လါယနူၤအါရံၤ ၁၁ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ, ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဆီထံးကီၢ်ဆၣ်ဟီၣ်ကဝီၤ ဃိၣ်လိၥ်ကျိမုၢ်ထီၣ် ဟီၣ်ကဝီၤ ဒူသဝီကမျၢၢ်တဖၣ် တီခိၣ်ရိၣ်မဲ ဒီးရဲၣ်ကျဲၤမၤဝဲ ၂၇၆၃ နံၣ် ကညီနံၣ်ထီၣ်သီအမုၢ်နံၤ မူးတၢ်ရဲၣ်တၢ်ကျဲၤ ဖဲတနံၤညါအံၤန့ၣ်လီၤ. ကမျၢၢ်ထံဖိကီၢ်ဖိတဖၣ် ဖဲမၤလၤကပီၤနံၣ်ထီၣ်သီမူး အတၢ်ရဲၣ်တၢ်ကျဲၤဝံၤတဘျီဃီ ပၥ်ဖျါထီၣ်အတၢ်ပၥ်သး ထီဒါသုးမီၤစိရိၤအတၢ်မၤအၢမၤသီ တဖၣ်န့ၣ်လီၤ.

လၢတၢ်ရဲၣ်တၢ်ကျဲၤတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဆီထံးကီၢ်ဆၣ် ကီၢ်ဆၣ်ထီဘိကမံးတံၥ် ဒီးဟီၣ်ကဝီၤမူဒါခိၣ် ပဒိၣ်အဲၣ်စတၢၣ် လဲၤထီၣ်ဒီး ကမျၢၢ်ထံဖိကီၢ်ဖိ လၢအဟဲထီၣ်မၤလၤကပီၤ ကညီနံၣ်ထီၣ်သီအမူးတဘျီအံၤန့ၣ် ကအိၣ်ဝဲ ၂၀၀ ဃၣ်ဃၣ်န့ၣ်လီၤ. ဃိၣ်လိၥ်ကျိမုၢ်ထီၣ် တၢ်လီၢ်ခဲလၢၥ် ထံဖိကီၢ်ဖိကမျၢၢ်တဖၣ် ရဲၣ်ကျဲၤမၤလၤကပီၤဝဲ ကညီနံၣ်ထီၣ်သီအမူးန့ၣ်လီၤ.

မူးအတၢ်ရဲၣ်တၢ်ကျဲၤအံၤ တၢ်စးထီၣ်အီၤဖဲ ဂီၤခီအဆၢကတီၢ် ခီဖျိတၢ်ယူၥ်ထီၣ် ကညီဒီကလုၥ်အနီၣ်တယၢ် လၢထူၣ်အလိၤန့ၣ်လီၤ. ဒ်န့ၣ်အသိး တၢ်တဲဖျါထီၣ်ဝဲ ကညီဒီကလုၥ်နံၣ်ထီၣ်သီ ကဲထီၣ်မုၢ်နံၤ အတၢ်စံၣ်စိၤတဲစိၤဝံၤ တၢ်မၤဝဲတၢ်ထုကဖၣ်သၣ်ကမဲၤ အတၢ်ရဲၣ်တၢ်ကျဲၤန့ၣ်လီၤ. မူးတၢ်ရဲၣ်တၢ်ကျဲၤအံၤ တၢ်ပျၢ်ကွံၥ်အီၤလၢ ကညီဒီကလုၥ်အတၢ်သးဝံၣ် န့ၣ်လီၤ.

ထံဖိကီၢ်ဖိကမျၢၢ်တဖၣ် ခီဖျိလၢအလီၢ်ကဝီၤဒၣ်ဝဲ ထံၣ်ဘၣ်, တူၢ်ဘၣ်ဝဲ မီၤစိရိၤအသုးတဖၣ် အတၢ်မၤအၢမၤသီတဖၣ်အဃိ ပၥ်ဖှိၣ်ထီၣ်အသးဒီး ရဲၣ်ကျဲၤမၤဝဲ တၢ်ပၥ်ဖျါထီၣ်တၢ်ဘၣ်သး ထီဒါသုးမီၤစိရိၤ ဖဲအဝဲသ့ၣ်မၤလၤကပီၤ ကညီနံၣ်ထီၣ်သီမူး အတၢ်ရဲၣ်တၢ်ကျဲၤ ဝံၤအလီၢ်ခံန့ၣ်လီၤ.

ထံဖိကီၢ်ဖိတဖၣ် ပၥ်ဖျါထီၣ်အတၢ်ပၥ်သး ထီဒါသုးမီၤစိရိၤအသုးတဖၣ် စိၥ်ဃုၥ်ဒီး တၢ်ကိးသတြီတဖၣ် လၢအမ့ၢ်ဝဲ
(၁)    ဟ့ၣ်ကညီကီၢ်တဘျီဃီ
(၂)    ဒုးနဲၣ်ကညီတဘးပယီၤတဘးအဘျီဃီ
(၃)    ပတသးလီကလုၥ်တၢ်သဘံၣ်သဘုၣ်ဘၣ်
(၄)    ပတသးလီထံလီၢ်ကီၢ်ပူၤတၢ်ဒုးတၢ်ယၤဘၣ်
(၅)    ပတုၥ်ကွံၥ်တၢ်ခးလီၤကျိဖးဒိၣ်လၢဒူပူၤသဝီပူၤတဘျီဃီ
(၆)    ပတုၥ်ကွံၥ်တၢ်ဃ့ဆူၣ်ကျိၣ်စ့လၢထံဖိကီၢ်ဖိအအိၣ်တဘျီဃီ
(၇)    ပတုၥ်ကွံၥ်ကဘီယူၤ အတၢ်ဟဲခးလီၤကျိဖးဒိၣ် လၢသဝီပူၤတဘျီဃီ
(၈)    ပတုၥ်ကွံၥ် တၢ်ဖီၣ်ကမျၢၢ် လၢအတၢ်ကမၣ်တအိၣ်နီတမံၤဘၣ်တဖၣ် တဘျီဃီ
(၉)    သုးမီၤစိရိၤအသုး လၢအမၤထီဒါ သုးကွီၢ်မ့ၣ်တဖၣ် မ်ထံဂုၤကီၢ်ဂၤ ကဟံးဂ့ၢ်ဝီအဝဲသ့ၣ်
(၁၀)    ပျဲပမၤလိတၢ်လၢ တအိၣ်ဒီးတၢ်ပျံၤတၢ်ဖုးဘၣ်
(၁၁)    ပအဲၣ်ဒိးလၢ ပကလဲၤက့ၤဖံးမၤသတဘျ့, ပတအဲၣ်ဒိးတၢ်တြီမၤတံၥ်တၥ်ဘၣ်
သ့ၣ်တဖၣ်န့ၣ်လီၤ.