သုးမီၤစိရိၤ အကဘီယူၤ ဟဲတ့ၢ်လီၤမ့ၣ်ပိၢ်လၢ လ့က့ၣ်ကိၥ်ဟီၣ်ကဝီၤပူၤ

၂၀၂၁ နံၣ်, လါဒံၣ်စ့ဘၢၣ် ၂၄ သီ, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၁ နံၣ် လါဒံၣ်စ့ဘၢၣ် ၂၃ သီ ဟါခီ (၁၀း၁၀) မံးနံးအဆၢကတီၢ် သုးမီၤစိရိၤ လၢဟံးန့ၢ်ဆူၣ် ထံကီၢ်တၢ်စိတၢ်ကမီၤတဖၣ် သူဝဲကဘီယူၤ ဒီး ဟဲတ့ၢ်လီၤဝဲ မ့ၣ်ပိၢ် ၂ ဖျၢၣ် ဖဲလ့က့ၣ်ကိၥ် ဟီၣ်ကဝီၤပူၤ န့ၣ်လီၤ. တကးဒံးဘၣ် ဟီၣ်ကဝီၤသုးတဖၣ်စ့ၢ်ကီး ခးဝဲကျိဖးဒိၣ် အါအါဂီၢ်ဂီၢ် တပယူၥ်ဃီန့ၣ်လီၤ.
လ့က့ၣ်ကိၥ် ဟီၣ်ကဝီၤပူၤ သုးမီၤစိရိၤအသုး ကဘီယူၤတဖၣ် တၢ်ဘၣ်ယိၢ်အိၣ်လၢ ကဟဲခးလီၤတၢ် ဒီး ကဘၣ်ဒိဘၣ်ထံး ပှၤကမျၢၢ်သ့ၣ်အဖၣ်အဃိ ဒ်သိးလ့က့ၣ်ကိၥ် ဟီၣ်ကဝီၤ တၢ်သုတပျဲယူၤတဘီယူၤတဂ့ၤအဂီၢ် ဖဲလါဒံၣ်စ့ဘၢၣ် ၂၀ သီန့ၣ် ခ့ၣ်အဲၣ်ယူၣ် ဃ့ထီၣ်ဝဲလၢ ဘီမုၢ်စၢဖှိၣ်ကရၢ ကကိးဂ့ၢ်ဝီၢ်အူ တၢ်အိၣ်ဖှိၣ် ဒီး ကပၥ်ပနီၣ် လ့က့ၣ်ကိၥ်တၢ်လီၢ်အံၤ ဒ်အမ့ၢ် ကဘီယူၤပူၤဖျဲး ဟီၣ်ကဝီၤန့ၣ်လီၤ.

ခ့ၣ်အဲၣ်ယူၣ် အတၢ်ဃ့ထီၣ်အံၤ အဆၢကတီၢ် သုးမီၤစိရိၤအသုးတဖၣ် သူဝဲကဘီယူၤ ဒီး ဟဲခးလီၤတၢ်လၢ ကဘီယူၤတဖၣ်အဃိ ဘီမုၢ်စၢဖှိၣ်ကရၢ ဃုၥ်ဒီး ထံဂုၤကီၢ်ဂၤ တၢ်ကရၢကရိတဖၣ် မ်အသုတကွၢ်ကပၤကွံၥ် သုးမီၤစိရိၤ အတၢ်မၤအၢမၤသီအံၤတဂ့ၤ ဒီး ခ့ၣ်အဲၣ်ယူၣ် အတၢ်ဃ့ထီၣ် လၢအမ့ၢ် နီၣ်ဂံၢ် (၅) (ခ) လၢအဘၣ်ထွဲဒီး တၢ်ကပၥ်ပနီၣ် လ့က့ၣ်ကိၥ်ဟီၣ်ကဝီၤ လၢကဘီယူၤပူၤဖျဲးအလီၢ် အံၤ ဃ့ထီၣ်ကဒီးလၢ တၢ်ကမၤဖျါထီၣ် အမိၢ်လံၤမိၢ်ပှၢ် အဂီၢ်န့ၣ်လီၤ.