၂၀၂၂ နံၣ်, လါယူၤ ၄ သီ
ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ပှၤဘၣ်မူဘၣ်ဒါတဖၣ် ဖီၣ်ဃၥ်ဝဲ သုးမီၤစိရိၤအသုး ခမရ နီၣ်ဂံၢ် (၉) သုးကလၢၤ အပှၤသုးဖိ (၂) ဂၤ  အဃိသုးမီၤစိရိၤအသုး တဲဘၣ်ဝဲ သဝီသးပှၢ်သ့ၣ်တဖၣ်လၢ တၢ်မ့ၢ်တပျဲကွံၥ် အပှၤသုးဖိ ၂ ဂၤအံၤဘၣ်ဒီး အဝဲသ့ၣ်ကခးလီၤဝဲ ကျိဖးဒိၣ်လၢ ဒူသထူၣ်ကီၢ်ရ့ၣ် ထိဘိၤကၠံ ဒီး ထိဘိၤလ့ သဝီပူၤလီၤအဂ့ၢ် သ့ၣ်ညါဘၣ်န့ၣ်လီၤ.

ဖဲလါယူၤ ၁ သီ ဟါခီ ၅ နၣ်ရံၣ် အဆၢကတီၢ်န့ၣ် သုးမီၤစိရိၤအသုး ဖဲအအိၣ်ဖဲ ဝ့ရီ သုးကလၢၤတဖၣ် ပျဲလီၤဝဲ အပှၤခံဂၤ လၢအမ့ၢ် သုးခိၣ်စိ ကၠီၣ်စ့ၤထဲၣ် ဒီး သုးစကီၤ နဲၤအူ လၢကလဲၤနုၥ်လၢ ထိဘိၤကၠံသဝီ ဒီး ဟံးန့ၢ်တၢ်ကစီၣ်အဂီၢ်န့ၣ်လီၤ. သုးမီၤစိရိၤအသုးခံဂၤအံၤ ဖဲဟးဒိး မီၤတီၤတုၤ လၢသဝီပူၤ ဒ်သိးကဟံးန့ၢ် တၢ်ကစီၣ် အဂီၢ်အဆၢကတီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး သုးပၥ်ဖှိၣ်တဖၣ် ဖီၣ်ဃၥ်အဝဲသ့ၣ် န့ၣ်လီၤ. ဖဲလါယူၤ ၂ သီဂီၤခီ ၅ နၣ်ရံၣ်တခီအဆၢကတီၢ် သုးမီၤစိရိၤအသုးတဖၣ် ဟူးဂဲၤဝဲ ဒ်သိးကဆှၢထီၣ်န့ၢ် အသုးကလၢၤ လၢအမ့ၢ် ပနွဲၢ်ကျါသုးကလၢၤ, လ့က့ၣ်သုးကလၢၤ ဒီး တးပီသုးကလၢၤတဖၣ် အသုးဖိတၢ်အီၣ်တၢ်အီအဂီၢ်အဃိ ဘၣ်သဂၢၢ်ခးလိၥ်သး ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဖဲ ဝ့ရီသဝီကပၤ ဝံၤ သုးမီၤစိရိၤအသုးတဖၣ် ဂုၤက့ၤအခံဒီး က့ၤနုၥ်လီၤဝဲလၢ နီၣ်ဂံၢ် (၉) သုးကလၢၤပူၤန့ၣ်လီၤ. တၢ်ဒုးကဲထီၣ်တဘျီအံၤ သုးမီၤစိရိၤအသုး သံဝဲ ၆ ဂၤ ဒီး ဘၣ်ဒိဝဲ ၅ ဂၤန့ၣ်လီၤ.

တၢ်ဒုးကဲထီၣ်ဝံၤအလီၢ်ခံ သုးမီၤစိရိၤအသုး သုးကလၢၤနီၣ်ဂံၢ် (၉) အပှၤသုးဖိတဖၣ် ခးလီၤဝဲကျိဖးဒိၣ် အါန့ၢ်အထံၣ် ၅၀ ဆူ ထိဘိၤလ့ ဒီး ထိဘိၤကၠံသဝီအဃိ ဘၣ်ဒိဝဲသဝီဖိသးနံၣ် (၇၀)နံၣ်တဂၤဟံၣ်အူထီၣ်ဝဲ(၂)ဖျၢၣ်ဒီးဘၣ်သံဝဲထိးတဒုးန့ၣ်လီၤ.
စးထီၣ်လါယူၤ (၂) သီအနံၤန့ၣ် နီၣ်ဂံၢ် (၉) ဝ့ရီ သုးကလၢၤပူၤ သုးမီၤစိရိၤအသုးတဖၣ် ဆီလီၤဝဲ ကျိဖးဒိၣ် (၅) ခိၣ် ဒီး ခးဝဲတဘျီဃီအဃိ တနံၤဘၣ်တနံၤန့ၣ် ခးဝဲကျိဖးဒိၣ် အါန့ၢ်ဒံးအထံၣ် (၅၀) ကိးနံၤဒဲး တုၤလၢ လါယူၤ (၄)သီနံၤလံန့ၣ်လီၤ. ခဲအံၤစ့ၢ်ကီး ခးဝဲဒၣ်လီၤအဂ့ၢ် သဝီဖိတဂၤ ပၥ်ဖျါဝဲဒၣ်န့ၣ်လီၤ. ခီဖျိလၢသုးမီၤစိရိၤအသုးတဖုအံၤ ခးကျိဖးဒိၣ်အါမးအဃိ ထိဘိၤလ့ ဒီး ထိဘိၤကၠံသဝီဖိတဖၣ် ပျံၤတၢ်ဖုးတၢ်ဒီး ဘၣ်ဂ့ၢ်အိၣ်ကဒုး အသးန့ၣ်လီၤ.