ကီၢ်ရ့ၣ်တဖၣ်
ဒူပျၥ်ယၥ်ကီၢ်ရ့ၣ်, ကီကရံးကီၢ်ဆၣ်ပူၤ ဒူသဝီကရူၢ်တဖၣ် ရဲၣ်ကျဲၤမၤလၤကပီၤဝဲ (၇၃) နံၣ် ကညီမၤထူရၤမုၢ်နံၤအမူး
လါအီကူး (၁၄) သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ကိးမုၢ်နံၣ်ဒဲး ဖဲလါအီကူး ၁၂ သီအနံၤန့ၣ် ကညီဖိတဖၣ် ဖဲအအိၣ်တၢ်လီၢ်တပူၤလၢ်လၢ် ပၥ်ဖှိၣ်ထီၣ်သကိးအသး ဒီးရဲၣ်ကျဲၤမၤဝဲ တၢ်သ့ၣ်နီၣ်မၤလၤကပီၤက့ၤ ကညီဒီကလုၥ် အမၤထူရၤအမူး လၢအလုၢ်ထီၣ်တ့ၢ်အသးသမူလၢ ကညီကလုၥ်တၢ်ထူၣ်ဖျဲးအဂီၢ်န့ၣ်လီၤ.
ဒ်န့ၣ်အသိး ဖဲတနံၣ်အံၤ လါအီကူး ၁၂ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ်, ကီးကရံးကီၢ်ဆၣ်ပူၤ ဒူသဝီကရူၢ်တဖၣ် ပၥ်ဖှိၣ်ထီၣ်အသး ဒီးရဲၣ်ကျဲၤမၤလၤကပီၤသကိးဝဲ (၇၃) နံၣ် ကညီဒီကလုၥ်မၤထူရၤအမုၢ်နံၤ န့ၣ်လီၤ. ဒူပျၥ်ယၥ်ကီၢ်ရ့ၣ်ပူၤ ဒ်တၢ်မၤနီၣ်မၤဃါန့ၢ်အသိး တၢ်သ့ၣ်ညါဘၣ်လၢ ဒူသဝီကရူၢ် လၢရဲၣ်ကျဲၤမၤဝဲ တၢ်သ့ၣ်နီၣ်မၤလၤကပီၤ ကညီဒီကလုၥ် မၤထူရၤမုၢ်နံၤ ပှဲၤထီၣ် (၇၃) ဝီတဝီတဖၣ် မ့ၢ်ဝဲ စဲၣ်ကဝဲၣ်ကရူၢ်, ခူၣ်ဒိၤကရူၢ်, ဟီသရီကရူၢ်, သယဲၣ်တီကရူ, မံၣ်ဖလဲၤကရူၢ်, လါဖါကရူၢ်, မံၣ်ကသိၤကရူၢ်, ကွ့ကလ့ကရူၢ်, ပိယ့ကရူၢ်, ကျ့ၣ်ဖိခံကရူၢ်, ကျ့ၣ်ကရူၢ်, အစိကရူၢ် ဒီး အီးဖခံကရူၢ် သ့ၣ်တဖၣ်န့ၣ်လီၤ. တၢ်ရဲၣ်ကျဲၤမၤလၤကပီၤ ကညီမၤထူရၤမုၢ်နံၤ လၢတၢ်လီၢ်အါတီၤ ဒီး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီးကရံးကီၢ်ဆၣ် ခိၣ်နၢ်တဖၣ် လဲၤထီၣ်ပၣ်ဃုၥ်ပၣ်ဂီၢ်ဝဲဒၣ်န့ၣ်လီၤ. ဒ်တၢ်မၤနီၣ်မၤဃါအအသိး တၢ်မၤလၤကပီၤ ကညီမၤထူရၤတဘျီအံၤ ခိၣ်နၢ်ဘၣ်မူဘၣ်ဒါတဖၣ်, ကၠိဖိမုၣ်ခွါဒီး ဒူသဝီကမျၢၢ်ခဲလၢၥ် ပှၤ (၂၄၃၉) ဂၤ ဟဲထီၣ်မၤလၤကပီၤဝဲ ကညီမၤထူရၤ လၢနံၣ်ဝဲအံၤန့ၣ်လီၤ.
ဒူသဝီကရူၢ်တဖၣ် တီခိၣ်ရိၣ်မဲဒီး ရဲၣ်ကျဲၤမၤဝဲ ကညီမၤထူရၤမုၢ်နံၤ ဒ်အတၢ်ရဲၣ်တၢ်ကျဲၤအိၣ်အသိးန့ၣ်လီၤ. ဒီးအဝဲသ့ၣ်တဖၣ် လၢအတၢ်ရဲၣ်တၢ်ကျဲၤအပူၤ ဟ့ၣ်ထီၣ်ဝဲတၢ်ယူးယီၣ်ဆူ ကညီဒီကလုၥ်နီၣ်တယၢ်, ဟ့ၣ်ထီၣ်ဝဲ တၢ်ယူးယီၣ်ဆူ ကီၢ်ခိၣ်စီၤဘးအူကၠံ ဒီးကညီမၤထူရၤ လၢအလုၢ်ထီၣ်တ့ၢ်သးသမူ လၢထံကီၢ်ဒီးကလုၥ်အဂီၢ်တဖၣ်, ဖးဖျါထီၣ်ဝဲ လံၥ်ဟ့ၣ်ယုၢ်လၢ ကညီဒီကလုၥ်စၢဖှိၣ်ကရၢ ဟ့ၣ်ယုၢ်ဝဲ, ဘျးလီၤဝဲတၢ်သးအုးအဖီကွီၤဆူ မၤထူရၤအလၢၢ်ထူၣ်အလိၤ ဒီးဟ့ၣ်ထီၣ်ဝဲတၢ်ယူးယီၣ်ပၥ်ကဲ, ခိၣ်နၢ်ဘၣ်မူဘၣ်ဒါတဖၣ် ကတိၤဟ့ၣ်ဂံၢ်ဟ့ၣ်ဘါဝဲ ကမျၢၢ်ထံဖိကီၢ်ဖိကမျၢၢ်တဖၣ် ဒီးကတိၤဒုးသ့ၣ်ညါဝဲ မၤထူရၤအဂ့ၢ်အကျိၤ တဖၣ်န့ၣ်လီၤ.
ဖဲလါအီကူး ၁၂ သီ လၢအမ့ၢ်ဝဲ တၢ်သ့ၣ်နီၣ်မၤလၤကပီၤ ကညီမၤထူရၤမုၢ်နံၤပှဲၤထီၣ် (၇၃) နံၣ်အမူး တၢ်ရဲၣ်တၢ်ကျဲၤအံၤ ခိၣ်နၢ်ဘၣ်မူဘၣ်ဒါတဖၣ် ဟ့ၣ်သဆၣ်ထီၣ်ဝဲဒၣ်လၢ ကညီဖိတဖၣ် မ်ပကဟံးဃၥ် ကီၢ်ခိၣ်စီၤဘးအူကၠံ အတၢ်ကတိၤ, ကညီကလုၥ်ခိၣ်နၢ်တဖၣ် အတၢ်အိၣ်ဆၢထၢၣ် ဒီးတၢ်ဖံးတၢ်မၤတဖၣ် မ်ပကဃုသ့ၣ်ညါ ဒီးစိၥ်မူစိၥ်ဂဲၤအီၤလၢ ပတၢ်အိၣ်မူအပူၤ တကးဘၣ် ပကသ့ဟံးမူဒါ ဒီးမၤလၢပှဲၤက့ၤ ပခိၣ်ပနၢ် အတၢ်မုၢ်လၢ်တိၥ်ပၥ် လၢကညီဒီကလုၥ်အဂီၢ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
