၂၀၂၂ နံၣ်, လါယူၤ ၁ သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်, သုးက့နီၣ်ဂံၢ် (၁) တၢ်ပၢဟီၣ်ကဝီၤပူၤ ဖဲ ၂၀၂၂ နံၣ် လါမ့ၤ တလါအတီၢ်ပူၤန့ၣ် တၢ်ဒုးကဲထီၣ်ဝဲလၢ သုးမီၤစိရိၤအသုး, သုးခိးကီၢ်ဆၢ (BGF) ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) သုးတဖၣ် အဘၢၣ်စၢၤ ခဲလၢၥ် (၄၁) ဘျီ ဒီး သုးမီၤစိရိၤအသုး တကပၤ သံဝဲ (၇၁) ဂၤ, ဘၣ်ဒိဝဲ (၅၃) ဂၤ ဒီး သုးသိလ့ၣ် ဟးဂီၤဝဲ (၅) ခိၣ်န့ၣ်လီၤ.

လၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး ကညီဒီကလုၥ် ဂၢၤသးကရၢ သုးတကပၤ ဟ့ၣ်လီၤကွံၥ်အသးလၢ ထံကီၢ် ဒီး ကလုၥ်ဂီၢ် (၂) ဂၤ ဒီး ဘၣ်ဒိဝဲ (၁၁) ဂၤန့ၣ်လီၤ.
လါမ့ၤအတီၢ်ပူၤ သုးမီၤစိရိၤအသုးတဖၣ် သူဝဲကဘီယူၤ ဒီး ဟဲတ့ၢ်လီၤဝဲ မ့ၣ်ပိၢ်လၢ သုးက့ (၁) ဟီၣ်ကဝီၤ ၂ ဘျီအဃိ ဘၣ်ဟးဂီၤဝဲ ကမျၢၢ်ဟံၣ် ၁၁ ဖျၢၣ် တကးဒံးဘၣ် ခီဖျိသုးမီၤစိရိၤအသုးတဖၣ် ခးဝဲကျိဖးဒိၣ်အဃိ ဘၣ်သံဝဲ သဝီဖိ (၂) ဂၤ ဒီး ဘၣ်ဒိဝဲ (၃) ဂၤန့ၣ်လီၤ.

လၢန့ၣ်အမဲၥ်ညါ သုးမီၤစိရိၤအသုးတဖၣ် ဟံးန့ၢ်ဆူၣ်ဝဲ ကမျၢၢ်အစ့ ခဲလၢၥ် (၂၁၃၀၀၀၀၀) ကၠး ဒီး ဖီၣ်ဆူၣ်ဝဲကမျၢၢ် (၂၄) ဂၤ ဒီး မၢဝဲလၢ ကလဲၤဝံန့ၢ်အတၢ် န့ၣ်လီၤ. တကးဒံးဘၣ် သုးမီၤစိရိၤအသုးတဖၣ် ဒွဲၣ်အူစ့ၢ်ကီးဝဲ ကမျၢၢ်အကီၣ်ကျိး ၃ ကျိး (ခဲလၢၥ် ၁၃ အ့းကၢၣ်) ဒီး သုးမီၤစိရိၤအသုး ဒီး သုးခိးကီၢ်ဆၢတဖၣ် ဖဲလါမ့ၤတလါအတီၢ်ပူၤ မၤသံဝဲကမျၢၢ် အကျီၢ်ဒီးအပနၢ် ခဲလၢၥ် (၈) ဒု ဒီး ဟံးန့ၢ်ဆူၣ် ဒီး မၤဟးဂီၤဝဲ ကမျၢၢ်အတၢ်ဖိတၢ်လံၤတဖၣ် ဒ်အမ့ၢ် တၢ်အီၣ်တၢ်အီ ဒီး တၢ်ပီးတၢ်လီ အဂၤတဖၣ် အါမးန့ၣ်လီၤ.