ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤ တၢ်ပၢဟီၣ်ကဝီၤ မုၢ်တြီၢ်ကီၢ်ရ့ၣ် သုးက့ (၅) လူၤသီကီၢ်ဆၣ်, ဒွဲၣ်လိကီၢ်ဆၣ်, ဘုသိၣ်ကီၢ်ဆၣ် ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် အနီၣ်ဂံၢ်ခဲလၢၥ်အိၣ်ဝဲ (၉၆၁၈၀) ဂၤ

၂၀၂၂ နံၣ် လါအီကူး ၁၅ သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢ အသုးတဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ တပယူၥ်ဃီန့ၣ်လီၤ. လၢတၢ်န့ၣ်အဃိ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၅) စုဒုၣ်တီၤဖီလၥ် သုးရ့ၣ်တဖၣ် ဒီး ဂၢၤသးသုးရ့ၣ်, ဂၢၤကီၢ်သုးရ့ၣ် အမူအဒါအိၣ်ဝဲလၢ ကဘၣ်တြီဆၢ ဒီသဒၢက့ၤ ဟီၣ်ကဝီၤ ဒီး ကမျၢၢ်ဖိသ့ၣ်တဖၣ် အသးသမူ တၢ်ဘံၣ်တၢ်ဘၢ န့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၅) စုဒုၣ်တီၤဖီလၥ် သုးက့ဝဲၤလီၢ်ခိၣ်သ့ၣ် အသုးတဖၣ် သုးရ့ၣ်တဖၣ် ဒီး သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲကိးနံၤဒဲးန့ၣ်လီၤ. မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ တၢ်ဒုးကဲထီၣ်ဝဲ အါကတၢၢ်န့ၣ်လီၤ.
ခီဖျိလၢ တၢ်ဒုးကဲထီၣ် ကိးနံၤဒဲး ဒီး သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် ခးလီၤကျိဖးဒိၣ်လၢ ကမျၢၢ်ဖိအဒူသဝီပူၤ, ကမျၢၢ်ဖိအတၢ်ဖံးအီၣ်မၤအီၣ်အလီၢ်အကျဲ တဘိယူၥ်ဃီအဃိ ကမျၢၢ်ဖိသ့ၣ်တဖၣ် ဘၣ်ပၥ်တ့ၢ်ကွံၥ် အဒူသဝီ, တၢ်ဖံးအီၣ်မၤအီၣ်လီၢ်ကျဲ ဒီး ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် န့ၣ်လီၤ. လူၤသီကီၢ်ဆၣ်, ဒွဲၣ်လိကီၢ်ဆၣ်, ဘုသိၣ်ကီၢ်ဆၣ် ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ်တဖၣ် အနီၣ်ဂံၢ်အိၣ်ဝဲ (၉၆၁၈၀) ဂၤန့ၣ်လီၤ.
ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ် အါဒၣ်တၢ်တက့ၢ် မ့ၢ်ဝဲ ပှၤထူစံၥ်ဖဲးခုးဖိ န့ၣ်လီၤ. ကမျၢၢ်ဖိသ့ၣ်တဖၣ် ဘၣ်ပၥ်တ့ၢ်ကွံၥ် အတၢ်ဖံးအီၣ်မၤအီၣ်လီၢ်ကျဲအဃိ အဝဲသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်အီၣ်မိၢ်ပှၢ် တၢ်ဂ့ၢ်ကီန့ၣ်လီၤ. မုၢ်တြီၢ်ကီၢ်ရ့ၣ် ပှၤဘၣ်မူဘၣ်ဒါသ့ၣ်တဖၣ် ရဲၣ်ကျဲၤဝဲ တၢ်အီၣ်မိၢ်ပှၢ်လၢ ကမျၢၢ်ဖိသ့ၣ်တဖၣ်အဂီၢ် ဒ်တၢ်သ့အိၣ်ဒီးအီၤအသိးန့ၣ်လီၤ. ဘၣ်ဆၣ် ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ် အနီၣ်ဂံၢ်အါဝဲအဃိ တၢ်လိၣ်ဘၣ်သ့ၣ်တဖၣ် လိၣ်ဒံးဝဲအါမးန့ၣ်လီၤ.