ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ်နီၣ်ဂံၢ် (၈) ဒီး သုးမီၤစိရိၤအဘၢၣ်စၢၤ တၢ်ဘၣ်သဂၢၢ်ခးလိၥ်သး

လါအီကူး (၁၂) သီ၊ ၂၀၂၂ နံၣ်
ခ့ၣ်အဲၣ်ယူၣ်-လီၢ်ခၢၣ်သး
ဖဲလါအီးကူး အသီ (၁၀) အနံၤ ဂီၤ (၉) နၣ်ရံၣ်အဆၢကတီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် တၢၣ်ပီၢ် ဒီး ကညီမၠဲးရဲသဝီ အဘၢၣ်စၢၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး သုးမီၤစိရိၤအသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲတဘျီ ဒီး ဖဲ (၁၀း၁၀) မံးနံးအဆၢကတီၢ် တၢ်ဘၣ်သဂၢၢ်ခးလိၥ်သး ကဲထီၣ်ကဒီးတဘျီ န့ၣ်လီၤ. တၢ်ဘၣ်သဂၢၢ်ခးလိၥ်သး ကဲထီၣ်ဝဲ ခံဘျီလၢၥ်အပူၤ သုးမီၤစိရိၤအသုး သံဝဲခဲလၢၥ် (၉) ဂၤ ဒီး သုးမီၤစိရိၤတၢ်ဘၣ်ဒိဘၣ်ထံးတခီ မၤလီၤတံၢ်အီၤတန့ၢ်ဒံးဘၣ်န့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၈) တကပၤတခီ တၢ်ဘၣ်ဒိဘၣ်ထံးတအိၣ်ဝဲနီတမံၤဘၣ်န့ၣ်လီၤ.
ဖဲလါအီကူး (၆) သီအနံၤ (၄း၅၀) အဆၢကတီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၈) ဘၣ်သဂၢၢ်ခးလိၥ်သး ဒီး သုးမီၤစိရိၤအသုးတဖၣ် အဘၢၣ်စၢၤ ဖဲကၠိပ့ၣ်စ့း သုးကလၢၤတဘျီ ဒီး သုးမီၤစိရိၤအသုး သံဝဲ (၁) ဂၤန့ၣ်လီၤ.
ဖဲလါအီးကူး (၅) သီအနံၤ ဟါ (၄း၂၀) အဆၢကတီၢ်စ့ၢ်ကီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၈) ဒီး သုးမီၤစိရိၤအသုးတဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် ငပၠီဒီသဝီ ခိၣ်ထိးတဘျီန့ၣ်လီၤ. တၢ်ဘၣ်သဂၢၢ်ခးလိၥ်သးဘျီဝဲအံၤ သုးမီၤစိရိၤအသုး သံဝဲ သုးခိၣ်ယီၤတဂၤ ဒီး အပှၤနီသိလ့ၣ် တဂၤန့ၣ်လီၤ.