သုးမီၤစိရိၤအသုး စုတီၤဖီလၥ် သုးခိးကီၢ်ဆၢ BGF-၁၀၁၃ သုးတဖၣ် မၢဆူၣ်ဝဲ ဒူသဝီကမျၢၢ် ပိၥ်မုၣ်ပိၥ်မၢၤ ဒီး ဖိဒံဖိသၣ်တဖၣ် ဖဲအဝဲသ့ၣ်ဆီတလဲအသုး အဆၢကတီၢ်

၂၀၂၁ နံၣ်, လါစဲးပထ့ဘၢၣ် ၂၃ သီ, ဒူသထူၣ်ကီၢ်ရ့ၣ်
သုးမီၤစိရိၤအသုး စုတီၤဖီလၥ် သုးခိးကီၢ်ဆၢ (BGF) သုးရ့ၣ်-၁၀၁၃, သုးဒ့ ၂ သုးခိၣ်ကတိ တီခိၣ်ရိၣ်မဲသုးတဖၣ် ဖဲလါစဲးပထ့ဘၢၣ် ၂၀ သီအနံၤန့ၣ် လၢကလဲၤဆီတလဲအသုးတဖၣ်အဂီၢ် မၢဆူၣ်ဝဲသဝီဖိ ပိၥ်မုၣ်ပိၥ်မၢၤ ဒီး ဖိဒံဖိသၣ် ၃၀၀ ဂၤ လၢသဝီ ၄ ဖျၢၣ် လၢကစိၥ်ဆှၢန့ၢ်အဝဲသ့ၣ် အတၢ်အီၣ်တၢ်အီ ဒီး တၢ်ဖိတၢ်လံၤတဖၣ် အဂီၢ်န့ၣ်လီၤ.

သဝီဖိလၢ တၢ်မၢန့ၢ်ဆူၣ်အီၤသ့ၣ်တဖၣ် အိၣ်ဆိးဝဲဒၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ဘံလ့ကီၢ်ဆၣ် တၢ်ပၢဟီၣ်ကဝီၤပူၤန့ၣ်လီၤ. သုးခိးကီၢ်ဆၢ (BGF) တဖုအံၤ မၢဆူၣ်ဝဲ ကိယွၤသဝီဖိ (၃၅) ဂၤ, ထံဖးဒိၣ်ထၣ်သဝီဖိ (၃၀) ဂၤ, ယိၤကျါသဝီဖိ (၆၇) ဂၤ ဒီး ကၠိဝဲသဝီဖိ (၁၀၀) ဘျဲၣ်န့ၣ်လီၤ. သဝီဖိလၢ တၢ်မၢဆူၣ်အီၤတဖၣ်အကျါ ပၣ်ဃုၥ်ဝဲဒၣ်ဒီး ဖိသၣ် လၢအသးနံၣ်တပှဲၤထီၣ်ဒံး (၁၈) နံၣ်ဘၣ် အိၣ်ဝဲ ၁၂ ဂၤအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘံလ့ကီၢ်ဆၣ် တၢ်ကစီၣ် ဒီး တၢ်ဘိးဘၣ်ရၤလီၤဝဲၤဒ့ ပှၤဘၣ်မူဘၣ်ဒါတဖၣ် ပၥ်ဖျါဝဲဒၣ်န့ၣ်လီၤ.

ပှၤလီၢ်ကဝီၤဖိ လၢတအဲၣ်ဒိးပၥ်ဖျါအမံၤဘၣ်တဂၤ စံးဝဲဒၣ်လၢ "အဝဲသ့ၣ် မၢဆူၣ်ဝဲ ပိၥ်မုၣ်ပိၥ်မၢၤ ဒီး ဖိဒံဖိသၣ်တဖၣ်န့ၣ် မ့ၢ်ဒ်သိး ကဒီသဒၢအသးအဂီၢ်န့ၣ်လီၤ. လၢပိၥ်မုၣ် ၂ ဂၤအဘၢၣ်စၢၤန့ၣ် ထၢနုၥ်ဝဲသုးဖိတဂၤ ဒီး ရဲၣ်လီၤဝဲဒ်န့ၣ်ဝံၤ ဒီး စးထီၣ်တၢ်လဲၤတၢ်က့ၤန့ၣ်လီၤ. မၤဝဲဒ်အံၤန့ၣ် မ့ၢ်ဒ်သိး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးတဖၣ် ခးအီၤသုတသ့တဂ့ၤ ဒီး တၢ်မ့ၢ်ခးအီၤဒၣ်လဲၣ် ကအိၣ်ဒီသဒၢအသးလၢ ကမျၢၢ်အဂီၢ်န့ၣ်လီၤ."

သုးမီၤစိရိၤအသုး ဒီး သုးခိးကီၢ်ဆၢ (BGF) သုးတဖၣ် ခီဖျိမၤအၢမၤနး ဒူသဝီကမျၢၢ် လၢအပူၤကွံၥ် အါနံၣ်အါလါလံအဃိ ဖဲသဝီဖိသ့ၣ်တဖၣ် မ့ၢ်နၢ်ဟူအကစီၣ်န့ၣ် ပှၤသဝီဖိ ပိၥ်ခွါတဖၣ် ဃ့ၢ်အိၣ်ခူသူၣ်အဃိ ဖဲအဝဲသ့ၣ် နုၥ်လီၤလၢသဝီပူၤ ဒီး တထံၣ်လၢၤပိၥ်ခွါတဖၣ်ဘၣ် န့ၣ်လီၤ. လၢတၢ်န့ၣ်အဃိ မၢဆူၣ်ဝဲ ပိၥ်မုၣ်ပိၥ်မၢၤ ဒီး ဖိသံဖိသၣ်တဖၣ် ဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ် ခိၣ်နၢ်ဘၣ်မူဘၣ်ဒါတဂၤ စံးဝဲဒၣ်န့ၣ်လီၤ.

ဖဲအပူၤကွံၥ် လါစဲးပထ့ဘၢၣ် ၁၄ သီ အနံၤစ့ၢ်ကီးန့ၣ် သုးခိးကီၢ်ဆၢ BGF-၁၀၁၃ သုးတဖၣ် ဖဲလဲၤဆီတလဲသုး လၢယိၤကျါသုးကလၢၤ အဆၢကတီၢ် မၢဆူၣ်ဝဲသဝီဖိ အကါတီၣ်တၢ် (၅) ခိၣ် ဃုၥ်ဒီး ကါကစၢ် လၢကတီၣ်န့ၢ်အတၢ်အီၣ်တၢ်အီ ဒီး တၢ်ဖိတၢ်လံၤအဂီၢ် ဒီး ကိးဃုၥ်စ့ၢ်ကီးဝဲ ဒူသဝီခိၣ်နၢ် ၆ ဂၤ လၢအဝဲသ့ၣ်တၢ်ဒီသဒၢ အဂီၢ်န့ၣ်လီၤ.