Notice
လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကတဲာ်ကတီၤ ခိၣ်နၢ်သးစၢ်သ့ၣ်တဖၣ်လၢ တၢ်မၤဂ့ၤထီၣ် တၢ်ပၢတၢ်ပြးဒီး တၢ်ကဲခိၣ်ကဲနၢ်အဂီၢ်
ခ့ၣ်အဲၣ်ယူၣ်-လီၢ်ခၢၣ်သး ၂၀၂၄ နံၣ် လါအီးကထိဘၢၣ် (၁၄) သီ.
ဒ် ကရၢမိၢ်ပှၢ် အတၢ်အၢၣ်လီၤအီလီၤလၢ တၢ်ကမၤဂ့ၤထီၣ် တၢ်ပၢတၢ်ပြးဒီး တၢ်ကဲခိၣ်ကဲနၢ် ကံၢ်စီတဖၣ်အဂီၢ် အသိးန့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒုးအိၣ်ထီၣ် တၢ်မၤဂ့ၤထီၣ်ကံၢ်စီ တၢ်မၤလိ, (၁) လါတၢ်မၤလိ လၢ ကီၢ်သူလ့ၤ ဟီၣ်က၀ီၤပူၤ စးထီၣ်လၢ လါစဲးပထ့ဘၢၣ် (၁၆) သီ တုၤ လါအီးကထိဘၢၣ် (၁၁) သီ, ၂၀၂၄ နံၣ် အတီၢ်ပူၤ န့ၣ်လီၤ. တၢ်ကဲခိၣ်ကဲနၢ်, တၢ်ပၢတၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ တၢ်မၤလိအံၤ မ့ၢ်၀ဲ ခ့ၣ်အဲၣ်ယူၣ်-ကညီဒီ ကလုာ်စၢဖှိၣ်ကရၢ အခီၣ်ကါတခါလၢ အဖျါ ဒ် အဂုာ်ကျဲးစၢးထဲးဂံၢ်ထဲးဘါ ကတီၤဆိပာ်စၢၤတၢ် ဒ်သိးဒီး ကီၢ်ရ့ၣ်ဒီး ၀ဲၤကျိၤခိၣ်နၢ် တဖၣ် အတၢ်သ့တၢ်ဘၣ် ကံၢ်စီ ကဂ့ၤထီၣ်အဂီၢ် ဒီး ကကွၢ်ဆၢၣ်မဲာ်သဂၢၢ်၀ဲဒၣ် တၢ်ပၢတၢ်ပြး တၢ်တၤတၢ် တဖၣ် လၢ ထံရူၢ်ကီၢ်သဲးတၢ်အိၣ်သး တၢ်ဆီတလဲ ချ့သဒံးအပူၤအံၤ ကသ့အဂီၢ် န့ၣ်လီၤ.
တၢ်ကဲခိၣ်ကဲနၢ်, တၢ်ပၢတၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ တၢ်မၤလိ အံၤ ဘၣ်တၢ်မၤအီၤ သၢ၀ီတ၀ီလံဒီး လၢ ကီၢ်သူလ့ၤ ဟီၣ်က၀ီၤအပူၤ တၢ်ပၢတၢ်ပြးလၢ အအိၣ်ဒီးတၢ်တုၤလီၤတီၤလီၤဒီး တၢ်သးစွံကတုၤတဖၣ်အံၤ ဒ်သိးဒီး ကကဲထီၣ် တၢ်မၤစၢၤလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အတၢ်မုၢ်လၢ်ကွၢ်စိလၢ တၢ်ကဲခိၣ်ကဲနၢ်, တၢ်ပၢ တၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ သနၢၣ် (၃) ထံၣ်အံၤ အဂီၢ်န့ၣ်လီၤ. ခိၣ်နၢ်ခၢၣ်စးလၢ အဟဲထီၣ် တၢ်မၤလိ အံၤတဖၣ် ဒ်သိးဒီး ကက့ၤတီခိၣ်ရိၣ်မဲက့ၤ အနီၣ်ကစၢ် ကီၢ်ရ့ၣ်ဒီး၀ဲၤကျိၤသ့ၣ်တဖၣ် ဃုာ်ဒီး တၢ်နာ်န့ၢ်တၢ်, တၢ်အိၣ်ဖျိ အိၣ်ဖျါ ဒီး တၢ်သ့ဟံးန့ၢ်မူဒါသ့ၣ်တဖၣ်ဒီး တၢ်ဆီၣ်ထွဲမၤစၢၤအီၤ ခီဖျိလၢ တၢ်သ့တၢ်ဘၣ်, တၢ်ပီးတၢ်လီ ဒီး တၢ်မၤ တၢ်ရဲၣ်တၢ်ကျဲၤ သ့ၣ်တဖၣ် န့ၣ်လီၤ.
တနံၣ်အံၤ တၢ်ရဲၣ်တၢ်ကျဲၤ ခံပတီၢ်တပတီၢ်အံၤအပူၤ ခိၣ်နၢ်ခၢၣ်စး (၃၈) ဂၤလၢ ကီၢ်ရ့ၣ်ဒူသထူၣ်, ကီၢ်ရ့ၣ် ဒူပျာ်ယာ်ဒီး ကီၢ်ရ့ၣ်ဖၣ်အၣ်တဖၣ်လၢ အမ့ၢ် ကီၢ်ရ့ၣ်သ့ၣ်တဖၣ် အကါဒိၣ်လၢ တၢ်တိာ်ကူၣ်ကျဲၤခိၣ်သ့ၣ် တၢ်လီၢ်သ့ၣ် တဖၣ် အဟဲ ထီၣ်၀ဲ န့ၣ်လီၤ. တၢ်ကဲခိၣ်ကဲနၢ်, တၢ်ပၢတၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ တၢ်မၤလိအံၤ အိၣ်ဒီး တၢ်ပညိၣ်ကွၢ်စိ လၢ ခိၣ်နၢ်တဖၣ်လၢ အဟဲထီၣ်တၢ်မၤလိတဖၣ် ကဟံးန့ၢ်မူဒါ အကါဒိၣ်တဖၣ်လၢ တၢ်ပၢတၢ်ပြးဒီး တၢ်ပၢဆှၢကမျၢၢ် လၢ အအိၣ်လၢ အဟီၣ်က၀ီၤပူၤသ့ၣ်တဖၣ်ဒီး ခိၣ်နၢ်ခၢၣ်စးသ့ၣ်တဖၣ်အံၤ အကံၢ်အစီ ကဂ့ၤဒိၣ်ထီၣ် အါထီၣ်အဂီၢ် န့ၣ်လီၤ.
ကၠိလၢ အမ့ၢ် တၢ်ပၢတၢ်ပြးဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီကၠိ လၢအမ့ၢ် တၢ်ကမၤဂ့ၤထီၣ် တၢ်ပၢတၢ်ပြး ကံၢ်စီလၢ ကီၢ်ပယီၤအပူၤ အဂီၢ်တဖျၢၣ်အံၤ မၤစၢၤ၀ဲ ဒ်သိးဒီး တၢ်မၤလိအံၤ ကကဲထီၣ် အဂီၢ်န့ၣ်လီၤ. တၢ်ပၢတၢ်ပြးဒီး တၢ်ပၢဆှၢ ရဲၣ်ကျဲၤကမျၢၢ်ဂ့ၢ်၀ီကၠိအံၤ တမ့ၢ်ထဲလၢ အမၤစၢၤ၀ဲလၢ တၢ်သ့တၢ်ဘၣ်ကံၢ်စီတကပၤဘၣ်, ဃုာ်ဒီး တၢ်ကွဲး လီၤပာ်လီၤ တၢ်မၤလိ တၢ်ရဲၣ်တၢ်ကျဲၤဒီး ဒ်သိးဒီး တၢ်မၤလိအံၤ ကအိၣ်ဒီး ကံၢ်စီဒီး ကထီၣ်ဘးအဂီၢ် မၤစၢၤဆီၣ်ထွဲ စ့ၢ်ကီးလၢ တၢ်သိၣ်လိတကပၤ စ့ၢ်ကီးန့ၣ်လီၤ. သရၣ်လၢ အဒုးအိၣ်ထီၣ် တၢ်ပၢတၢ်ပြးဒီး တၢ်ပၢဆှၢကမျၢၢ်ဂ့ၢ်၀ီကၠိ လၢအမ့ၢ် သရၣ်စီၤကပံာ် စံး၀ဲလၢ, “ကီၢ်ပယီၤအပူၤ ဖဲၣ်ဒရဲၣ်ဒံၣ်မိၣ်ကရံၣ်စံၣ်အဂီၢ် တၢ်မုၢ်လၢ်ကွၢ်စိတဖၣ် အဖိးမံ၀ဲဒၣ် အဆၢ ကတီၢ်အံၤန့ၣ် တၢ်ကွဲးလီၤပာ်လီၤ တၢ်မၤလိတၢ်ရဲၣ်တၢ်ကျဲၤသ့ၣ်တဖၣ်လၢ အကလီၤပလိာ်ဒီး လီၢ်က၀ီၤ တၢ်ပၢ တၢ်ပြး သ့ၣ်တဖၣ်အဂီၢ်,ဒီး တၢ်သဘံၣ်ဘုၣ်, တၢ်နုာ်လီၤဟးထီၣ်အိၣ်ဆိးတၢ်ဂ့ၢ် ဒီး တၢ်မၤစှၤလီၤ လီၢ်ခၢၣ်သး တၢ်ဖီၣ်ပျံၤ သ့ၣ် တဖၣ်အဃိ ပှၤတ၀ၢတၢ်အိၣ်သးလၢ အဘံဘူဃါဃုာ်သးတဖၣ်အပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ခိၣ်နၢ်သ့ၣ်တဖၣ်လၢ ကဟံးန့ၢ်ဂ့ၢ်၀ီကသ့ ကံၢ်စီသ့ၣ်တဖၣ်အံၤ ကအိၣ်ထီၣ်အဂီၢ် န့ၣ်လီၤ.”
ခိၣ်နၢ်တဖၣ်လၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ပာ်ပနီၣ်၀ဲ တၢ်ကတဲာ်ကတီၤဆိ ခိၣ်နၢ်စၢၤသွဲၣ်သီ သ့ၣ် တဖၣ်အံၤ အကါဒိၣ်လၢ တၢ်ကမၤဂ့ၤထီၣ် တၢ်ပၢတၢ်ပြးဒီး တၢ်ဂုၤထီၣ်ပသီထီၣ်လၢ ကီၢ်သူလ့ၤအပူၤအဂီၢ်န့ၣ်လီၤ. ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, နဲၣ်ရွဲၣ်ခိၣ်ကျၢၢ်သဃဲၤ (၂) ဒီး တၢ်မၤဂ့ၤထီၣ် တၢ်ပၢတၢ်ပြးကံၢ်စီကမံးတံာ်ခိၣ် ပဒိၣ်စီၤလးထိ ပာ်ဖျါ တၢ်အိၣ်သးလၢ တၢ်မၤဂ့ၤထီၣ် တၢ်ပၢတၢ်ပြးကံၢ်စီအဂီၢ် ဒ်အမ့ၢ်, “တၢ်မၤလိအံၤ အတၢ်ပညိၣ် မ့ၢ်ဒ်သိး တၢ်တိာ်ကူၣ်ကျဲၤခိၣ်သ့ၣ်တဖၣ်အကျါ တၢ်ကဒုးအိၣ်ထီၣ် ကျဲတဘိလၢ တၢ်ကမၤဂ့ၤထီၣ် တၢ်ကဲခိၣ်ကဲနၢ်လၢ ပှၤအါဂၤ ပၣ်ဃုာ်ပၣ်ဂီၢ်သကိးတၢ်ဒီး သးစၢ်ခိၣ်နၢ်တဖၣ် ကဒိးန့ၢ်ဘၣ် မူဒါအကါဒိၣ်လၢ ခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢ အတၢ်ပၢတၢ်ပြး တၢ်သူၣ်ထီၣ်ဆီလီၤအပူၤ အဂီၢ်န့ၣ်လီၤ. တၢ်မၤလိတကတီၢ်အံၤ ၀ံၤ၀ဲတဆၢကတီၢ်န့ၣ် ခိၣ်နၢ်ခၢၣ်စး ပှၤမၤလိတၢ် ခဲလၢာ် ပာ်ဖှိၣ် (၂၁၇) ဂၤ န့ၣ် တၢ်ဟ့ၣ်လီၤ တၢ်မၤလိ၀ံၤ၀ဲလံန့ၣ်လီၤ.”ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူ၀့ ဟ့ၣ်ကူၣ်ဟ့ၣ်ဖး ဟ့ၣ်သဆၣ်ထီၣ်၀ဲဒၣ် ဖဲ တၢ်မၤလိ ပျၢ်တၢ်ရဲၣ်တၢ်ကျဲၤ ဒ်အမ့ၢ်, “ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအံၤ စးထီၣ်လၢ စုက၀ဲၤတၢ်ပၢၢ်ဆၢကတီၢ် အိၣ်ထီၣ်ကတီၢ်န့ၣ် အိၣ်ဒီး ဟီၣ်က၀ီၤ, အိၣ်ဒီးကမျၢၢ်သ့ၣ်တဖၣ်အဃိ ဘၣ်ဒုးအိၣ်ထီၣ်၀ဲဒၣ် တၢ်ပၢတၢ်ပြး တၢ်ဖံးတၢ်မၤ သ့ၣ်တဖၣ် ဒ် ပဒိၣ်တဖုအသိးဒီး ဆၢကတီၢ်အခဲအံၤစ့ၢ်ကီး ခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢအံၤ ဒ်တၢ်ပၢၢ်ဆၢ ကတီၢ် ကီၢ်သူလ့ၤပဒိၣ်တဖုအသိး ကအိၣ်လၢပှဲၤဒီး အကံၢ်အစီဒီး တၢ်မၤကျိၤကျဲလီၤတံၢ် လီၤဆဲးသ့ၣ်တဖၣ်အဂီၢ် ခီဖျိလၢ တၢ်မၤဂ့ၤထီၣ်တၢ်ပၢတၢ်ပြးကံၢ်စီ ကမံးတံာ် တၢ်မၤလိသ့ၣ်တဖၣ်အံၤန့ၣ် ပကဘၣ် ဂုာ်ကျဲးမၤ မၤ၀ဲဒၣ် တုၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အထံရူၢ်ကီၢ်သဲး အတၢ်မုၢ်လၢ်ကွၢ်စိတဖၣ် ဒီး အတၢ်ပညိၣ်တဖၣ် ကတုၤထီၣ် ထီၣ်ဘး၀ဲအဂီၢ်န့ၣ်လီၤ.”
တၢ်ဟူးတၢ်ဂဲၤလၢအဘၣ်ထွဲတဖၣ်
