ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ကီၢ်ဆၣ် ဟီၣ်ကဝီၤ သုးမီၤစိရိၤအသုးတဖၣ် ခးသံဝဲ ဟီၣ်ကဝီၤကမျၢၢ် သးနံၣ် (၆၀) နံၣ်တဂၤ အဂ့ၢ်

၂၀၂၁ နံၣ်, လါဒံၣ်စ့ဘၢၣ် ၂၄ သီ, ဒူသထူၣ်ကီၢ်ရ့ၣ်
ဖဲ လါဒံၣ်စ့ဘၢၣ် ၂၁ သီဂီၤခီ ၁၀ နၣ်ရံၣ်အဆၢကတီၢ် သုးမီၤစိရိၤအသုး တပ်မ (၂၂) စုတီၤဖီလၥ် ခလရ-၁၀၁ အသုးတဖၣ် ခးသံဝဲ ဟီၣ်ကဝီၤကမျၢၢ်တဂၤ လၢအမ့ၢ် နီၢ်ခံး, အသးနံၣ်အိၣ်ဝဲ (၆၀) နံၣ်န့ၣ်လီၤ. နီၢ်ခံး အံၤ ဘၣ်တၢ်ခးသံအီၤဖဲ ဘံလ့ကီၢ်ဆၣ်, နိၣ်ဘၢၣ်ဘီကရူၢ်, လ့ခီၣ်ထံးသဝီ ဒီး ထိးကျိးခံသဝီ ဘၢၣ်စၢၤ ယၤခိးကျိ တၢ်လီၢ်န့ၣ်လီၤ. ဖံနီၢ်ခံးအံၤ မ့ၢ်ဝဲ ထိးကျိးခံသဝီဖိ န့ၣ်လီၤ.

သုးမီၤစိရိၤအသုး လၢအခးသံ ဖံနီၢ်ခံးအံၤ ဖဲလါဒံၣ်စ့ဘၢၣ် ၂၀ သီအနံၤန့ၣ် အိၣ်ဟးထီၣ်ဝဲလၢ ကတၢတံးသဝီ ပၥ်ဖှိၣ်ထီၣ်အသးဒီး သုးခိးကီၢ်ဆၢ (BGF) ဂံၢ်ဘါကအိၣ် (၆၀) ဂၤတဖၣ် ဟဲလီၤဝဲဒၣ် သုးကျိၤလၢ ထိးကျိးခံသဝီတကပၤ ဒီး ထံၣ်ဝဲ ဖံနီၢ်ခံး ဒီး ခးသံဝဲဒၣ်န့ၣ်လီၤ.

သုးမီၤစိရိၤအသုးတဖုအံၤ ခးသံဝဲ ဖံနီၢ်ခံးဝံၤ ဆဲးလဲၤဝဲဒၣ်လၢ ယိၤကျါသဝီ ဒီး ဖဲလါဒံၣ်စ့ဘၢၣ် ၂၁ သီဟါခီ ၇း၃၀ မံးနံးန့ၣ် ဆီလီၤအသုးဖဲ ယိၤကျါသီခါဖၠၣ် ကရၢၢ်ပူၤန့ၣ်လီၤ. သုးမီၤစိရိၤအသုးတဖုအံၤ ဆီလီၤဟုၣ်ဝဲ အသုး လၢကျဲကပိၥ်ကျဲကပၤ အိၣ်ဝဲဒၣ်အဂ့ၢ် သ့ၣ်ညါဘၣ်န့ၣ်လီၤ.