သုးမီၤစိရိၤ တမၤထွဲ အလံၥ်ဘိးဘၣ်ရၤလီၤ လၢကပတုၥ်အါထီၣ် တၢ်ဒုး လၢ (၅) လါကတီၢ်ပူၤအဃိ တၢ်ဘၣ်သဂၢၢ်ခးလိၥ်သး ဆဲးအိၣ်ထီၣ်ကဒီးဝဲ

၂၀၂၁ နံၣ်, လါအီးကထိဘၢၣ် ၇ သီ, ခ့ၣ်အဲၣ်ယူၣ်-လီၢ်ခၢၣ်သး
သုးမီၤစိရိၤ လၢအဟံးန့ၢ်ဆူၣ် တၢ်စိတၢ်ကမီၤတဖၣ် ဘိးဘၣ်ရၤလီၤဝဲလၢ အတၢ်ကစီၣ်သန့အပူၤ လၢကမၤအါထီၣ်ဝဲ တၢ်ပတုၥ်တၢ်ဒုး (၅) လါတီၢ်ပူၤ စးထီၣ် ၂၀၂၁ နံၣ် လါအီးကထိဘၢၣ် (၁) သီအနံၤ တုၤ ၂၀၂၂ နံၣ် လါဖ့ၤဘြူၤအါရံၤ (၂၈) သီအနံၤန့ၣ်လီၤ. သုးမီၤစိရိၤ အတၢ်ဘိးဘၣ်ရၤလီၤ လၢကပတုၥ်တၢ်ဒုးအံၤ မ့ၢ်ဒၣ်တၢ်ရၤလီၤလၢ တအိၣ်ဒီးတၢ်မၤထွဲဘၣ် န့ၣ်လီၤ. သုးမီၤစိရိၤအသုး လၢအိၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤတဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး တၢ်မၤထီဒါ ဟီၣ်ခိၣ်ဖိခွဲးယၥ် တပယူၥ်ဃီန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် ကီးတရံးကီၢ်ဆၣ် ဟီၣ်ကဝီၤပူၤ ဖဲ ၂၀၂၁ နံၣ် လါအီးကထိဘၢၣ်ထီၣ် (၁) သီအနံၤ သုးမီၤစိရိၤအသုး လၢအမ့ၢ် (ခလရ-၂၃၁) အသုးတဖၣ် ခးလီၤဝဲကျိဖးဒိၣ် လၢ ကီးနွဲၣ်သဝီပူၤ ဒီး ဘၣ်ဒိဝဲကမျၢၢ်ဖိတဂၤ လၢအမံၤမ့ၢ်ဝဲ နီၢ်မးခၠ့ၣ် တကးဒံးဘၣ် ဘၣ်ဒိဃုၥ်ဒီးကမျၢၢ်ဖိ အကျီၢ် (၃) ဒုန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်, ဝီၢ်ရ့ၣ်ကီၢ်ဆၣ်ဟီၣ်ကဝီၤပူၤစ့ၢ်ကီး ဖဲ ၂၀၂၁ နံၣ် လါအီးကထိဘၢၣ်ထီၣ် ၂ သီအနံၤ သုးမီၤစိရိၤအသုး လၢအိၣ်ဖဲ ဝဲကလံး အ (G1) စိုးမင်း ဒီး မွန်ပြည်သူ့ကၥကွယ်ရေးတပ်ဖွဲ့ နိုင်ချၥယ်ရီ ပၥ်ဖှိၣ်ထီၣ်အသး ဒီး သမံသမိးဝဲ အပြင်စခန်းကြီး ကမျၢၢ်ဖိသိလ့ၣ် ဒီး ဆဲၣ်ကဲၣ်သ့ၣ်တဖၣ်ဝံၤ ဖီၣ်ဟံဃၥ်ဝဲ ကမျၢၢ်ဖိအသိလ့ၣ် (၅) ခိၣ် ဒီး ဆဲၣ်ကဲၣ် (၂) ခိၣ် တကးဘၣ် က့ၤဖီၣ်ဃုၥ်ဝဲ ကမျၢၢ်ဖိ (၃) ဂၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် ဟီၣ်ကဝီၤပူၤ ဖဲ ၂-၁၀-၂၀၂၁ နံၤ သုးခိးကီၢ်ဆၢ သုးရ့ၣ် (၁၀၁၄) သုးရ့ၣ်ခိၣ် မီၣ်ခၠံး အစုဒုၣ်တီၤဖီလၥ် (ဖါသၣ်ဘဲ) ဒီး အပှၤတဖၣ် ခးလီၤဝဲကျိဖးဒိၣ်ဆူ ဖီထံခုၣ်သဝီဖိတဖၣ် အတၢ်ဖံးအီၣ်မၤအီၣ်အလီၢ်အကျဲ ဒီး ဟးဒိးလီၤဃုၥ်မ့ၣ်ပိၢ် လၢကမျၢၢ်ဖိအကီၣ်ကျီးပူၤအဃိ ကမျၢၢ်ဖိသ့ၣ်တဖၣ် ဘၣ်အိၣ်မူ လဲၤက့ၤလၢ တၢ်ပျံၤတၢ်ဖုးအပူၤန့ၣ်လီၤ. ၃-၁၀-၂၀၂၁ နံၤ သုးမီၤစိရိၤအသုး လၢဟံကျဲတၢ်ဘံၣ်တၢ်ဘၢ ဖဲ ခီဖူးကျဲတဒူၣ် ခးပျံၤခးဖုးဝဲ ထိၣ်ဖိပၢ်ဒၢ သဝီဖိ လၢအလဲၤဖံးလဲၤမၤတၢ်လၢ အစံၥ်အခုးတဖၣ် ဒီး ကမျၢၢ်ဖိ လၢလဲၤတၢ်က့ၤတၢ်လၢ အထံၣ်ဝဲတဖၣ် သမံသမိးဝဲ ဟံးဃၥ်ဝဲအနီၣ်ဂံၢ်နီၣ်ဒွး ဒီး ခးပျံၤဝဲကမျၢၢ်လၢ ကျိဖိကအိၣ်အထံၣ် (၄၀) ဘျဲၣ်န့ၣ်လီၤ.
၄-၁၀-၂၀၂၁ နံၤ သုးမီၤစိရိၤအသုး စကခ-၈ ခမရ-၄၀၅ အိၣ်ဖဲမဲးပြံးခံ ဒီး ဟဲထီၣ်တုၤ (တန့) သဝီ အဆၢကတီၢ် ကွဲန့ၢ်ဆူၣ်ဝဲ တန့သဝီသးစၢ်ပိၥ်ခွါ (၁၈) ဂၤ မၢဝဲအတၢ်ဝံန့ၢ်အီၤ တၢ်အီၣ် ဒီး နဲၣ်န့ၣ်အီၤကျဲ တုၤမဲၥ်က၀ၥ်ထၣ်သဝီ ၀ံၤပျဲက့ၤဝဲန့ၣ်လီၤ. ဖဲ ၅-၁၀-၂၀၂၁ နံၤ ကိးန့ၢ်ဆူၣ်ကဒီးဝဲ မဲၥ်က၀ၥ်ထၣ် သဝီဖိ (၅) ဂၤ, မုၣ် (၄) ဂၤ, ခွါ (၁) ဂၤ ဒီး ဟဲထီၣ်တုၤ ၀ၣ်ဃးထၣ်သဝီ ၀ံၤပျဲက့ၤဝဲဒၣ်န့ၣ်လီၤ. ကီးန့ၢ်ဆူၣ်ကဒီး ဝဲ၀ၣ်ဃးထၣ်သဝီဖိ (၁၄) ဂၤ ဒီး ဟဲထီၣ်ဝဲတုၤ ဝီၢ်ဝံၢ်လ့သဝီ ၀ံၤပျဲက့ၤဝဲ ဒီး ကီးန့ၢ်ဆူၣ်ကဒီး ဝီၢ်ဝံၢ်လ့ သဝီဖိ (၆) ဂၤ, မုၣ် (၄) ဂၤ, ခွါ (၂) ဂၤ ဟဲထီၣ်ဆူ ခူၣ်သူၣ်ထၣ် န့ၣ်လီၤ. ၀ီၢ်ဝံၢ်လ့သဝီဖိ (၆) ဂၤ တုၤခဲအံၤ သုးမီၤစိရိၤအသုးတဖၣ် တပျဲက့ၤဝဲဒံးဘၣ်န့ၣ်လီၤ.
၄-၁၀-၂၀၂၁ နံၤ သုးမီၤစိရိၤအသုး စကခ (၈), ခမရ-၄၀၆ အိၣ်ကူဆ့း လဲၤထီၣ် ဖၣ်ပူၣ် တုၤ ဝ့ၤမိၤ ဒီး ဝ့ၤဆၤ တၢ်ဘၢၣ်စၢၤ ခးနါစိၤကျိဖးဒိၣ် (၃၁) ဖျၢၣ်, ကျိဖိကအိၣ်အထံၣ် (၁၀၀၀) ဘျဲၣ် ခးလီၤ ဝ့ၤမိၤသဝီဃၢၤ ကမျၢၢ်ဖိတၢ်ဖံးအီၣ်တၢ်မၤအီၣ်လီၢ်ကျဲ, ကမျၢၢ်ဖိ စံၥ်ဒဲ ဘၣ်ဝဲသဝီဖိ အကျီၢ် (၇) ဒု, သံ (၁) ဒု, ဘၣ်ဒိ (၆) ဒုန့ၣ်လီၤ. ဘၣ်ဟးဂီၤစ့ၢ်ကီးဝဲ ၀့ၤမိၤသဝီ ကမျၢၢ်ဖိ အဟံၣ် (၃၆) ဖျၢၣ်, ဘၣ်ဟးဂီၤဃုၥ်ကၠိ (၁) ဖျၢၣ်, ဖၠၣ် (၁) ဖျၢၣ်, ရေကန် (၁) ဖျၢၣ် န့ၣ်လီၤ. ဘၣ်ဟးဂီၤဃုၥ်ကမျၢၢ်ဖိ အဆဲၣ်ကၢၣ် (၃) ခိၣ် ဒီး ခးဘၣ်ဒိဝဲ စဲၣ်ကဲၣ်ကစၢ် (၁) ဂၤန့ၣ်လီၤ. ဘၣ်ဟးဂီၤဃုၥ် ကမျၢၢ်ဖိအသိလ့ၣ် (၁) ခိၣ်, စဲးထဲၣ်တၢ် တဖျၢၣ်န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ် ဟီၣ်ကဝီၤပူၤစ့ၢ်ကီး ဖဲ ၃-၁၀-၂၀၂၁ နံၤ သုးမီၤစိရိၤအသုးသ့ၣ်တဖၣ် ခးဝဲသဝီဖိတဂၤ ဖဲအဒိးဆဲၣ်ကၢၣ် အဆၢကတီၢ်န့ၣ်လီၤ.
သုးမီၤစိရိၤအသုးတဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး မၤဘၣ်ဒိဝဲ ဟီၣ်ခိၣ်ဖိခွဲးယၥ်အဃိ လၢတၢ်ဒီသဒၢလီၤက့ၤဟီၣ်ကဝီၤ ဒီး ကမျၢၢ်ဖိအသးသမူ တၢ်ဘံၣ်တၢ်ဘၢအဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤ ဒ်အမ့ၢ် ကီၢ်ရ့ၣ်ဒူသထူၣ် သုးက့ (၁), မုၢ်တြီၢ်ကီၢ်ရ့ၣ် သုးက့ (၅), ကီၢ်ရ့ၣ်ဒူပျၥ်ယၥ် သုးက့ (၆) ဟီၣ်ကဝီၤပူၤတဖၣ် လၢ (၄) သီအကတီၢ်ပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲလၢ ကညီတၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) ဒီး သုးမီၤစိရိၤအသုးတဖၣ် အဘၢၣ်စၢၤ ခဲလၢၥ်အိၣ်ဝဲ (၂၈) ဘျီ ဒီး သုးမီၤစိရိၤအသုး သံဝဲ (၂၃) ဂၤဘၣ်ဒိဝဲ (၂၆) ဂၤန့ၣ်လီၤ.