၂၀၂၃ နံၣ် လါဒံၣ်စ့ဘၢၣ် ၂၇ သီ, ခ့ၣ်အဲၣ်ယူၣ်-လီၢ်ခၢၣ်သး

တၢ်ကရၢကရိ လၢအဟူးဂဲၤအိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် ဟီၣ်ကဝီၤပူၤတဖၣ် ပၥ်ဖှိၣ်ထီၣ်အသး ဒီးလဲၤဟ့ၣ် မၤစၢၤဝဲ ကမျၢၢ်ဃ့ၢ်မှံဟးဖျိး ခီဖျိတၢ်ဒုးတၢ်ယၤတဖၣ် လၢအဟဲအိၣ်ကဒုဖဲ ကီၢ်ကရံးကီၢ်ဆၣ် ဟီၣ်ကဝီၤပူၤတဖၣ် လၢဂံၢ်ခီၣ်ထံးတၢ်အီၣ်မိၢ် ပှၢ်ဒ်အမ့ၢ် ဘုသး, သိအီၣ်, အံသၣ်, တၢ်ဖီဆၢ, မိၣ်ဟဲသၣ်, ပသွဲသၣ် ဒီး ပဲသ့ၣ်တဖၣ်န့ၣ်လီၤ.

ဖဲ ၂၀၂၃ နံၣ် လါဒံၣ်စ့ဘၢၣ် ၂၆ သီတုၤ ၂၇ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် ကီးကရံးကီၢ်ဆၣ် ကီၢ်ဆၣ်ခိၣ်နၢ်တဖၣ် တီခိၣ်ရိၣ်မဲ ဒီး လီၢ်ကဝီၤတၢ်ကရၢကရိ ဒ်အမ့ၢ် ကညီသးစၢ်ကရၢ, ကညီပိၥ်မုၣ်ကရၢ, တၢ်ဆီၣ်ထွဲမၤစၢၤ ပှၤလီၢ်အိၣ်ကမှံကမံးတံၥ်-CIDKP, (FBR), ကီးက ရံးကီၢ်ဆၣ် တၢ်ခီဆၢဂ့ၢ်ဂီၢ်အူ တၢ်အိၣ်သး ဒီး တၢ်မၤစၢၤပှၤတ၀ၢကမံးတံၥ်တဖၣ် ပၥ်ဖှိၣ်ထီၣ်အသး ဒီးလဲၤဆီၣ်ထွဲမၤစၢၤဝဲ ဂ့ၢ်ဝီၢ်အူတၢ်ဆီၣ်ထွဲမၤစၢၤ ဆူကီၢ်ကရံးကီၢ်ဆၣ် ကမျၢၢ်ထံဖိကီၢ်ဖိ လၢအဘၣ်ဃ့ၢ်မှံဟးဖျိး ခီဖျိတၢ်ဒုးတၢ်ယၤတဖၣ်န့ၣ်လီၤ. တဘျီဃီ ဒူပျၥ်ယၥ်ကီၢ်ရ့ၣ် ဆူၣ်ချ့မၤစၢၤဝဲၤကျိၤ ရဲၣ်ကျဲၤသ မံသမိးန့ၢ်ဝဲ ပှၤဃ့ၢ်မှံဟးဖျိးတဖၣ် အတၢ်အိၣ်ဆူၣ်အိၣ်ချ့ တၢ်အိၣ်သး ၂ ဘျီတဘျီ ဒီး ဟ့ၣ်ဝဲတၢ်ကူဆါယါဘျါ စ့ၢ်ကီးန့ၣ်လီၤ.

ဒူပျၥ်ယၥ်ကီၢ်ရ့ၣ် ကီးကရံးကီၢ်ဆၣ် ထံဖိကီၢ်ဖိတဖၣ် ဃုၥ်ဒီးထံဖိကီၢ်ဖိ လၢကီၢ်ဆၣ်အဂၤတဖၣ် ခီဖျိ သုးမီၤစိရိၤဟံးန့ၢ်ဆူၣ် ထံကီၢ်တၢ်စိတၢ်ကမီၤ ဘၣ်ကွၢ် ဆၢၣ်မဲၥ် ဒီး တၢ်ကီတၢ်ခဲအါမးန့ၣ်လီၤ. တကးဒံးဘၣ် သုးမီၤစိရိၤအသုးတဖၣ် ခးနါစိၤကျိဖးဒိၣ်မ့ၢ်ဂ့ၤ, ဟဲတ့ၢ်လီၤမ့ၣ်ပိၢ်လၢ ကဘီယူၤအဃိမ့ၢ်ဂ့ၤ သတးဒီး ကမျၢၢ်ထံဖိကီၢ်ဖိအါဂၤ ဘၣ်ဟ့ၣ်လီၤကွံၥ် အသးသမူအါဖျၢၣ်န့ၣ်လီၤ.

ခဲအံၤ ကီၢ်ကရံးဝ့ၢ်တဖျၢၣ်အပူၤ ပှၤဃ့ၢ်မှံဟးဖျိးအနီၣ်ဂံၢ် အိၣ်ဝဲ ၃ ကလးဘျဲၣ် န့ၣ်လီၤ. လၢပှၤ ၃ ကလးဘျဲၣ်အံၤ တၢ်အီၣ်တၢ်အီအဂီၢ် တၢ်လိၣ်ဘၣ်အါထီၣ်ဝဲ တၢ်ဆီၣ်ထွဲမၤစၢၤန့ၣ်လီၤ.