တၢ်ကစီၣ်တဖၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ (၁၅) သီကတီၢ်ပူၤ တၢ်ဒုးကစီၣ် ဒီး သုးမီၤစိရိၤအသုး တၢ်မၤထီဒါကမျၢၢ်ဖိခွဲးယၥ် သ့ၣ်တဖၣ်
ခ့ၣ်အဲၣ်ယူၣ်-လီၢ်ခၢၣ်သး
၂၀၂၁ နံၣ်, လါဒံၣ်စ့ဘၢၣ် ၁၇ သီ
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် ဝီၢ်ရ့ၣ်ကီၢ်ဆၣ် သုးရ့ၣ် (၁၆) ဟီၣ်ကဝီၤပူၤ ဖဲလါဒံၣ်စ့ဘၢၣ် (၂) သီအနံၤ သုးမီၤစိရိၤအသုး (ခလရ-၁၀၆) အသုးသ့ၣ်တဖၣ် ဖီၣ်ကိးဆူၣ်ဝဲ တခါသံၣ်သဝီဖိ (၁) ဂၤ, ပနဲၣ်တီၣ် သဝီဖိ (၇) ဂၤ, ရွၥသၥအေး သဝီဖိ (၃) ဂၤ, ၀ၣ်ပီၣ်သဝီဖိ (၁) ဂၤ, ခဲလၢၥ် (၁၂) ဂၤ ဒီး မၢဝဲသဝီဖိတဖၣ် ဟးဒုးနဲၣ်န့ၢ်အကျဲ ဒီး သူဝဲသဝီဖိလၢ ကကဲထီၣ်တၢ်ဒီသဒၢ လၢအသုးကျိၤဟးဟူးဂဲၤ အဂီၢ်န့ၣ်လီၤ. သဝီဖိလၢ သုးမီၤစိရိၤ ကွဲဆူၣ်အီၤတဖၣ် ဘၣ်ဟးပိၥ်အဝဲသ့ၣ်အခံ တုၤလါဒံၣ်စ့ဘၢၣ် (၇) သီအနံၤ ဒီး ပျၢ်ကွံၥ်ဝဲ သဝီဖိတဖၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, မုၢ်တြီၢ်ကီၢ်ရ့ၣ်, ဒွဲၣ်လိကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် (၃) သီအနံၤ သုးမီၤစိရိၤအသုး (စကခ-၈), (ခမရ-၄၀၉-၄၀၈) အပှၤ ဒီး (တပ်မ-၂၂) အပှၤ လၢဟဲထီၣ်ဟံကျဲတၢ်ဘံၣ်တၢ်ဘၢ ဖဲကစၢၢ်သၢဖျၢၣ် ဒီး မးထီ ဘၢၣ်စၢၤတဖၣ် ခးနါစိၤကျိဒိၣ် (၄၀) ဘျဲၣ်, ကျိဖိ (၁၀၀၀) ဘျဲၣ် လၢကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲ, ကမျၢၢ်ဖိတၢ်လဲၤတၢ်က့ၤကျဲ န့ၣ်လီၤ.
ဒွဲၣ်လိကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် (၄) သီအနံၤ သုးမီၤစိရိၤအသုး (စကခ-၈, ခမရ-၄၀၇) အသုးရ့ၣ်ခိၣ် (ဇေၥ်မင်းထက်) လၢအိၣ်ဆီလီၤအသးဖဲ မးထီသဝီတဖၣ် မၢဝဲအပှၤ ခးလီၤကျိဖးဒိၣ်ဆူ သွၣ်ခိၣ်လိၥ်သဝီ ကမျၢၢ်ထံဖိကီၢ်ဖိ တၢ်ဖံးအီၣ်မၤအီၣ်လီၢ်ကျဲ န့ၣ်လီၤ. ခးလီၤဝဲကျိဖးဒိၣ် ခဲလၢၥ် (၆) ဖျၢၣ် ဒီး ကမျၢၢ်ဖိသ့ၣ်တဖၣ် ဘၣ်ပျံၤဘၣ်ဖုးတၢ် ဒီး လဲၤက့ၤဖံးမၤဝဲ တဘူၣ်လၢၤဘၣ် န့ၣ်လီၤ. တနံၤဃီအကတီၢ်ပူၤ သုးခိးကီၢ်ဆၢ (BGF) သုးရ့ၣ် ၁၀၁၄, စုတီၤဖီလၥ် အသုးတမှံၤ လၢဟဲအိၣ်မူဒါဖဲ (တပ်နယ်-၃) အပှၤတဖၣ် ဖီၣ်ဝဲကမၢၢ်ဖိ လၢလဲၤလီၤဆါကီၣ်ဘ့ၣ်ဖိ (၈) ဂၤဝံၤ ထိဝဲ, မၤဒၢၣ်ဝဲ တကးဘၣ် ဃ့အီၣ်လီးဝဲ စ့ပယီၤ တဂၤတကလီၢ်ကၠး န့ၣ်လီၤ. သုးခိးကီၢ်ဆၢ (တပ်နယ်-၃) အပှၤသ့ၣ်တဖၣ် ဒိးလီၤပၥ်ဝဲ မ့ၣ်ပိၢ်တဲးပိ ဖဲပှၤကျီၢ်အီၣ်ဆၣ်ကျီးပူၤ အဃိ ဘၣ်ဝဲ စီၤမီၤမၠ့ၣ် အကျီၢ်ဖါတဒု တသံတဘျီဃီဘၣ် ဒီး ခးသံဝဲလၢကျိဝံၤ မၤအီၣ်ဝဲအညၣ် န့ၣ်လီၤ.
ဒွဲၣ်လိကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် (၅) သီအနံၤ သုးမီၤစိရိၤအသုး (စကခ-၈, ခမရ-၄၀၇) သုးရ့ၣ်ခိၣ် (ဇေၥ်မင်းထက်) ဒွဲၣ်အူဝဲ မးထီသဝီဖိ နီၣ်မုၥ်ဆံး အဟံၣ်တဖျၢၣ်န့ၣ်လီၤ. တနံၤဃီအကတီၢ်ပူၤ သုးခိးကီၢ်ဆၢ (BGF) အသုးရ့ၣ်-၁၀၁၄, သုးခိၣ်မီၤခၠံး အသုးတမှံၤလၢ အအိၣ်မူဒါ အသုးထံး (၁၀၁၉), အသုးကျိၤခိၣ်ခံ လၢအဘၣ်တၢ်တီခိၣ်ရိၣ်မဲအီၤလၢ (ဖုတူၥ်) အိၣ်ဖဲ မီကိၢ်သဝီတဖၣ် ဖီၣ်ဃံးဝဲသဝီသးပှၢ်တဖၣ် လၢ (၃) သီတဘျီ ပှၤသဝီဖိသ့ၣ်တဖၣ် ကဘၣ်လဲၤဆှၢနၢ့်အီၤ တၢ်ကစီၣ်န့ၣ်လီၤ. မ့မ့ၢ်သဝီသးပှၢ်တဖၣ် ကဘၣ်လဲၤဆှၢန့ၢ်အဝဲသ့ၣ် တၢ်ကစီၣ် တနွံတဘျီ ကိးနွံဒဲးန့ၣ်လီၤ. ဒူသဝီလၢ ကဘၣ်လဲၤဆှၢတၢ်ကစီၣ်တဖၣ် မ့ၢ်ဝဲ မဲၤကၠံၣ်ခံ, တရီပူၢ်, ကၠိဒ့, လ့ဖိထၣ်မုၣ်ထီၣ်သဝီ သ့ၣ်တဖၣ်န့ၣ်လီၤ. (BGF) အသုးတဖုအံၤ ဖီၣ်ဃံးဝဲ ကမျၢၢ်ထံဖိကီၢ်ဖိ ဒ်အံၤအဃိ ကဲထီၣ်ဝဲ တၢ်ကီတၢ်ခဲ လၢကမျၢၢ်အဂီၢ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်, ဖၣ်အၣ်ကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် (၆) သီအနံၤ သုးခိးကီၢ်ဆၢ သုးရ့ၣ်-၁၀၁၄ လၢအဟဲဆီလီၤအသးဖဲ ချၢၣ်ဃဲးသဝီ လၢအဘၣ်တၢ်တီခိၣ်ရိၣ်မဲအီၤလၢ သုးဒ့ (၂) သုးဒ့ခိၣ် တ့ၣ်ဝ့ အပှၤလၢအမ့ၢ် ဖါကနုၥ် ဒီး မိဟ့ တဖၣ်, မၣ်လိၥ်ချၢၣ်ဃဲး, ပြၢးကီး, ၀ၣ်မံၤပှၢ် သဝီသးပှၢ်သ့ၣ်တဖၣ် ဖဲချၢၣ်ဃဲးအသုးကလၢၤတၢ်လီၢ် ဒီး တဲဝဲလၢ ကီၢ်သူၤလ့ၤအသုး ဟဲသဝီဖိတလဲၤဟ့ၣ်အဝဲသ့ၣ် အတၢ်ကစီၣ်ဘၣ်အဃိ ဃ့ဆူၣ်ဝဲသဝီ (၃) ဖျၢၣ်အံၤ ထိး (၅) မၢတဒု, အပှ့ၤလီၤလၢ (၃၅၀၀၀၀) ကၠးန့ၣ်လီၤ. တကးဒံးဘၣ် လၢအဝဲသ့ၣ်တဖၣ် ကဘှီဂ့ၤထီၣ်အသုးကလၢၤအဂီၢ် ဃ့ဆူၣ်ကဒီးဝဲ ၀ၣ်မံၤပှၢ်သဝီ သ့ၣ် (၆) ပၣ်ကါခံခိၣ်, ပြၢးကီးသဝီ သ့ၣ် (၆) ပၣ်ကါခံခိၣ်, ချၢၣ်ဃဲးသဝီ သ့ၣ် (၆) ပၣ်ကါတခိၣ် န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ်ထီၣ် (၇) သီအနံၤ သုးမီၤစိရိၤအသုး (ခလရ-၇၅) အိၣ်ဖဲ ခုၣ်သ့ၣ်စိ သ့ၣ်တဖၣ် ခးလီၤဝဲကျိဖးဒိၣ် , ကျိဖိ လၢမုၢ်သဲၣ်သဝီပူၤ ဒီး ဘၣ်ဒိဝဲ မုၢ်သဲၣ်သဝီဖိ စီၤန့ၢ်ကၠဲၣ်မူ (၂၃) နံၣ်, ဘၣ်ဝဲအသးနါပှၢ် အစ့ၣ်တကပၤ, စီၤလွဲနၢ့်မူ (၁၁) နံၣ်, ဘၣ်ဝဲအခီၣ်စ့ၣ် ခီၣ်မုၢ်တူၢ်တဘိ, နီၢ်ဘှၣ့်ပစီၤစိ (၁၁) နံၣ်, ဘၣ်ဝဲအခီၣ်စ့ၣ် အကံၢ်ဒုၣ် န့ၣ်လီၤ.
မုၢ်တြီၢ်ကီၢ်ရ့ၣ်, ဒွဲၣ်လိကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် (၇) သီအနံၤ သုးမီၤစိရိၤအသုး ဒီး (BGF) သုး လၢဟံကျဲတၢ်ဘံၣ်တၢ်ဘၢ စးထီၣ် ကစၢၢ်သၢဖျၢၣ် တုၤ ကူဆံးတဖၣ် ခးနါစိၤကဒီးဝဲ ကျိဖးဒိၣ် အထံၣ် (၄၀) ဘျဲၣ် ဒီး ကျိဖိ အါထံၣ် လၢကမျၢၢ်ဖိ တၢ်ဖံးအီၣ်မၤအီၣ်အလီၢ်အကျဲ ဒီး ကါကျဲမုၢ်နုၥ်, မုၢ်ထီၣ်တၢ်လီၢ်သ့ၣ်တဖၣ် န့ၣ်လီၤ.
ဒူပျၥ်ယၥ်ကီၢ်ရ့ၣ်, ဝီၢ်ရ့ၣ်ကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် (၈) သီအနံၤ ဂီၤခီ (၀၆း၀၀) ဆၢကတီၢ် သုးမီၤစိရိၤအသုး (ခလရ-၁၆၀) အိၣ်ဖဲ လဲၤဖူဃိၣ်ခိၣ်တဖၣ် နုၥ်လီၤဝဲဆူ လဲၤဖူသဝီ ဖဲ (၁၁း၀၀) ဆၢကတီၢ် ဒီး ဒွဲၣ်အူထီၣ်ဝဲ လဲၤဖူသဝီဖိ အဟံၣ် (၃) ဖျၢၣ် လၢအမ့ၢ်ဝဲ မၣ်လၣ်အ့, ဖံဃဲၤ ဒီး မ့ၣ်ရွ့ၣ်အူ အဟံၣ်သ့ၣ်တဖၣ် န့ၣ်လီၤ.
မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ်ထီၣ် အသီ (၁၀) အနံၤ သုးမီၤစိရိၤအသုး (စကခ-၈, ခမရ-၄၀၇) အိၣ် ငါဖဲအ့ၤစူၣ် တဖၣ်, ဖီၣ်ဃၣ်ဝဲ တဒွံခိၣ်သဝီဖိ စီၤထူထူ ဖဲအလဲၤပှ့ၤအီၣ်တၢ်လၢ ငါအ့ၤစူၣ် အခါန့ၣ်လီၤ. စးထီၣ်ဖီၣ်ဝဲဖဲ ဟါခီ (၂) နၣ်ရံၣ် အဆၢကတီၢ် ဒီး ဖဲဟါခီ (၄) နၣ်ရံၣ် အဆၢကတီၢ် ထိဝဲအမဲၥ်သၣ်ဝံၤ ပျၢ်က့ၤကွံၥ်ဝဲဒၣ် န့ၣ်လီၤ.
မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ် ဟီၣ်ကဝီၤပူၤ ဖဲလါဒံၣ်စ့ဘၢၣ် အသီ (၁၀) အနံၤ ဂီၤ (၁၁း၃၀) ဆၢကတီၢ် ဒုၣ်ဒါ (ခမရ-၄၃၄) အိၣ်ဖဲ မဲၢ်တရံးထၣ် သုးကလၢၤပူၤတဖၣ် ခးဝဲသဝီဖိ အချံကူလဲၤမၤကၤ လ့ၢ်ထီၣ်လ့ၢ်လိၤလၢ ဃိၣ်လိၥ်ကျိပူၤန့ၣ်လီၤ. ကမျၢၢ်ဖိ အချံလၢ အဝဲသ့ၣ်ခးဝဲတဖၣ် မ့ၢ်ဝဲ (၁) ကၠီပှၢ်, အိၣ်ဝဲဖဲ သီလဲၤထၣ်, ချံကလုၥ်မ့ၢ်ဝဲ ဒံၤစၢၤ ဒီး ဘၣ်ဝဲအချံကပၤခံထံၣ်, (၂) ဖိဆွ့ၣ်, အိၣ်ဝဲဖဲ သီလဲၤထၣ်, ချံကလုၥ်ဒံၤစၢၤ, ဘၣ်ဝဲအချံကပၤတထံၣ် (၃) စီၤကံအိၣ်, အိၣ်ဖဲအံတူၢ်ထၣ် ချံကလုၥ်ဟီၤဒၤ, ဘၣ်ဝဲအချံကပၤတထံၣ် န့ၣ်လီၤ. ဖဲလါဒံၣ်စ့ဘၢၣ် ၁၁ သီအနံၤ ဟါ (၄) နၣ်ရံၣ်အဆၢကတီၢ် ခးကဒီးဝဲ အံတူၢ်ထၣ် သဝီဖိ ဖါကီၤလၤ အချံ ဒးဆါ လၢကျိဖိ (၃) ထံၣ်န့ၣ်လီၤ. သုးမီၤစိရိၤအသုး လၢအိၣ်ဖဲ မဲၢ်တရံးထၣ် (ပကိးစ့ၢ်ကီးလၢ မဲၢ်ခါထၣ်) တၢ်လီၢ်သ့ၣ်တဖၣ်အံၤ ကဲထီၣ်ဝဲ တၢ်နီးတၢ်ဘျးလၢ ကမျၢၢ်ဖိလဲၤတၢ်က့ၤတၢ် လၢချံသ့ၣ်တဖၣ်အဂီၢ်န့ၣ်လီၤ. ကမျၢၢ်ဖိလၢ လုၢ်အီၣ်အသးသမူလၢ တၢ်ကူလဲၤမၤကၤ လၢချံကျဲတဖၣ် ဟးထီၣ်က့ၤလီၤဝဲ တဘူၣ်လၢၤဘၣ် ဒီး အမုၢ်ကျိၤဝဲၤကွၥ် တၢ်ဟဲနုၥ်စ့ၢ်ကီး ဘၣ်ဒိဝဲဒၣ်န့ၣ်လီၤ.
မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် ဟီၣ်ကဝီၤပူၤ လါဒံၣ်စ့ဘၢၣ် (၁၁) အနံၤ သုးမီၤစိရိၤအသုး ဒီး သုးခိးကီၢ်ဆၢ (BGF) အသုး လၢအိၣ်ဖဲ (၂၁) တၢၣ် ဒီး ထွံၣ်သံအုၣ်တဖၣ် ခးနါစိၤဝဲကျိဖးဒိၣ် (၂၂) ထံၣ် ဒီး ကျိဖိအါထံၣ် န့ၣ်လီၤ. ခးလီၤဝဲ လၢကါကျဲမုၢ်နုၥ် ကမျၢၢ်ဖိလဲၤက့ၤဖံးမၤတၢ်အလီၢ်အကျဲ န့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ (BGF) အသုး လၢဟံကါကျဲတၢ်ဘံၣ်တၢ်ဘၢတဖၣ် ခးပျံၤခးဖုးကမျၢၢ်ဖိ လၢကျိကိးနံၤဒဲး ဃၣ်ဃၣ်န့ၣ်လီၤ.
ဒူပျၥ်ယၥ်ကီၢ်ရ့ၣ် ကီးတရံးကီၢ်ဆၣ် ဟီၣ်ကဝီၤလ့က့ၣ်ကိၥ်ဝ့ၢ်သီပူၤ ဖဲလါဒံၣ်စ့ဘၢၣ်ထီၣ် ၁၄ သီအနံၤ သုးမီၤစိရိၤအသုး စကခ-၁၃ စုဒုၣ်တီၤဖီလၥ် ခမရ-၅၆၀ သုးရ့ၣ်ခိၣ် (ထက်လင်းဇေၥ်) တီခိၣ်ရိၣ်မဲဝဲ ဒီး အသုးသ့ၣ်တဖၣ် နုၥ်လီၤဆူၣ်ဝဲလၢ လ့က့ၣ်ကိၥ်ဝ့ၢ်ပူၤ ဒီး ဖီၣ်ချုးဝဲ ကမျၢၢ်ဖိ (၁၆) ဂၤန့ၣ်လီၤ. ဖဲလါဒံၣ်စ့ဘၢၣ်ထီၣ် ၁၅ သီအနံၤစ့ၢ်ကီး သုးတဖုအံၤ နုၥ်လီၤကဒီးလၢ လ့က့ၣ်ကိၥ်ဝ့ၢ်ပူၤ ဒီး ဖီၣ်ချုးကဒီးကမျၢၢ်ဖိ (၄) ဂၤ တကးဘၣ် ထီၣ်ဃိကမျၢၢ်အဟံၣ် မၤဟါဂီၤကမျၢၢ်အဟံၣ်, တီၢ်ဟးဂီၤကမျၢၢ်ဟံၣ်, တၢ်ပီးတၢ်လီသ့ၣ်တဖၣ် န့ၣ်လီၤ. ခီဖျိလၢ သုးမီၤစိရိၤအသုးတဖုအံၤ မၤဘၣ်ဒိကမျၢၢ်ဖိ အခွဲးယၥ်အဃိ တၢ်ဘၣ်သဂၢၢ်ခးလိၥ်သး ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် အိၣ်ထီၣ်ဝဲအဖီခိၣ် ကမျၢၢ်ဖိ (၄၀၀၀) ဃၣ်ဃၣ် ဘၣ်ဃ့ၢ်အိၣ်ကဒုလၢ တၢ်ပူၤဖျဲးအလီၢ် ဒီး တနီၤခီဃီၤဆူ ယိၤကီၢ်တကပၤ ဒီး အိၣ်ကဒုဝဲဒၣ်န့ၣ်လီၤ.
လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢ (BGF) အသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး မၤဘၣ်ဒိဃုၥ်စ့ၢ်ကီး ဟီၣ်ခိၣ်ဖိခွဲးယၥ်အဃိ လၢတၢ်ဒီသဒၢလီၤက့ၤဟီၣ်ကဝီၤအဂီၢ်မ့ၢ်ဂ့ၤ, ကမျၢၢ်ဖိအသးသမူ တၢ်ဘံၣ်တၢ်ဘၢမ့ၢ်ဂ့ၤ အဖီခိၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢ (BGF) အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ကိးနံၤဒဲးန့ၣ်လီၤ. လၢ (၁၅) သီအကတီၢ်ပူၤ တၢ်ဘၣ်သဂၢၢ်ခးလိၥ်သး အကလုၥ်ကလုၥ် ကဲထီၣ်ဝဲ (၁၄၆) ဘျီ ဒီး သုးမီၤစိရိၤအသုး သံဝဲ (၁၀၃) ဂၤ ဒီး ဘၣ်ဒိဝဲ (၇၇) ဂၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ ဒ်အမ့ၢ် ဒူသထူၣ်ကီၢ်ရ့ၣ် သုးက့ (၁), တီအူကီၢ်ရ့ၣ် သုးက့ (၂), ချၢၣ်လွံၢ်ထူၣ်ကီၢ်ရ့ၣ် သုးက့ (၃), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆), တၢ်ပၢဟီၣ်ကဝီၤပူၤ ကညီဒီးကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုးသ့ၣ်တဖၣ်, သုးခိးကီၢ်ဆၢ အသုးသ့ၣ်တဖၣ် အဘၢၣ်စၢၤတၢ်ဘၣ်သဂၢၢ်ခးလိၥ်သး အိၣ်ထီၣ်ဝဲ ဒီး တၢ်ဘၣ်သဂၢၢ်ခးလိၥ်သး ကဲထီၣ်အါကတၢၢ်န့ၣ် မ့ၢ်ဝဲ မုၢ်တြီၢ်ကီၢ်ရ့ၣ် သုးက့ (၅) ဒီး ဒူသထူၣ်ကီၢ်ရ့ၣ် သုးက့ (၁) န့ၣ်လီၤ. ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး အါထီၣ်စ့ၣ်ကီးဝဲဒၣ်လံန့ၣ်လီၤ.
ခီဖျိလၢ တၢ်ဒုးတၢ်ယၤ ကဲထီၣ်သးအဖီခိၣ် လီၢ်ကဝီၤကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ဂ့ၢ်ကီအါမံၤန့ၣ်လီၤ. ဆၢကတီၢ်ခဲအံၤ မ့ၢ်ဝဲတၢ်ဆၢကတီၢ်လၢ ကမျၢၢ်ဖိသ့ၣ်တဖၣ် ကဘၣ်မၤဝံၤအဘု အဆၢကတီၢ်န့ၣ်လီၤ. ခီဖျိတၢ်ဒုးကဲထီၣ်အဃိ ဒီး ဒ်သိးကမျၢၢ်ဖိတဖၣ် မၤဝံၤအဘုကချ့ဝဲအဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ လီၢ်ကဝီၤသုးသ့ၣ်တဖၣ် နုၥ်လီၤမၤဝံၤစၢၤ ကမျၢၢ်ဖိအတၢ်ဖံးတၢ်မၤ သ့ၣ်တဖၣ်န့ၣ်လီၤ.
ပူၤကွံၥ်တယံၥ်ဒံးဘၣ်
