ကညီလံၥ်ညိၣ်သိၣ်ဒိၣ်ဒီး တၢ်မၤလိသ့သး အမူ

  ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်စုတီၤဖီလၥ် ကညီကူၣ်သ့ဆဲးလၤဝဲၤကျိၤ လီၢ်ခၢၣ်သး ရဲၣ်ကျဲၤမၤဝဲ တၢ်က့ၤကွၢ်ကဒါက့ၤ ကညီလံၥ်ညိၣ်သိၣ်ဒိၣ်ဒီး တၢ်မၤလိသ့သး အမူးတမူးန့ၣ်လီၤ. တၢ်ရဲၣ်တၢ်ကျဲၤတဘျီအံၤ အတၢ်ပညိၣ်မ့ၢ်ဝဲ တၢ်က့ၤကွၢ်ကဒါက့ၤ ကညီကူၣ်သ့ဆဲးလၤဝဲၤကျိၤ အလံၥ်ညိၣ်သိၣ်ဒိၣ်လၢ တၢ်သိၣ်လိတ့ၢ်အီၤတဖၣ် ဒီး ပဲၥ်ထံနီၤဖး မၤဂ့ၤထီၣ်က့ၤအီၤန့ၣ်လီၤ.

     လံၥ်ညိၣ်သိၣ်ဒိၣ်လၢ ပသူအီၤအံၤ ပဒုးအိၣ်ထီၣ်တ့ၢ်အီၤတဘျူးနံၣ်လံန့ၣ်လီၤ. လၢတၢ်န့ၣ်အဃိ အလီၢ်အိၣ်ဝဲလၢ တၢ်ကက့ၤကွၢ်က့ၤအီၤ ပဲၥ်ထံနီၤဖးက့ၤအီၤဒီး တၢ်ဖံးလိမၤဒိအက့ၢ်အဂီၤတဖၣ် အလီၢ်အိၣ်လၢ တၢ်ကက့ၤကွၢ်မဲၥ်ထံနီၤဖးက့ၤအီၤလီၤ အဂ့ၢ်န့ၣ် ကညီကူၣ်သ့ဆဲးလၤဝဲၤကျိၤ လံၥ်ညိၣ်သိၣ်ဒိၣ်ကမံးတံၥ် သရၣ်စီၤဟ့ၣ်စိ စံးဝဲဒၣ်န့ၣ်လီၤ. တၢ်မၤလိ ၁ တသီ အကတီၢ် တၢ်မၤစ့ၢ်ကီး တၢ်ဟူးတၢ်ဂဲၤ လၢအဘၣ်ထွဲဒီး လံၥ်တဘ့ၣ်ဘၣ်တဘ့ၣ် တၢ်သိၣ်လိအီၤ အတၢ်လီၤဆီလိၥ်သးဒီး လၢ ၂ သီတသီအနံၤန့ၣ် ပက့ၤကွၢ်က့ၤ တၢ်သိၣ်လိလၢ ပသိၣ်လိလၢ လံၥ်ပူၤသ့ၣ်တဖၣ် အတၢ်ဂ့ၢ်တၢ်ကျိၤသ့ၣ်တဖၣ် ပက့ၤသမံသမိးက့ၤအီၤ စ့ၢ်ကီးလီၤအဂ့ၢ်န့ၣ် အဝဲစံးအါထီၣ်ဝဲဒၣ်န့ၣ်လီၤ.

     လၢ်တၢ်ကွၢ်ကဒါက့ၤ လံၥ်ညိၣ်သိၣ်ဒိၣ် တၢ်ရဲၣ်တၢ်ကျဲၤအံၤ တၢ်က့ၤကွၢ်ကဒါက့ၤ လံၥ်ညိၣ်သိၣ်ဒိၣ်တဖၣ် စးထီၣ်လၢတီၤဖုၣ်, တီၤခၢၣ်သးဒီး တီၤထီသ့ၣ်တဖၣ်န့ၣ်လီၤ. ခိၣ်နၢ်ဘၣ်မူဘၣ်ဒါလၢ ဟဲထီၣ်ဟ့ၣ်ကူၣ်ဟ့ၣ်ဖး တၢၣ်ပီၣ်တဲသကိးတဖၣ် ဟ့ၣ်ထီၣ်အသး အတၢ်ထံၣ် အတၢ်ဟ့ၣ်ကူၣ် လၢတၢ်ကမၤဂ့ၤထီၣ်က့ၤ ကညီတၢ်ကူၣ်ဘၣ်ကူၣ်သ့ အဂီၢ်န့ၣ်လီၤ. ကညီကူၣ်သ့ဆဲးလၤဝဲၤကျိၤ ပှၤမၤတၢ်ဖိတဖၣ်, ကီၢ်ရ့ၣ် ကီၢ်ဆၣ် ကညီကၠိသရၣ်, သရၣ်မုၣ်တဖၣ် ဒီး ခိၣ်နၢ်ဘၣ်ထွဲတဖၣ် ဟဲထီၣ်ပဲၥ်ထံနီၤဖး ဟ့ၣ်ကူၣ်ဟ့ၣ်ဖး သကိးလၢတၢ်ရဲၣ်တၢ်ကျဲၤ တဘျီညါအံၤန့ၣ်လီၤ.

     တၢ်ကွၢ်ကဒါက့ၤ လံၥ်ညိၣ်သိၣ်ဒိၣ် တၢ်ရဲၣ်တၢ်ကျဲၤ တဘျီအံၤ ဘၣ်တၢ်မၤအီၤစးထီၣ်ဖဲ ၂၉-၃၁ သီလါမး ၂၀၁၉ နံၣ်တၢ်လီၢ် သ့ၣ်ဘ့ၣ်ထၣ် ဖၣ်အၣ်ကီၢ်ရ့ၣ်န့ၣ်လီၤ. ဘၣ်တၢ်တီခိၣ် ရိၣ်မဲအီၤလၢ ကညီကူၣ်သ့ဆဲးလၤဝဲၤကျိၤ လီၢ်ခၢၣ်သး ဒီး ခိၣ်နၢ်ဘၣ်မူဘၣ်ဒါ ၅၀ ဂၤဃၣ်ဃၣ် ဟဲထီၣ်ဟ့ၣ်ကူၣ်ဟ့ၣ်ဖးသကိးန့ၣ်လီၤ.

     ကညီကူၣ်သ့ဆဲးလၤဝဲၤကျိၤအံၤ မ့ၢ်ဝဲ ၀ဲၤကျိၤတဘိလၢအဟူးဂဲၤလၢ ကညီဖိတဖၣ် ကဒိးန့ၢ်ဘၣ် တၢ်ကူၣ်ဘၣ်ကူၣ်သ့ ဒီး ကသ့ထီၣ်ဘၣ်ထီၣ် ကဒိၣ်ထီၣ်ထီထီၣ် အဂီၢ်န့ၣ်လီၤ. ဒ်န့ၣ်အသိး လၢတၢ်ပၢၤဃၥ် ပမှံၤပပှၢ် အတၢ်ဆဲးတၢ်လၤ တဖၣ်စ့ၢ်ကီး ဝဲၤကျိၤအံၤ ဟံးဃုၥ်စ့ၢ်ကီးဝဲ မူဒါန့ၣ်လီၤ.