးလၤဝဲၤကျိၤ လီၢ်ခၢၣ်သး အဘျီဒိၣ်ပူၤန့ၣ်လီၤ.

ခ့ၣ်အဲၣ်ယူၣ် လီၢ်ခၢၣ်သးခိၣ်နၢ်တဖၣ် လၢအမ့ၢ် ပဒိၣ်စီၤသမ့ၣ်ထိ, ပဒိၣ်စီၤလးထိ, ပဒိၣ်စီၤကျၢၤစ့တဖၣ် ကတိၤရှဲပၠးဝဲ တကီၢ်ခါ ထံရူၢ်ကီၢ်သဲးတၢ်အိၣ်သး, သုးဂ့ၢ်ဝီတၢ်အိၣ်သး, ပၢပြးတၢ်အိၣ်သး, တၢ်ကရၢကရိတၢ်မၤ တၢ်အိၣ်သး ဒီး ထံရူၢ်ကီၢ်သဲးတၢ်အိၣ်သး တဖၣ်န့ၣ်လီၤ.

တၢ်တၢၣ်ပီၣ်တဲသကိးအမူးအံၤ လီၢ်ခၢၣ်သးပတီၢ် ဝဲၤကျိၤပှၤဘၣ်မူဘၣ်ဒါတဖၣ်, သုးဝဲၤလီၢ်ခိၣ်သ့ၣ် သုးခိၣ်သုးနၢ်တဖၣ်, ဖၣ်အၣ်ကီၢ်ရ့ၣ် ခိၣ်နၢ်တဖၣ်, သုးက့ ၇ သုးခိၣ်သုးနၢ်တဖၣ်, ကညီပှၤဂ့ၢ်ဝီ တၢ်ကရၢကရိ အပှၤဘၣ်မူဘၣ်ဒါတဖၣ် ဟဲထီၣ်ဝဲဒၣ်န့ၣ်လီၤ.

ဝဲၤကျိၤခၢၣ်စး လၢအဟဲထီၣ်တဖၣ်, တၢ်ကရၢကရိအခၢၣ်စးတဖၣ် စုၥ်စုၥ်ပၥ်ဖျါထီၣ်ဝဲ တၢ်ဖံးတၢ်မၤလၢ အမၤဝဲသ့ၣ်တဖၣ်မၤဝဲ န့ၣ်လီၤ. မ့မ့ၢ် ထံရူၢ်ကီၢ်သဲး တၢ်အိၣ်သးတဖၣ်တခီ ခ့ၣ်အဲၣ်ယူၣ် ခိၣ်နၢ်တဖၣ် ကတိၤရှဲပၠးဝဲ၀ံၤ တၢ်သံကွၢ်သံဒိးလၢ ခၢၣ်စးဟဲထီၣ်တဖၣ် သံကွၢ်ဝဲန့ၣ် ခိၣ်နၢ်တဖၣ် စံးဆၢက့ၤ အဝဲသ့ၣ်န့ၣ်လီၤ.

လၢတၢ်ကတိၤရှဲပၠးတဖၣ်အကျါ ခ့ၣ်အဲၣ်ယူၣ် ခိၣ်နၢ်တဖၣ် ကတိၤရှဲပၠးစ့ၢ်ကီးဝဲ ခ့ၣ်အဲၣ်ယူၣ် အတၢ်ပၥ်သးလၢ သုးကီၣ်ကး အတၢ်ကွဲမုၥ်လၢ တၢ်ကတဲသကိး တၢ်မုၥ်တၢ်ခုၣ်အဖီခိၣ် ဒီး ခ့ၣ်အဲၣ်ယူၣ် အဖီလ်စံၣ်လၢ တၢ်တၢၣ်ပီၣ်တဲသကိးတၢ်အဂီၢ် အိၣ်ဝဲဒ်လဲၣ်အဂ့ၢ် ပၣ်ဃုၥ်ဝဲဒၣ်န့ၣ်လီၤ.

ဒ်န့ၣ်အသိး တၢ်တၢၣ်ပီၣ်တဲသကိးစ့ၢ်ကီး တၢ်ကစီၣ်တၢ်ဖံးတၢ်မၤ အဂ့ၢ်အကျိၤ, တၢ်ကစီၣ် တၢ်ဘံၣ်တၢ်ဘၢ ဒီး တၢ်လၢဘၣ်ပလီၢ်ပဒီသးတဖၣ် တကးဒံးဘၣ် တၢ်ကစီၣ်လၢ တၢ်ကြၢးဒုးသ့ၣ်ညါကမျၢၢ်တဖၣ် ဒုးသ့ၣ်ညါကမျၢၢ် ကသ့အဂီၢ် တၢ်မၤအကျိၤအကျဲတဖၣ် တၢ်တၢၣ်ပီၣ်တဲသိးအီၤ စ့ၢ်ကီးန့ၣ်လီၤ.လၢန့ၣ်အမဲၥ်ညါ ခိၣ်နၢ်သ့ၣ်တဖၣ် တၢၣ်ပီၣ်တဲသကိး ဒီး ပၥ်ဖျါထီၣ်စ့ၢ်ကီး အတၢ်ထံၣ်လၢ ကီၢ်ပယီၤထံရူၢ်ကီၢ်သဲး တၢ်အိၣ်သး ဆူညါကမၤအသးဒ်လဲၣ်, တၢ်မနုၤကဲထီၣ်အသးသ့လဲၣ် တဖၣ်န့ၣ်လီၤ.

တၢ်ရဲၣ်တၢ်ကျဲၤဝဲအံၤ မ့ၢ်ဝဲ တၢ်ကရၢကရိဒီး တၢ်ဘိးဘၣ်ရၤလီၤဝဲၤကျိၤ အဖီလၥ် တၢ်ဟ့ၣ်တၢ်သ့ၣ်ညါဒီး တၢ်သူၣ်ထီၣ်ဆီလီၤဝဲဒ့ ရဲၣ်ကျဲၤမၤဝဲ ဒ်သိးတၢ်ဂ့ၢ်တၢ်ကျိၤလၢ အအိၣ်ထီၣ် တဖၣ် တၢ်ကဟ့ၣ်ခီဟ့ၣ်နီၤသကိး တဂၤဒီးတဂၤ အဂီၢ်န့ၣ်လီၤ. ထံရူၢ်ကီၢ်သဲး တၢ်တၢၣ်ပီၣ်တဲသကိး, သးစၢ် တၢ်တဲသကိး ဒီး ကညီဂ့ၢ်ဝီ တၢ်တၢၣ်ပီၣ်တဲသကိးတဖၣ် တၢ်မၤအီၤ အိၣ်စ့ၢ်ကီးန့ၣ်လီၤ.