မုၢ်တြီၢ်ကီၢ်ရ့ၣ် ကညီပိၥ်မုၣ်ကရၢ မၤဝဲတၢ်မၤလိ

လါစဲးပထ့ဘၢၣ် (၈) သီ, ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲလါအီကူး (၂၆) သီတုၤ လါစဲးပထ့ဘၢၣ် (၄) သီ, ၂၀၂၄ နံၣ်အနံၤန့ၣ် မုၢ်တြီၢ်ကီၢ်ရ့ၣ် ကညီပိၥ်မုၣ်ကရၢ တီခိၣ်ရိၣ်မဲဒီးရဲၣ်ကျဲၤမၤဝဲ, အဝဲၤကျိၤတၢ်မၤလိ တၢ်ဟူးတၢ်ဂဲၤ လၢ (၁၀) သီအတီၢ်ပူၤဒီး ဝံၤဝဲဒၣ်ဂ့ၤဂ့ၤန့ၣ်လီၤ.

တၢ်မၤလိဘျီဝဲအံၤ ကညီပိၥ်မုၣ်ကရၢဟ့ၣ်ဝဲ ဝဲၤကျိၤ (၃) ဘိတၢ်မၤလိ လၢအမ့ၢ် တၢ်ကရၢကရိဒီးတၢ်ဟ့ၣ်တၢ်သ့ၣ်ညါဝဲၤကျိၤ, တၢ်ကူၣ်ဘၣ်ကူၣ်သ့ဒီးတၢ်အိၣ်ဆူၣ်အိၣ်ချ့ ဝဲၤကျိၤ, ပှၤဂ့ၢ်ဝီဝဲၤကျိၤ အတၢ်ဟူးတၢ်ဂဲၤ တၢ်ဖံးတၢ်မၤသ့ၣ်တဖၣ် ဒီးတကတီၢ်ဃီ ဟ့ၣ်ဃုၥ်ဝဲ တၢ်တိၥ်ကျဲၤလၢအမ့ၢ် ဟံၣ်အိၣ်ကဒုဒီး ပိၥ်မုၣ်တၢ်ဒီတဒၢတၢ်တိၥ်ကျဲၤ, တၢ်ဒုး သ့ထီၣ်ဘၣ်ထီၣ်ပိၥ်မုၣ်ကံၢ်စီတၢ်တိၥ်ကျဲၤ, တၢ်ပၢဆှၢရဲၣ်ကျဲၤတၢ်ဖံးတၢ်မၤ, ကညီပိၥ်မုၣ်ကရၢဖီလ်စံၣ်, ကျိၣ်စ့စရီတၢ်မၤလိ တၢ်ဟူးတၢ်ဂဲၤ သ့ၣ်တဖၣ်န့ၣ်လီၤ.

လၢတၢ်မၤလိဘျီဝဲအံၤအပူၤ ပှၤဟ့ၣ်တၢ်မၤလိလၢအမ့ၢ် မုၢ်တြီၢ်ကီၢ်ရ့ၣ် ကညီပိၥ်မုၣ်ကရၢ ကရၢခိၣ် ပဒိၣ်မုၣ်နီၢ်ဖီလ့သီ စံးဝဲ "ပဟ့ၣ်တၢ်မၤလိဘျီဝဲအံၤ ပတၢ်ပညိၣ်မ့ၢ်ဒ်သိး ပဝဲကညီပိၥ်မုၣ်ကရၢ လၢအတီခိၣ်ရိၣ်မဲတၢ် တပတီၢ်ဘၣ်တပတီၢ် ကအိၣ်ဒီးတၢ်နၥ်န့ၢ်လီၤသး, ကသ့တီခိၣ်ရိၣ်မဲတၢ်ဖံးတၢ်မၤဒီး သ့ၣ်ညါလဲၤဒ်တၢ်မၤကျဲအိၣ်ပၥ်အသိး တကးဒံးဘၣ် မ့ၢ်ဒ်သိးပကမၤတုၤလီၤက့ၤ ပတၢ်ဖံးတၢ်မၤတဖၣ်လၢ ကီၢ်ရ့ၣ်ဒီးကီၢ်ဆၣ် ပှၤမၤတၢ်ဖိတဖၣ်န့ၣ်လီၤ."

တၢ်မၤလိဘျီဝဲအံၤအပူၤ ကညီပိၥ်မုၣ်ကရၢလၢ ကီၢ်ရ့ၣ်ဒီးကီၢ်ဆၣ်တဖၣ် ဟဲထီၣ်ဝဲတၢ်မၤလိ ပှၤနီၣ်ဂံၢ်ခဲလၢၥ်အိၣ်ဝဲ (၂၅) ဂၤန့ၣ်လီၤ.