သုးမီၤစိရိၤအသုးသ့ၣ်တဖၣ် မၤထီဒါ ဟီၣ်ခိၣ်ဖိခွဲးယၥ်အါထီၣ် ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် အနီၣ်ဂံၢ်အါထီၣ် ဒီး ကမျၢၢ်ဖိသ့ၣ်တဖၣ် လိၣ်ဘၣ်ဂ့ၢ်ဂီၢ်အူ တၢ်ဆီၣ်ထွဲမၤစၢၤ

၂၀၂၂ နံၣ်, လါအီကူး ၁၄ သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ဒူသထူၣ်ကီၢ်ရ့ၣ် သုးက့ (၁), တီအူကီၢ်ရ့ၣ် သုးက့ (၂), ချၢၣ်လွံၢ်ထူၣ်ကီၢ်ရ့ၣ် သုးက့ (၃), ဘျံးဒဝဲၢ်ကီၢ်ရ့ၣ် သုးက့ (၄), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤသ့ၣ်တဖၣ် သုးမီၤစိရိၤအသုး ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ တပယူၥ်ဃီအဃိ လၢတၢ်ဒီသဒၢလီၤက့ၤဟီၣ်ကဝီၤအဂီၢ်မ့ၢ်ဂ့ၤ, တၢ်ဒီသဒၢက့ၤကမျၢၢ်ဖိအသးသမူ တၢ်ဘံၣ်တၢ်ဘၢအဂီၢ်မ့ၢ်ဂ့ၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ ခိၣ်နၢ်သိၣ်ဒူသ့ၣ်တဖၣ် ဘၣ်ကွၢ်ဆၢၣ်မဲၥ်ဒုးတၢ်ဒီး သုးမီၤစိရိၤအသုး, သုးခိးကီၢ်ဆၢအသုး သ့ၣ်တဖၣ် ကိးနံၤဒဲးန့ၣ်လီၤ.

ဖဲတၢ်ဘၣ်သဂၢၢ်ခးလိၥ်သး ဒီး သုးမီၤစိရိၤအသုးသံ ဒီး ဘၣ်ဒိအါ အဆၢကတီၢ် သုးမီၤစိရိၤအသုးသ့ၣ်တဖၣ် ခးလီၤဃုၥ်စ့ၢ်ကီး ကျိဖးဒိၣ် ဟဲခးလီၤတၢ်လၢ ကဘီယူၤ လၢကမျၢၢ်ဖိအဒူသဝီပူၤ, ကမျၢၢ်ဖိဃ့ၢ်အိၣ်ခူသူၣ်အလီၢ်အကျဲ န့ၣ်လီၤ. သုးမီၤစိရိၤအသုးသ့ၣ်တဖၣ် ဖီၣ်ဝဲကမျၢၢ်လၢ အတၢ်ကမၣ်တအိၣ်ဘၣ်တဖၣ် ဒီး မၤဆူးမၤဆါဝဲ, မၤပျံၤမၤဖုးဝဲ ဒီး သူအီၣ်ဝဲလၢ အသုးဂ့ၢ်ဝီ အတၢ်ရဲၣ်တၢ်ကျဲၤအပူၤ မၢဝဲကမျၢၢ်ဖိဟးဒုးနဲၣ်န့ၣ်အဝဲသ့ၣ် အသုးကျိၤအကျဲ အိၣ်စ့ၢ်ကီးဝဲအါမးန့ၣ်လီၤ. သုးမီၤစိရိၤအသုး ဒွဲၣ်အူကွံၥ်ဝဲ ကမျၢၢ်ဖိ အဟံၣ်အဃီဒီး ဟံဆူၣ်ကမျၢၢ်ဖိ အတၢ်ဖိတၢ်လံၤ လုၢ်ဒိၣ်ပှ့ၤဒိၣ်တဖၣ် အိၣ်ဝဲအါမးစ့ၢ်ကီးန့ၣ်လီၤ. သုးမီၤစိရိၤအသုးသ့ၣ်တဖၣ် ခးသံကမျၢၢ်ဖိ လၢအတၢ်ကမၣ်တအိၣ်ဘၣ်တဖၣ် အိၣ်စ့ၢ်ကီးဝဲအါမးန့ၣ်လီၤ.

ခီဖျိလၢ တၢ်ဒုးကဲထီၣ် ဒီး သုးမီၤစိရိၤအသုးသ့ၣ်တဖၣ် ခးလီၤကျိဖးဒိၣ် လၢကမျၢၢ်ဖိ အဒူသဝီပူၤအဃိ ကမျၢၢ်ဖိလၢအိၣ်ဆိးလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤသ့ၣ်တဖၣ် ဘၣ်ပၥ်တ့ၢ်ကွံၥ် အဒူသဝီ အတၢ်ဖံးအီၣ်မၤအီၣ်လီၢ်ကျဲ ဒီး ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် န့ၣ်လီၤ. ဒူသထူၣ်ကီၢ်ရ့ၣ်, ချၢၣ်လွံၢ်ထူၣ်ကီၢ်ရ့ၣ် ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် အနီၣ်ဂံၢ်အါကတၢၢ်န့ၣ်လီၤ. ကီၢ်ရ့ၣ် (၂) ဘ့ၣ် အဟီၣ်ကဝီၤပူၤ ကမျၢၢ်လၢဘၣ်ဃ့ၢ်အိၣ်ခူသူၣ် အနီၣ်ဂံၢ်အိၣ်ဝဲ (၁၅၄၈၆၆) ဂၤန့ၣ်လီၤ. ကီၢ်ရ့ၣ်အဂၤအဟီၣ်ကဝီၤပူၤ ကမျၢၢ်ဖိလၢဘၣ်ဃ့ၢ်အိၣ်ခူသူၣ်သ့ၣ်တဖၣ် အနီၣ်ဂံၢ် လီၤတံၢ်လီၤဆဲးတဖၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဃုသ့ၣ်ညါမၤလီၤတံၢ်ဝဲ အဖၢမုၢ်န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ်အဂီၢ် တၢ်အိၣ်တၢ်ဆိး, တၢ်ဘံၣ်တၢ်ဘၢ, တၢ်အိၣ်ဆူၣ်အိၣ်ချ့, တၢ်အီၣ်တၢ်အီ တၢ်လိၣ်ဘၣ်သ့ၣ်တဖၣ် ကီၢ်ရ့ၣ်သုးက့ လၢအဘၣ်ထွဲ ခိၣ်နၢ်ပှၤဘၣ်မူဘၣ်ဒါသ့ၣ်တဖၣ် ရဲၣ်ကျဲၤဝဲ တသ့ဖဲအသ့ အဂ့ၤကတၢၢ်န့ၣ်လီၤ. ဘၣ်ဆၣ် ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ် အနီၣ်ဂံၢ်အါဝဲအဃိ တၢ်လိၣ်လၢကမျၢၢ်ဖိသ့ၣ်တဖၣ်အဂီၢ် အိၣ်ဒံးဝဲအါမးန့ၣ်လီၤ. တကီၢ်ခါ တၢ်အိၣ်သးခဲအံၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ်အဂီၢ် တၢ်လိၣ်ဘၣ်ခိၣ်သ့ၣ်တဖၣ် မ့ၢ်ဝဲ တၢ်အီၣ်မိၣ်ပှၢ်တဖၣ်, တၢ်အိၣ်ကဒုဂီၢ် တၢ်ခိၣ်ဒုးသ့ၣ်တဖၣ် န့ၣ်လီၤ. ပှၤတဂၤလၢ်လၢ်, တၢ်ကရၢကရိတဖုစုၥ်စုၥ် လၢသးအိၣ်ဆီၣ်ထွဲမၤစၢၤ ကမျၢၢ်ဖိလၢ ဃ့ၢ်အိၣ်ခူသူၣ်သ့ၣ်တဖၣ်အဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တူၢ်လိၥ်မုၥ်ဝဲ ကိးဂၤဒဲးန့ၣ်လီၤ.