လါဖ့ၤဘြူၤအါရံၤ ၂၇ သီ, ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်ပူၤ ဖဲ ၂၀၂၄ နံၣ် လါဖ့ၤဘြူၤအါရံၤ ၂၀ သီတုၤ ၂၄ သီအနံၤတဖၣ်န့ၣ် လီၢ်ခၢၣ်သးသ့ၣ်ပှၢ်ဝဲၤကျိၤ တီခိၣ်ရိၣ်မဲ ဒီးရဲၣ်ကျဲၤမၤဝဲ သ့ၣ်ပှၢ်ဒီးဟီၣ်ခိၣ်ကပံၥ်ဂ့ၢ်ဝီ အတၢ်တၢၣ်ပီၣ်တဲသကိးအမူးန့ၣ်လီၤ. တၢ်တၢၣ်ပီၣ်တဲသကိးအံၤ တၢ်မၤအီၤယံၥ်ဝဲ ၄ သီန့ၣ်လီၤ.

လၢတၢ်တၢၣ်ပီၣ်တဲသကိးတဘျီအံၤ ကီၢ်ရ့ၣ်ဒီးကီၢ်ဆၣ် ဝဲၤကျိၤဝဲၤဒ့ခိၣ်နၢ်တဖၣ် ဒ်အမ့ၢ် သ့ၣ်ပှၢ်ဝဲၤကျိၤ, စံၥ်ပှဲၤသူၣ်ဖျးဝဲၤကျိၤ, ဘုၣ်ဖီၣ်မၤညၣ်ဝဲၤကျိၤ, ဝံစိၥ်တီဆှၢဒီးတၢ်ဆဲးကျိးကျဲဝဲၤကျိၤ, စၢၢ်ပူၤထးပူၤကမံးတံၥ် ဒီး ဒူသဝီတၢ်ရဲၣ်သဲကတီၤခိၣ်ဃၢၤန့ဆၢၣ်ကမံးတံၥ် တဖၣ် ဟဲထီၣ်ဝဲန့ၣ်လီၤ. ပှၤဟဲထီၣ်လၢ တၢ်တၢၣ်ပီၣ်တဲသကိးတဘျီအံၤ အိၣ်ဝဲခဲလၢၥ် (၃၀) ဂၤန့ၣ်လီၤ.

လၢတၢ်တၢၣ်ပီၣ်တဲသကိးအပူၤ လီၢ်ခၢၣ်သးဒီးကီၢ်ရ့ၣ် သ့ၣ်ပှၢ်ဝဲၤကျိၤ ပှၤဘၣ်မူဘၣ်ဒါတဖၣ် ပၥ်ဖျါထီၣ်ဝဲ တကီၢ်ခါတၢ်အိၣ်သးတဖၣ်, ၂၀၂၂-၂၀၂၃ တုၤ ၂၀၂၅-၂၀၂၆ လၢ (၄) နံၣ်အတီၢ်ပူၤ သ့ၣ်ပှၢ်အတၢ်တိၥ်ကူၣ်ကျဲၤ လၢတၢ်ကမၤဖျါထီၣ်အီၤတဖၣ် တၢ်ပၥ်ဖျါဒုးသ့ၣ်ညါဝဲ, တၢ်ပၢဆှၢရဲၣ်ကျဲၤထံကျိထံကွၥ် တၢ်မၤတၢ်နဲၣ်ကျဲ, တၢ်ဒုးအိၣ်ထီၣ်ပှၤတ၀ၢသ့ၣ်ပှၢ်တၢ်နဲၣ်ကျဲ, ဟီၣ်ခိၣ်ကပံၥ်ကမံးတံၥ် အတၢ်သူၣ်ထီလီၤဒီးတၢ်မၤမူဒါတဖၣ်, တၢ်ဘှါရှဲဟီၣ်ခိၣ်ကပံၥ် တၢ်ဂ့ၢ်ကီအတၢ်နဲၣ်ကျဲ, သ့ၣ်တဖၣ် လီၢ်ခၢၣ်သးသ့ၣ်ပှၢ်ဝဲၤကျိၤ ဝဲၤကျိၤခိၣ် ပဒိၣ်မါဘးထိ ကတိၤရှဲပၠးဒုးသ့ၣ်ညါဝဲဒၣ်န့ၣ်လီၤ. ဒ်န့ၣ်အသိး တၢ်တၢၣ်ပီၣ်တဲသကိးစ့ၢ်ကီးဝဲ သ့ၣ်ပှၢ်ဝဲၤကျိၤသနူ (ဖီလ်စံၣ်) ပတြီၥ်စ့ၢ်ကီးန့ၣ်လီၤ.