Notice
ကီၢ်ရ့ၣ်တဖၣ်
ချၢၣ်လွံၢ်ထူၣ်ကီၢ်ရ့ၣ် ရဲၣ်ကျဲၤမၤဝဲ ပၢၤကီၢ်ဂံၢ်ခီၣ်ထံးတၢ်ဘျၢခိၣ်သ့ၣ် ဒီး တၢ်ပၢဆှၢရဲၣ်ကျဲၤပၢၤကီၢ်တၢ်ဖံးတၢ်မၤ တၢ်မၤလိဝံၤဝဲဒၣ်အဂ့ၢ်
လါစဲးပထ့ဘၢၣ် ၁၄ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ, ချၢၣ်လွံၢ်ထူၣ်ကီၢ်ရ့ၣ် တီခိၣ်ရိၣ်မဲဒီး ဖဲ လါအီကူး ၁၃ သီ တုၤ လါစဲးပထ့ဘၢၣ် ၁၃ သီအနံၤန့ၣ် တၢ်ရဲၣ်ကျဲၤမၤဝဲ ကညီဒီကလုၥ်ပၢၤကီၢ်သုး တၢ်မၤလိတခါ လၢအယံၥ်ဝဲ ၁ လါန့ၣ်လီၤ. တၢ်မၤလိတဘျီအံၤ ဘၣ်တၢ်တီခိၣ်ရိၣ်မဲ ရဲၣ်ကျဲၤအီၤလၢ ချၢၣ်လွံၢ်ထူၣ် ကီၢ်ရ့ၣ် ကညီဒီကလုၥ်ပၢၤကီၢ်သုး ခိၣ်နၢ်တဖၣ်ဒီး တၢ်သိၣ်လိဝဲဘၣ်ဃး ပၢၤကီၢ်ဂံၢ်ခီၣ်ထံးတၢ်ဘျၢသဲစးခိၣ်သ့ၣ် ဒီး တၢ်ပၢဆှၢရဲၣ်ကျဲၤပၢၤကီၢ် တၢ်ဖံးတၢ်မၤ တဖၣ်န့ၣ်လီၤ.
တၢ်ရဲၣ်ကျဲၤမၤဝဲ တၢ်မၤလိတဘျီအံၤ အတၢ်ပညိၣ်မ့ၢ်ဒ်သိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ သဲစးတၢ်ဒိၣ်စိကအိၣ်အဂီၢ်, ပၢၤကီၢ်သုးခိၣ်နၢ်ဘၣ်မူဘၣ်ဒါတဖၣ် ကသ့ၣ်ညါနၢ်ပၢၢ်အတၢ်ဖံးတၢ်မၤမူဒါ, ကမ့ၢ်ပၢၤကီၢ်သုးသ့ၣ်တဖၣ်လၢ အဖီၣ်လိၥ်စုမၤသကိးတၢ်ဒီး ထံဖိကီၢ်ဖိကမျၢၢ် လၢတၢ်မၤဖျါထီၣ် တၢ်ဖံးတၢ်မၤတၢ်လိၣ်ထီၣ်ဖးထီၣ်အဂီၢ်န့ၣ်လီၤ.
လၢတၢ်မၤလိတဘျီအံၤ တၢ်သိၣ်လိဝဲတၢ်ဂ့ၢ်ခိၣ်သ့ၣ် (၉) ခါလၢအမ့ၢ်ဝဲ (၁) ကညီတၢ်ပၢၢ်ဆၢတၢ်စံၣ်စိၤတဲစိၤ, (၂) ကညီဒီကလုၥ်စၢဖှိၣ်ကရၢ ဂံၢ်ခီၣ်ထံးသဲစးတၢ် ဘျၢခိၣ်သ့ၣ်ဒီး တၢ်မၤကျဲ, (၃) ကညီတၢ်ပၢၢ်ဆၢ ခီၣ်တဃၥ်ကျဲသနူဒီး တၢ်မၤကျဲ, (၄) ခ့ၣ်အဲၣ်ယူၣ် ကွီၢ်မ့ၣ်ကွီၢ်ထံသဲစးဂ့ၢ်ဝီတၢ်မၤကျဲ, (၅) ကညီဒီကလုၥ် ပၢၤကီၢ်သုးမူဒါတၢ်မၤ, (၆) ကညီဒီကလုၥ်ပၢၤကီၢ်သုး ဃိထံတၢ်မူးတၢ်ရၢ်ကျိၤကျဲ, (၇) ကညီဒီကလုၥ်ပၢၤကီၢ်သုး, သုးဂ့ၢ်ဝီဝဲၤဒၢး တၢ်ပၢဆှၢရဲၣ်ကျဲၤတၢ်မၤအကျိၤအကျဲ, (၈) ခ့ၣ်အဲၣ်ယူၣ် ဝဲၤကျိၤတဖၣ်အကျဲသနူလၢ ကမျၢၢ်ကြၢးသ့ၣ်ညါ ဒီး (၉) ကညီပိၥ်မုၣ်ကရၢ, ကညီသးစၢ်ကရၢ ဂံၢ်ခီၣ်ထံးတၢ်ဘျၢသဲစးခိၣ်သ့ၣ် သ့ၣ်တဖၣ်န့ၣ်လီၤ.
လၢတၢ်ပျၢ်ကွံၥ်တၢ်မၤလိတၢ်ရဲၣ်တၢ်ကျဲၤမူးတဘျီအံၤ ကီၢ်ရ့ၣ်ခိၣ်နၢ်တဖၣ်, ကီၢ်ဆၣ်ခိၣ်နၢ်တဖၣ်, ကီၢ်ရ့ၣ်စံၣ်ညီၣ်ကွီၢ်ခိၣ်, သုးက့ဝဲၤဒၢးခိၣ် ဒီး ဝဲၤဒၢးပှၤမၤတၢ်ဖိ တဖၣ်ခဲလၢၥ် (၇၀) ဂၤဟဲထီၣ်ဝဲလၢတၢ်ပျၢ်ကွံၥ်တၢ်မၤလိ မူးဘျီဝဲအံၤန့ၣ်လီၤ. တၢ်ဟ့ၣ်လၤကပီၤစ့ၢ်ကီး ပှၤမၤလိတၢ်ဖိလၢအဖျိးစိတဖၣ် ဖဲတၢ်ပျၢ်ကွံၥ်တၢ်မၤလိ မူးဘျီဝဲအံၤန့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
