တၢ်ကစီၣ် ဘှီဘၣ်မၤပှဲၤ ဘၣ်ဃး ကီးတရံး တၢ်ဒုးကဲထီၣ်သး အဂ့ၢ်

၂၀၂၂ နံၣ်, လါအီကူး ၂၀ သီ, ခ့ၣ်အဲၣ်ယူၣ်-လီၢ်ခၢၣ်သး

၂၀၂၂ နံၣ်, လါအီကူး (၁၅) သီအနံၤ ခ့ၣ်အဲၣ်ယူၣ်-ကညီဒီိကလုၥ်စၢဖှိၣ်ကရၢ လီၢ်ခၢၣ်သး တၢ်ကစီၣ်ဒီးတၢ်ဘိးဘၣ်ရၤလီၤသန့ ဘိးဘၣ်ရၤလီၤ တၢ်ဂ့ၢ်ဘၣ်ဃး ကီးတရံးဝ့ၢ်ပူၤ တၢ်ဒုးကဲထီၣ် ဒီး သုးမီၤစိရိၤစုဒုၣ်တီၤဖီလၥ် ပၢၤကီၢ်သုးသံဝဲ (၁၂) ဂၤ ဒီး တၢ်ဖီၣ်န့ၢ်သမူဝဲ ပီၢ်ရီဒီးအပှၤတဂၤ န့ၣ်လီၤ. တၢ်ဒုးကဲထီၣ်ဝံၤအလီၢ်ခံ သုးမီၤစိရိၤအသုး အိၣ်ဖဲကီးတရံးတဖၣ် ခးလီၤဝဲကျိဖးဒိၣ် အထံၣ် (၅၀) ဆံ ဒီး ဘၣ်ဒိဝဲကမျၢၢ်ဖိတဂၤန့ၣ်လီၤ.
ဒူပျၥ်ယၥ်ကီၢ်ရ့ၣ်, သုးက့ (၆) ဝဲၤလီၢ်ခိၣ်သ့ၣ် ဆှၢထီၣ်တၢ်ဂ့ၢ်တၢ်ကျိၤ လီၤတံၢ်လီၤဆဲးဆူ လီၢ်ခၢၣ်သး ဒီး သုးဝဲၤလီၢ်ခိၣ်သ့ၣ် ဝဲၤဒၢးအဖီခိၣ် ပရၤလီၤဒုးသ့ၣ်ညါဘၣ်က့ၤ ကမျၢၢ်ထံဖိကီၢ်ဖိတဖၣ် န့ၣ်လီၤ. တၢ်ကဲထီၣ်သးလီၤတံၢ်လီၤဆဲး အဂ့ၢ်အကျိၤတခီ မ့ၢ်ဝဲဖဲ လါအီးကူးထီၣ် (၁၅) သီဂီၤ (၁၀း၁၃) နၣ်ရံၣ်အဆၢကတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, သုးက့ (၆) စုဒုၣ်တီၤဖီလၥ်, သုးရ့ၣ် (၁၈) ဒီး သုးရ့ၣ် (၂၇) သုးကျိၤပၥ်ဖှိၣ်တဖၣ် နုၥ်လီၤခးဝဲ ကီးတရံးဝ့ၢ်ပူၤ ပၢၤကီၢ်သန့ န့ၣ်လီၤ. တၢ်ထီၣ်ဒုးကီးတရံးပၢၤကီၢ်သန့ဘျီဝဲအံၤ သုးမီၤစိရိၤ စုဒုၣ်တီၤဖီလၥ် ပၢၤကီၢ်ခိၣ်ပတြီၥ် ဒီးအပှၤသံဝဲတဘျီဃီ (၃) ဂၤ ဒီး ဘၣ်ဒိဝဲ (၈) ဂၤန့ၣ်လီၤ. ပှၤလၢအဘၣ်ဒိတဖၣ် တၢ်ဆှၢအီၤဆူ ကီးတရံးတၢ်ဆါဟံၣ် ဒီး သံက့ၤဝဲလၢ တၢ်ဆါဟံၣ်ပူၤ (၅) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် မၤန့ၢ်ဝဲ သုးမီၤစိရိၤ စုဒုၣ်တီၤဖီလၥ် ပၢၤကီၢ်အကျိ အ့ၣ်ခ့ၣ်စဲးလး (၁) ခိၣ်, M-၁၆ တခိၣ်, အ့ၣ်ခ့ၣ်ရဲၣ်ဖၢၣ် (၃) ခိၣ်, MA-3 တခိၣ်န့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒွဲၣ်အူကွံၥ်ဝဲ (ထွေအုပ်ရုံး, တရၥးရုံးသီးသန့် ရဲစခန်း သ့ၣ်တဖၣ်န့ၣ်လီၤ.
တၢ်ဒုးဝံၤအလီၢ်ခံ သုးမီၤစိရိၤအသုး လၢအိၣ်ဖဲ ကီးတရံးတဖၣ် ခးလီၤဝဲကျိဖးဒိၣ်ဆူ အီကီ ဒီး ယီၢ်ကုၤသဝီပူၤအဃိ ကမျၢၢ်ဖိဘၣ်ဒိဝဲ လၢကျိဖးဒိၣ်အက့ (၄) ဂၤ အကျါပၣ်ဃုၥ်ဒီး ဖိသၣ်သးနံၣ် (၁၂) နံၣ်တဂၤ ဒီး ဖိသၣ်ဆံး (၂) နံၣ်တဂၤ ဘၣ်သံဝဲတဘျီဃီန့ၣ်လီၤ.