ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်, သုးက့ (၁) ဟီၣ်ကဝီၤပူၤ သုးမီၤစိရိၤအတၢ်ဟူးတၢ်ဂဲၤ ဒီး တၢ်မၤထီဒါ ပှၤဂ့ၢ်ဝီခွဲးယၥ်တဖၣ်

၂၀၂၁ နံၣ်, လါအီးကထိဘၢၣ် ၂၃ သီ, ခ့ၣ်အဲၣ်ယူၣ်-လီၢ်ခၢၣ်သး

ဖဲလါအီးကထိဘၢၣ် ၂၁ သီ အနံၤန့ၣ် သုးမီၤစိရိၤအသုး စကခ (၈) စုတီၤဖီလၥ် ခမရ (၄၀၆), သုးကျိၤနီၣ်ဂံၢ် (၂) လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်ဒိၣ်ဖိ ကၠီၣ်ထိည့ ဂံၢ်ဘါ (၂၂) ဂၤ ဒီး သုးခိးကီၢ်ဆၢ (BGF-1013) လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်ဂီၢ်ဂ့ၢ် ၀ၣ်သိ ဂံၢ်ဘါ (၃၀) ဂၤတဖၣ် ဒ်သိးကနုၥ်လီၤဟူးဂဲၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, သုးက့-၁, ဘ့လ့ကီၢ်ဆၣ် ဟီၣ်ကဝီၤပူၤအဂီၢ် စးထီၣ်ဟးထီၣ်ဝဲလၢ တးပီသုးကလၢၤန့ၣ်လီၤ. ဖဲစးထီၣ်ဟးထီၣ်လၢ တးပီသုးကလၢၤပူၤအခါ ကိးန့ၢ်ဆူၣ်ဝဲ သဝီဖိ ၅ ဂၤ လၢကလဲၤဃုၥ်တၢ်ဒီးအီၤ ဒီး ဒုးနဲၣ်အဝဲသ့ၣ်အကျဲ, တကးဘၣ် လၢကပၥ်သဝီဖိတဖၣ်လၢ အဝဲသ့ၣ်အတၢ်ဒီသဒၢ အဂီၢ်န့ၣ်လီၤ.
သုးတဖုအံၤ ဖဲအလဲၤတုၤလၢ ကါမဲသဝီအခါ ခးသံဝဲဒၣ် ကါမဲသဝီဖိ နီၢ်မံၣ်စါအ့ အပနၢ် (၁) ဒုန့ၣ်လီၤ. တၢ်န့ၣ်ဝံၤအလီၢ်ခံ ဂုၥ်န့ၢ်ဆူၣ်ဝဲ လီတဲစိ (၂) ဖျၢၣ် လၢသဝီဖိ (၂) ဂၤအအိၣ်ဝံၤ, နုၥ်လီၤဂုၥ်န့ၢ်ဆူၣ်တၢ်လၢ ပှၤကျးပူၤ ဒီး ဟံးန့ၢ်ဝဲ လီတဲစိအစ့ကးဒ် တဖၣ် လီၤတဲဝဲလၢစ့ပယီၤ (၈၀၀၀၀) ကၠး ဒီး ကိးန့ၢ်ဆူၣ်ကဒီးဝဲ သဝီဖိ (၈) ဂၤန့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, သထူၣ်ကီၢ်ဆၣ် ဟီၣ်ကဝီၤပူၤ သုးမီၤစိရိၤအသုး စကခ (၈) စုတီၤဖီလၥ် ခမရ (၄၀၆) လၢအဘၣ်တၢ်တီခိၣ်ရိၣ်မဲအီၤလၢ ဝ့ၤယၤအူ တဖုအံၤ ဒွဲၣ်အူကွံၥ်ဝဲ မီကျိသဝီ နီၢ်အဲၣ်ဖီ အဟံၣ်, လၢတၢ်ဂ့ၢ်တၢ်ကျိၤ တအိၣ်နီတမံၤဘၣ်န့ၣ်လီၤ.

ခီဖျိ သုးမီၤစိရိၤအသုးတဖၣ် ဟူးဂဲၤဝဲ သုးဂ့ၢ်ဝီတၢ်ဟူးတၢ်ဂဲၤ ဒီး မၤထီဒါဝဲ ဟီၣ်ခိၣ်ဖိခွဲးယၥ်တဖၣ်အဃိ လၢတၢ်ဒီသဒၢက့ၤဟီၣ်ကဝီၤ ဒီး ကမျၢၢ်ဖိတဖၣ်အဂီၢ် တၢ်ဒုးကဲထီၣ်ဝဲ ဒီး သုးက့ (၁) ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် အသုးတဖၣ် လၢအသီ (၂၀) အတီၢ်ပူၤ တၢ်ဒုးကဲထီၣ်ဝဲ (၃၀) ဘျီ ဒီး သုးမီၤစိရိၤအသုးတကပၤ သံဝဲ (၄၅) ဂၤ ဒီး ဘၣ်ဒိဝဲ (၂၈) ဂၤန့ၣ်လီၤ. လၢသုးက့ ၁ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်တကပၤ သိၣ်ဒူ (၂) ဂၤ ဘၣ်ဟ့ၣ်လီၤကွံၥ်အသးသမူ လၢထံကီၢ်ဒီးကလုၥ်အဂီၢ် န့ၣ်လီၤ.