Notice
ကီၢ်ရ့ၣ်တဖၣ်
ဒူသထူၣ်ကီၢ်ရ့ၣ် ဟီၣ်ကတီၤပူၤ တၢ်မၤလၤကပီၤဝဲ ကညီဒီကလုၥ်မၤထူရၤမုၢ်နံၤ ပှဲၤထီၣ် ၇၄ ဝီတဝီ
၂၀၂၄ နံၣ် လါအီကူး ၁၂ သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ် မၤလၤကပီၤဝဲ ကညီဒီကလုၥ်မၤထူရၤမုၢ်နံၤ ပှဲၤထီၣ် (၇၄) ဝီတဝီဖဲ ဘံလ့ကီၢ်ဆၣ် ဟီၣ်ကဝီၤပူၤန့ၣ်လီၤ. တၢ်မၤလၤကပီၤမူးအံၤ ဘၣ်တၢ်တီၤဖးလီၤအီၤ ၂ ပတီၢ်န့ၣ်လီၤ.
တၢ်မၤလၤကပီၤအတၢ်ရဲၣ်တၢ်ကျဲၤ အခီၣ်ထံးတပတီၢ်န့ၣ် ပှၤကယၢကယဲမူး ဖးဖျါထီၣ်တဲ တၢ်ရဲၣ်လီၤကျဲၤလီၤတဖၣ်ဝံၤ, တၢ်ယူၥ်လီၤဝဲ နီၣ်တယၢ်လၢ ထူၣ်တဝၥ် ဝံၤ တၢ်ဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်နီၣ်တယၢ်, တၢ်ဟ့ၣ်ထီၣ်ဝဲတၢ်ယူးယီၣ်ဆူ ခိၣ်နၢ်, သိၣ်ဒူ, ထံဖိကီၢ်ဖိလၢ အဟ့ၣ်လီၤသးလၢ ထံကီၢ်ဒီးကလုၥ်ဂီၢ်တ ဖၣ်န့ၣ်လီၤ. တၢ်ပၥ်လီၤဝဲ တၢ်သးအုးဖီကွီၤဆူ မၤထူရၤဘျၢၣ်ထူၣ်အလိၤန့ၣ်လီၤ.
တၢ်ရဲၣ်လီၤကျဲၤလီၤ ၂ ပတီၢ်တပတီၢ်န့ၣ် တၢ်က့ၤဟံးန့ၢ်က့ၤလီၢ်လၢ ဘျီၣ်ဒိၣ်ပူၤဒီး ဒူသထူၣ်ကီၢ်ရ့ၣ် ကညီသးစၢ်ကရၢ ကရၢခိၣ် ၂ စီၤဆၢန့ၢ် ကတိၤအိးထီၣ်ဝဲမူး တၢ်ရဲၣ်တၢ်ကျဲၤန့ၣ်လီၤ. ဝံၤအလီၢ်ခံ တၢ်ဖးဖျါထီၣ်ဝဲ လံၥ်ဟ့ၣ်ယုၢ်တဖၣ် ဒီး ဒူသထူၣ်ကီၢ်ရ့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအ့နဲၤ တၢ်ဖးဖျါထီၣ်ဝဲ ကညီဒီကလုၥ်မၤထူရၤ ဟဲကဲထီၣ်အဂ့ၢ်အကျိၤဝံၤ ခိၣ်နၢ်လၢအဟဲထီၣ်တၢ်မၤလၤကပီၤမူးတၢ်ရဲၣ်တၢ်ကျဲၤတဖၣ် ကတိၤဟ့ၣ်ဂံၢ်ဟ့ၣ်ဘါတၢ်ဝံၤ တၢ်ပျၢ်ကွံၥ်တၢ်ရဲၣ်တၢ်ကျဲၤလၢ ကညီ ဒီကလုၥ်တၢ်သး၀ံၣ်န့ၣ်လီၤ.
လၢတၢ်မၤလၤကပီၤမူးတၢ်ရဲၣ်တၢ်ကျဲၤဘျီဝဲအံၤ ကီၢ်ရ့ၣ်ခိၣ်နၢ်တဖၣ်, ကညီသးစၢ်ကရၢ, ကညီပိၥ်မုၣ်ကရၢ, ကရူၢ်ခိၣ်နၢ်တဖၣ်, ကၠိဖိမုၣ်ခွါ ဒီး ထံဖိကီၢ်ဖိကမျၢၢ်တဖၣ် ခဲလၢၥ် ၁၀၀ ဘျဲၣ် ဟဲထီၣ်ဝဲဒၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
