ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ကမျၢၢ်လၢ ဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် အနီၣ်ဂံၢ်အိၣ်လံဝဲ (၃၅၆၆၇၄) ဂၤလံၤန့ၣ်လီၤ.

၂၀၂၂ နံၣ် လါအီကူး ၁၆ သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ကီၢ်ရ့ၣ်, သုးက့သ့ၣ်တဖၣ် ဒ်အမ့ၢ် ဒူသထူၣ်ကီၢ်ရ့ၣ် သုးက့ (၁), တီအူကီၢ်ရ့ၣ် သုးက့ (၂), ချၢၣ်လွံၢ်ထူၣ်ကီၢ်ရ့ၣ် သုးက့ (၃), ဘျံးဒဝဲၢ်ကီၢ်ရ့ၣ် သုးက့ (၄), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆) သ့ၣ်တဖၣ်အဟီၣ်ကဝီၤပူၤ ခီဖျိလၢ တၢ်ဒုးတၢ်ယၤအိၣ်ထီၣ်ဝဲအဃိ ကမျၢၢ်ဖိသ့ၣ်တဖၣ် ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်န့ၣ်လီၤ.
ကမျၢၢ်ဖိလၢ ကီၢ်ရ့ၣ်တဘ့ၣ်စုၥ်စုၥ် အဟီၣ်ကဝီၤပူၤ လၢဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် သ့ၣ်တဖၣ် အနီၣ်ဂံၢ်အိၣ်ဝဲ ဒူသထူၣ်ကီၢ်ရ့ၣ် (၉၄၇၆၈) ဂၤ, တီအူကီၢ်ရ့ၣ် (၇၅၃၇) ဂၤ, ချၢၣ်လွံၢ်ထူၣ်ကီၢ်ရ့ၣ် (၆၁၈၉၈) ဂၤ, ဘျံးဒဝဲၢ်ကီၢ်ရ့ၣ် (၆၀၀၀) ဂၤ, မုၢ်တြီၢ်ကီၢ်ရ့ၣ် (၉၆၁၈၀) ဂၤ, ဒူပျၥ်ယၥ်ကီၢ်ရ့ၣ် (၉၀၂၉၁) ဂၤန့ၣ်လီၤ. ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် အနီၣ်ဂံၢ်ခဲလၢၥ်အိၣ်ဝဲ (၃၅၆၆၇၄) ဂၤန့ၣ်လီၤ. ကမျၢၢ်ဖိလၢဘၣ်ဃ့ၢ်အိၣ်ခူသူၣ် လၢပမၤလီၤတံၢ် အနီၣ်ဂံၢ်နီၣ်ဒွး တန့ၣ်ဒံးဘၣ်တဖၣ် အိၣ်ဒံးစ့ၢ်ကီးဝဲဒၣ်န့ၣ်လီၤ.
ကမျၢၢ်ဖိလၢ ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် သ့ၣ်တဖၣ်အဂီၢ် တၢ်အိၣ်တၢ်ဆိးလီၢ်ကျဲ, တၢ်အီၣ်တၢ်အီ, တၢ်ဘံၣ်တၢ်ဘၢတဖၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ သ့ၣ်တဖၣ် ဟံးန့ၢ်ဝဲမူဒါ တဂၤလၢလီၢ်ကျဲ သနၢၣ်ဒၣ်ဝဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီခိၣ်ရိၣ်မဲဝဲ ကညီတၢ်ပၢၢ်ဆၢ ဒီး လၢကညီဒီကလုၥ် ကဒိးန့ၢ်က့ၤ တၢ်သဘျ့, တၢ်စံၣ်ညီၣ်ပၢလီၤသးဒၣ်ဝဲအဂီၢ် ကျဲးစၢးဂဲၤလိၥ်ဝဲ လၢထံရူၢ်ကီၢ်သဲးတၢ်ဒုးအကျဲ ဒီး သုးဂ့ၢ်ဝီတၢ်ဒုးအကျဲ စးထီၣ်လၢ ကညီစုကဝဲၤ တၢ်ပၢၢ်ဆၢ စးထီၣ်သး ဒီး တုၤခဲအံၤန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ သ့ၣ်တဖၣ် ဟံးန့ၢ်မူဒါ လၢကညီဒီကလုၥ် တၢ်ဘံၣ်တၢ်ဘၢ ဒီး ကျဲးစၢးဒုးတၢ်လၢ ကညီဒီကလုၥ် ကထူၣ်ဖျဲးထီၣ်လၢ တၢ်ဆီၣ်တံၢ်မၤနၢၤအဂီၢ် န့ၣ်လီၤ.
ဆၢကတီၢ်တၢ်အိၣ်သးခဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒီး စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ သ့ၣ်တဖၣ် ဘၣ်ကွၢ်ဆၢၣ်မဲၥ် ဒုးတၢ်ဒီး သုးမီၤစိရိၤအသုး ဒီး ဘၣ်ရဲၣ်ကျဲၤဝဲ သုးဂ့ၢ်ဝီအတၢ်လၢၥ်ဘူၣ်လၢၥ်စ့ၤ တကးဘၣ် ရဲၣ်ကျဲၤဃုၥ်စ့ၢ်ကီး တၢ်လိၣ်သ့ၣ်တဖၣ်လၢ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် သ့ၣ်တဖၣ်အဂီၢ် စ့ၢ်ကီးန့ၣ်လီၤ.