လၢ သရၣ် စီၤကပံၥ်
၂၀၂၂ နံၣ်, လါမ့ၤ ၉ သီ

ပမ့ၢ်လိၣ်ဘၣ် တၢ်မုၥ်တၢ်ခုၣ်အမ့ၢ်အတီန့ၣ် ပကဘၣ်အိၣ်ဒီး ထံရူၢ်ကီၢ်သဲး အတၢ်မိၢ်န့ၢ်သးလီ လၢကဘှါရှဲကွံၥ် ထံရူၢ်ကီၢ်သဲး ဒီး သုးဂ့ၢ်ဝီတၢ်သဘံၣ်သဘုၣ် လၢအကဲထီၣ်တဖၣ် အဂံၢ်ထံးန့ၣ်လီၤ. ပသးအိၣ်ဘှါရှဲကွံၥ် တၢ်သဘံၣ်သဘုၣ်အဂံၢ်ထံးန့ၣ် တမ့ၢ်ထဲပတဲလၢပထးခိၣ်ဘၣ် ပကဘၣ်မၤအီၤ အနီၢ်ကီၢ်စ့ၢ်ကီးန့ၣ်လီၤ. ကရူၢ်ကရၢလၢ အဒုးကဲထီၣ် တၢ်သဘံၣ်သဘုၣ်တဖၣ် ခဲလၢၥ်စ့ၢ်ကီး အရ့ဒိၣ်ဝဲဒၣ်လၢ ကဘၣ်အိၣ်ဒီး တၢ်တီ တၢ်လိၤ, တၢ်ပၥ်သးလၢအကဆှီ လၢတၢ်ကဘှါရှဲကွံၥ် တၢ်ဂ့ၢ်ကီတဖၣ်န့ၣ်လီၤ.

ခဲအံၤမး စးထီၣ်ပၥ်ဖျါဝဲလၢ အဲၣ်ဒိးစံးကတိၤ တၢ်မုၥ်တၢ်ခုၣ် အဂ့ၢ်န့ၣ်လီၤ. သနၣ်က့ ဃ့ထီၣ်ဝဲလၢ တၢ်တဘၣ်မၤအါထီၣ် သုးဂံၢ်ဘါဘၣ်, တၢ်တဘၣ်မၤဒ်အံၤဒ်နုၤဘၣ်, ပၥ်ဖျါတြီဃၥ်ဆိဝဲ တၢ်ဒ်အံၤအဃိ ယထံၣ်လၢ အဝဲသ့ၣ်အတၢ်ပၥ်သးအံၤ တတီတလိၤဘၣ်န့ၣ်လီၤ.
အဝဲသ့ၣ် ဘိးဘၣ်ရၤလီၤ ဒီး ကွဲမုၥ်ဝဲလၢ တၢ်ကတဲသကိး တၢ်မုၥ်တၢ်ခုၣ် ဘၣ်ဆၣ် ကိးနံၤဒဲးဃၣ်ဃၣ်န့ၣ် သူဝဲကဘီယူၤ ဒီး ကွံၥ်လီၤမ့ၣ်ပိၢ်လၢ ဒူပူၤသဝီပူၤအဃိ အတၢ်ကွဲမုၥ်အံၤန့ၣ် ကီခဲဒိၣ်မးလၢ ပကနၥ်အီၤန့ၣ်လီၤ.
လီၢ်ခံကတၢၢ်တခါန့ၣ် ပဝဲသ့ၣ်တဖၣ် ပတမ့ၢ်ဝဲ ပှၤဖီၣ်စုကဝဲၤ မုၢ်ဆ့ၣ်မုၢ်ဂီၤတဖုလၢ ပလိၣ်ဘၣ် တၢ်သဘံၣ်သဘုၣ်အဃိန့ၣ် တမ့ၢ်ဘၣ်. ပကလုၥ် အတၢ်စံၣ်ညီၣ်ပၢလီၤသး ကအိၣ်အဂီၢ် ပဃ့ထီၣ်အီၤလၢ ထံရူၢ်ကီၢ်သဲးအကျဲ ဘၣ်ဆၣ် ပဃ့တန့ၢ်ဘၣ်အဃိ ပကျဲးစၢးမၤအီၤလၢ တၢ်ပၢၢ်ဆၢအကျဲ တုၤဝဲဒၣ်အနံၣ် ၇၀ ဘျဲၣ်လံန့ၣ်လီၤ. ပကဃုသကိးတၢ်အစၢ လၢတၢ်မုၥ်တၢ်ခုၣ်အကျဲန့ၣ် ပဂုၥ်ကျဲးစၢးတ့ၢ်အီၤ တပယူၥ်ဃီ လၢညါလံၤလံၤလံန့ၣ်လီၤ.

ကတီၢ်ခါ ထံရူၢ်ကီၢ်သဲးတၢ်အိၣ်သးအဖီခိၣ် ဒ်သိးပကဘှါရှဲကွံၥ် တၢ်သဘံၣ်သဘုၣ် ကန့ၢ်အဂီၢ် ပကဘၣ်အိၣ်ဒီး ထံရူၢ်ကီၢ်သဲး အသူးသ့ၣ်လၤကပီၤ န့ၣ်လီၤ. (တကြၢးလၢ ပကမၤအီၤဒ် တၢ်မၤခဲအံၤတမံၤ ခဲကၢၥ်တမံၤန့ၣ်ဘၣ်). ဒ်န့ၣ်အသိး ဖဲပစးထီၣ်တၢ် အခီၣ်ထံးခီၣ်ဘိအခါ ယထံၣ်လၢ အရ့ဒိၣ်ဝဲဒၣ်လၢ တကြၢးပၥ်တ့ၢ်ကွံၥ် လၢအံၤတဒူၣ်လၢန့ၤတဒူၣ် ဘၣ်န့ၣ်လီၤ.