သုးမီၤစိရိၤအသုး စုတီၤဖီလၥ် သုးခိးကီၢ်ဆၢ (BGF) လၢအအိၣ်ဆီလီၤသးဖဲ လ့က့ၣ်သုးကလၢၤတဖၣ် မၢဆူၣ်ဝဲ လီၢ်ကဝီၤကမျၢၢ်တဖၣ် လၢကကျီန့ၢ်အီၤ ၀ၣ် ဒီး သ့ၣ် လၢကတ့ဂ့ၤထီၣ်က့ၤ အသုးကလၢၤအဂီၢ်

သုးမီၤစိရိၤအသုး စုတီၤဖီလၥ် သုးခိးကီၢ်ဆၢ (BGF) လၢအအိၣ်ဆီလီၤသးဖဲ လ့က့ၣ်သုးကလၢၤတဖၣ် မၢဆူၣ်ဝဲ လီၢ်ကဝီၤကမျၢၢ်တဖၣ် လၢကကျီန့ၢ်အီၤ ၀ၣ် ဒီး သ့ၣ် လၢကတ့ဂ့ၤထီၣ်က့ၤ အသုးကလၢၤအဂီၢ်
လါစဲးပထ့ဘၢၣ် ၁၃ သီ, ၂၀၂၁ နံၣ်, ဒူသထူၣ်ကီၢ်ရ့ၣ်

သုးမီၤစိရိၤ စုတီၤဖီလၥ် သုးခိးကီၢ်ဆၢ (BGF) ၁၀၁၄ ဒီး ခမရ ၄၀၆ လၢအဆီလီၤအသုးကလၢၤဖဲ လ့က့ၣ်သဝီ ခၢၣ်သးတဖၣ် မၢန့ၢ်ဆူၣ်ဝဲ လ့က့ၣ်သဝီဖိတဖၣ်လၢ ကကျီန့ၢ်အဝဲသ့ၣ်တဖၣ် အသ့ၣ် ဒီး ၀ၣ် လၢကတ့ဂ့ၤထီၣ်က့ၤ အသုးကလၢၤ အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ဘံလ့ကီၢ်ဆၣ် တၢ်ကစီၣ်ဒီးတၢ်ဘိးဘၣ်ရၤလီၤဝဲၤဒ့ ပှၤဘၣ်မူဘၣ်ဒါတဖၣ် ပၥ်ဖျါဝဲဒၣ်န့ၣ်လီၤ.
သုးခိးကီၢ်ဆၢတဖၣ် ဖဲလါစဲးပထ့ဘၢၣ် ၆ သီအနံၤန့ၣ် မၢဆူၣ်ဝဲ သဝီဖိတဖၣ် လၢကကျီန့ၢ်အဝဲသ့ၣ်တဖၣ် လၢ သ့ၣ် ဒီး ၀ၣ်, ဟံၣ်တဒူၣ်န့ၣ် ကဘၣ်ကျီဝဲ သ့ၣ် ၂ ဘိ ဒီး ၀ၣ် ၁၀ ဘိစုၥ်စုၥ် ဒီးကဘၣ်လဲၤဆှၢဝဲလၢ အဝဲသ့ၣ်အသုးကလၢၤန့ၣ်လီၤ.
ဖဲလါယူၤ ၁၅ သီန့ၣ် မၢဝဲတဝီဖိတဘျီ လၢကဘၣ်ကျီန့ၣ်အဝဲသ့ၣ် "သ့ၣ်" ဟံၣ်ဒူၣ်တဒူၣ်န့ၣ် သ့ၣ် ၂ ဘိ အထီကဘၣ်အိၣ်ဝဲ ၅ ပျၢ် ဒီး ၀ၣ် ၁၀ ဘိ အထီကဘၣ်အိၣ်ဝဲ ၁၀ ပျၢ် စုၥ်စုၥ် ဒ်သိးအဝဲသ့ၣ်တဖၣ် ကဘှီဂ့ၤထီၣ်က့ၤ အသုးကလၢၤအဂီၢ်န့ၣ်လီၤ. မၢဝဲသဝီဖိတဖၣ် ဘၣ်ဆၣ် တဟ့ၣ်ဝဲအဘူးအလဲဘၣ်. မၢကလီဝဲန့ၣ်လီၤ. တၢအဘျီန့ၣ် မၢဝဲသဝီခံဖျၢၣ် လၢအမ့ၢ် လ့က့ၣ်သဝီ ဒီး ကၠီၣ်ဖၠါ သဝီန့ၣ်လီၤ အဂ့ၢ်န့ၣ် ဘံလ့ကီၢ်ဆၣ် ပှၤဘၣ်မူဘၣ်ဒါတဂၤ ပၥ်ဖျါဝဲန့ၣ်လီၤ. မၢဝဲသဝီဖိတဘျီလံ ဘၣ်ဆၣ် ဘှီဂ့ၤထီၣ်အသုးကလၢၤတဝံၤဒံးအဃိ မၢကဒီးဝဲ ခံဘျီတဘျီန့ၣ်လီၤ.

ကတီၢ်ခဲအံၤ ခီဖျိလၢ သ့ၣ် ဒီး ၀ၣ် တဖၣ် လီၤစှၤဝဲအဃိ ဟးဃုသ့ၣ်ဃု၀ၣ် တညီလၢၤဘၣ်န့ၣ်လီၤ. ဘၣ်ဆၣ် သဝီဖိတဖၣ် ပျံၤဘၣ်အဝဲသ့ၣ်အဃိ ကဘၣ်ဃုဝဲတုၤအန့ၢ် ဒ်အဝဲသ့ၣ်ဃ့အသိး အဖီခိၣ် သဝီဖိတနီၤ က့ၤကျီက့ၤအကစၢ်အသ့ၣ်အ၀ၣ် ဒီး ပှၤလၢအသ့ၣ်အ၀ၣ် တအိၣ်ဘၣ်တဖၣ် ဘၣ်ပှ့ၤဝဲ ဒီး လဲၤဆှၢန့ၢ်အဝဲသ့ၣ် န့ၣ်လီၤ. လၢအပူၤကွံၥ်တဘျီန့ၣ် မၢဝဲသဝီဖိကျီန့ၢ်အီၤသ့ၣ်ဒီး၀ၣ် ဒီး စံးဝဲလၢ သါကဟ့ၣ်ဝဲအပှ့ၤ ဘၣ်ဆၣ် တဟ့ၣ်ဝဲဘၣ် ဒီး ခဲအံၤတဘျီ စံးဝဲလၢ ကဟ့ၣ်ဝဲအပှ့ၤ ဘၣ်ဆၣ် တမ့ၢ်လၢကဟ့ၣ်ဝဲဘၣ် ဒီး တၢ်ကဘၣ်လဲၤဆှၢန့ၢ်အဝဲသ့ၣ် အစဲၤခံကတၢၢ် လါစဲးပထ့ဘၢၣ် ၁၀ သီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

သုးကလၢၤလၢ အအိၣ်ဆီလီၤအသးဖဲ လ့က့ၣ်သဝီအပူၤအံၤန့ၣ် ဘၣ်တၢ်တီခိၣ်ရိၣ်မဲအီၤလၢ ခမရ-၄၀၆ သုးရ့ၣ်ခိၣ် ကၠီၤကၠီၤလၣ် ဂံၢ်ဘါ (၂၅) ဂၤ ဒီး သုးခိးကီၢ်ဆၢ သုးဒ့ခိၣ် ကၠီၣ်လဲ တီခိၣ်ရိၣ်မဲ ဂံၢ်ဘါ (၇၀) ဂၤ ခဲလၢၥ်ပၥ်ဖှိၣ် အိၣ်ဝဲ (၉၅) ဂၤအဂ့ၢ်န့ၣ်သ့ၣ်ညါဘၣ်န့ၣ်လီၤ.