ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဟီၣ်ကဝီၤ သုးက့ (၁) ဒီး သုးက့ (၃) တၢ်ဒုးကစီၣ်

၂၀၂၁ နံၣ်, လါစဲးပထ့ဘၢၣ် ၂၅ သီ, ခ့ၣ်အဲၣ်ယူၣ်-လီၢ်ခၢၣ်သး

၂၀၂၁ နံၣ် လါစဲးပထ့ဘၢၣ် ၂၂ သီအနံၤ ဟါခီ ၄း၅ မံးနံး အဆၢကတီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ် ဒူသထူၣ်, သုးက့ (၁) လီၢ်ကဝီၤသုးတဖၣ် ဘၣ်သဂၢၢ်ခးလိၥ်အသး ဒီး သုးမီၤစိရိၤအသုး ဖဲသ့ၣ်စရး သိလ့ၣ်ကျဲဖီခိၣ် န့ၣ်လီၤ. သုးမီၤစိရိၤအသုး သံဝဲ (၂၅) ဂၤ ဒီး ဘၣ်ဒိဝဲနးနးကလဲၥ် (၅) ဂၤ ဒီး သုးမီၤစိရိၤ အသုးသိလ့ၣ် ဟးဂီၤဝဲဒၣ် (၁) ခိၣ် န့ၣ်လီၤ. ကညီတၢ်ထူၣ်ဖျဲးသုးမုၢ်ဒိၣ် တကပၤ တၢ်ဘၣ်ဒိဘၣ်ထံး တအိၣ်ဝဲဘၣ်န့ၣ်လီၤ. ဖဲတၢ်ခးလိၥ်သး ကဲထီၣ်ဝဲ၀ံၤအလီၢ်ခံ သုးမီၤစိရိၤအသုး လၢဟဲထီၣ်လူၤက့ၤအသကိးတဖၣ် ခးကမၣ်လိၥ်က့ၤအသး ဒီး ဘၣ်ဝဲကမျၢၢ်ဖိ အသိလ့ၣ်တခိၣ် ဘၣ်ဒိဃုၥ်စ့ၢ်ကီး ကမျၢၢ်ဖိ (၃) ဂၤန့ၣ်လီၤ.

လၢချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤစ့ၢ်ကီး တလါအံၤ ၂၂ သီတုၤ ၂၄ သီ လၢ (၃) သီ အကတီၢ်ပူၤ ကညီတၢ်ထူၣ်ဖျဲး သုးမုၢ်ဒိၣ် ဒီး သုးမီၤစိရိၤ အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ခဲလၢၥ် (၉) ဘျီန့ၣ်လီၤ. သုးမီၤစိရိၤအသုးသ့ၣ်တဖၣ် အတၢ်ရဲၣ်တၢ်ကျဲၤအိၣ်ဝဲလၢ ကဟဲထီၣ်ဟံးန့ၢ်ဝဲ ကညီတၢ်ထူၣ်ဖျဲးသုးမုၢ်ဒိၣ် တၢ်လီၢ် ဒ်အမ့ၢ် မြေနီကုန်း ဒီး ဘုရၥးလေးကုန်း တၢ်လီၢ်သ့ၣ်တဖၣ်န့ၣ်လီၤ. ဖဲဟဲထီၣ်ဝဲအဆၢကတီၢ် တၢ်ဘၣ်သဂၢၢ်ခးလိၥ်သး အိၣ်ထီၣ် ဒီး သုးမီၤစိရိၤအသုးတကပၤ တၢ်ဘၣ်ဒိဘၣ်ထံး အါအဃိ ဖဲ ၂၄-၉-၂၀၂၁ နံၤ ဂုၤက့ၤအခံတနီၤ ဒီး ၂၅-၉-၂၀၂၁ နံၤ ဂုၤက့ၤအခံ ခဲလၢၥ်န့ၣ်လီၤ. ကညီတၢ်ထူၣ်ဖျဲးသုးမုၢ်ဒိၣ် လဲၤသမံသမိးကွၢ်က့ၤဝဲ သုးမီၤစိရိၤအလီၢ်အကျဲ ဒီး ထံၣ်ဝဲသုးမီၤစိရိၤအသုး သံအစိၣ် (၅) ဂၤ ဒီး ကညီတၢ်ထူၣ်ဖျဲးသုးမုၢ်ဒိၣ် သုးရ့ၣ် (၉) လီၢ်ကဝီၤသုးသ့ၣ်တဖၣ် ခူၣ်လီၤက့ၤဝဲ သုးမီၤစိရိၤအသုးသံစိၣ် (၅) ဂၤအံၤန့ၣ်လီၤ.

ကမျၢၢ်ဖိ လၢဃ့ၢ်မှံဟးဖျိး ဖဲတၢ်ဒုးကဲထီၣ်အဆၢကတီၢ်တဖၣ် အိၣ်ဒံးဒၣ်လၢ တၢ်အိၣ်ခူသူၣ်အလီၢ်န့ၣ်လီၤ. တၢ်စူၤအါအဃိ ကမျၢၢ်ဖိလၢ ဃ့ၢ်အိၣ်ခူသူၣ်တဖၣ် ဘၣ်ကွၢ်ဆၢၣ်မဲၥ် ဒီး တၢ်ကီတၢ်ခဲ အါမးန့ၣ်လီၤ.