ခံသီအကတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး သုးမီၤစိရိၤ အဘၢၣ်စၢၤ တၢ်ခးလိၥ်သးကဲထီၣ်ဝဲ (၇) ဘျီ

၂၀၂၁ နံၣ်, လါစဲးပထ့ဘၢၣ် ၂၃ သီ, ခ့ၣ်အဲၣ်ယူၣ်-လီၢ်ခၢၣ်သး

၂၀၂၁ နံၣ် လါစဲးပထ့ဘၢၣ်ထီၣ် ၂၂ သီ တုၤ ၂၃ သီ အနံၤ သုးမီၤစိရိၤအသုး ခလရ (၆၀) အပှၤတဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ လၢကီၢ်ရ့ၣ် ချၢၣ်လွံၢ်ထူၣ် သုးက့ (၃) အဟီၣ်ကဝီၤပူၤအဃိ လၢ (၂) သီ အကတီၢ်ပူၤ တၢ်ခးလိၥ်သး ကဲထီၣ်ဝဲ (၇) ဘျီ လၢ ကညီတၢ်ထူၣ်ဖျဲးသုးမုၢ်ဒိၣ် ဒီး သုးမီၤစိရိၤအသုး သ့ၣ်တဖၣ်န့ၣ်လီၤ. သုးမီၤစိရိၤ ခလရ (၆၀) အသုးတဖၣ် ဟဲထီၣ်ဝဲလၢ ကညီတၢ်ထူၣ်ဖျဲး သုးမုၢ်ဒိၣ် ဟံးတၢ်ဘံၣ်တၢ်ဘၢအလီၢ် ဖဲ မၠ့ၤနံၤကိ ဒီး ဖယါလ့ကိ တၢ်လီၢ် ဒီး တၢ်ဘၣ်သဂၢၢ်ခးလိၥ်သး အိၣ်ထီၣ်ဝဲဒၣ်န့ၣ်လီၤ. တၢ်ဘၣ်သဂၢၢ်ခးလိၥ်သးအဖီခိၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် တကပၤ တၢ်ဘၣ်ဒိဘၣ်ထံး တအိၣ်နီတမံၤဘၣ် သုးမီၤစိရိၤတကပၤတခီ တၢ်ဘၣ်ဒိဘၣ်ထံး တၢ်သံတၢ်ပှၢ် အိၣ်ဝဲအဖီခိၣ် ပမၤလီၤတံၢ်အီၤ အဖၢမုၢ်န့ၣ်လီၤ. သုးမီၤစိရိၤအသုးသ့ၣ်တဖၣ် ဟံးန့ၢ်ဝဲဒၣ် တၢ်လီၢ်လၢ လီၢ်မုၥ်ပၢၤ သဝီပူၤ ဒီး အိၣ်ထၢၣ်ဂၢၢ်ဝဲဒၣ်လၢ သဝီပူၤန့ၣ်လီၤ.
ကမျၢၢ်ဖိလၢ အိၣ်ဘူးဖဲ တၢ်ခးလိၥ်သး ကဲထီၣ်အလီၢ်တဖၣ် ဘၣ်ဃ့ၢ်ထီၣ်ကွံၥ်ဝဲဒၣ်န့ၣ်လီၤ. သဝီလၢဘၣ်ဃ့ၢ်တဖၣ် မ့ၢ်ဝဲ လီၢ်မုၥ်သီလီၢ်မုၥ်ပၢၤသဝီ ဒီး ဒူသဝီ ဒ်အမ့ၢ် (အ့နဲၣ်), (ကမိအဲၤ) သဝီသ့ၣ်တဖၣ် ဘၣ်အိၣ်လၢ တၢ်ပျံၤတၢ်ဖုး တၢ်ဘၣ်ယိၣ်ဘၣ်ဘီ အပူၤန့ၣ်လီၤ.