လါယနူၤအါရံၤ ၂၁ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ ဒူသထူၣ်ကီၢ်ရ့ၣ် ဘံလ့ကီၢ်ဆၣ်ပူၤ ကညီတၢ်ဆီၣ်ထွဲမၤစၢၤ ပှၤလီၢ်အိၣ်ကမှံကမံးတံၥ် (CIDKP) တီခိၣ်ရိၣ်မဲဒီး မၤဝဲ တၢ်မၤလိ လၢအမ့ၢ်ဝဲ တၢ်ပၢဆှၢရဲၣ်ကျဲၤကမျၢၢ်ဂ့ၢ်ဝီ တၢ်မၤလိတကဘျီ ဖဲလါယနူၤအါရံၤ ၁၈ သီတုၤ ၁၉ သီ, လၢ ၂ သီအတီၢ်ပူၤအံၤ ဝံၤဝဲဒၣ်ဂ့ၤဂ့ၤဘၣ်ဘၣ်န့ၣ်လီၤ.

တၢ်မၤလိတဘျီအံၤ အတၢ်ပညိၣ် မ့ၢ်ဒ်သိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် တၢ်ပၢဟီၣ်ကဝီၤပူၤ ဒူသဝီတဖၣ် ဒ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပၥ်လီၤဃၥ် တၢ်ပၢဆှၢရဲၣ်ကျဲၤ ကမျၢၢ်ဂ့ၢ်ဝီသနူအက့ၢ်အဂီၤအိၣ်အသိး တၢ်ရဲၣ်ကျဲၤမၤဖျါထီၣ်အီၤ ကန့ၢ်အဂီၢ်, တၢ်ကရဲၣ်ကျဲၤဖံးမၤတၢ် ဒ်သဲစးတၢ်သိၣ်တၢ်သီ, တၢ်ဘျၢ, ဒီးတၢ်မၤကျဲသနူတဖၣ် တၢ်ကမၤဖျါထီၣ်အီၤလၢ ဒူသဝီပူၤဒၣ်ဝဲ ကသ့အဂီၢ်, ဒီးတၢ်ဖီၣ်လိၥ်စုမၤသကိးတၢ် ကအါထီၣ်အဂီၢ်, တၢ်သ့ၣ်ညါလူၤပိၥ်မၤထွဲ တၢ်ဖံးတၢ်မၤအတၢ်ရဲၣ်တၢ်ကျဲၤ ဒီး ကမၤဂုၤထီၣ်ပသီထီၣ် ပပှၤတ၀ၢလၢအချုးစိၤ ကသ့အဂီၢ်အဂ့ၢ်န့ၣ် ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဝဲဒၣ်န့ၣ်လီၤ.

လၢတၢ်မၤလိတဘျီအံၤအပူၤ ခိၣ်နၢ်ခၢၣ်စး လၢအဟဲထီၣ်တၢ်မၤလိတဖၣ်မ့ၢ်ဝဲ ကီၢ်ဆၣ်ခိၣ်နၢ်တဖၣ်, (CIDKP) ပှၤဘၣ်မူဘၣ်ဒါတဖၣ်, ကညီသးစၢ်ကရၢ ပှၤဘၣ်မူဘၣ်ဒါတဖၣ်, ဖၣ်အၣ်ကီၢ်ဆၣ် ဒီး ဘံလ့ကီၢ်ဆၣ်ပူၤ သဝီ ၁၅ ဖျၢၣ်အပူၤ သဝီတဖျၢၣ်စုၥ်စုၥ် ခၢၣ်စး ၂ ဂၤ ဟဲထီၣ်မၤလိမၤဒိးဝဲတၢ်လၢ တၢ်မၤလိတဘျီအံၤန့ၣ်လီၤ. ပှၤလၢအတီခိၣ်ရိၣ်မဲ ဟ့ၣ်တၢ်သိၣ်လိတခီမ့ၢ်ဝဲ လီၢ်ခၢၣ်သးတၢ်သိၣ်လိသရၣ် သရၣ်စီၤထြူမဲ ဒီး ပှၤဟဲထီၣ်တၢ်မၤလိခဲလၢၥ် အိၣ်ဝဲ (၂၀) ဘျဲၣ်န့ၣ်လီၤ.