တၢ်ကစီၣ်တဖၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ၂၀၂၂ နံၣ် လါစဲးပထ့ဘၢၣ် တလါကတီၢ်ပူၤ တၢ်ဒုးကစီၣ် ဒီး သုးမီၤစိရိၤအသုး အတၢ်မၤထီဒါ ဟီၣ်ခိၣ်ဖိခွဲးယၥ်
၂၀၂၂ နံၣ်, လါအီးကထိဘၢၣ် ၅ သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,
ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ
သုးမီၤစိရိၤအသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး
တၢ်မၤထီဒါ ဟီၣ်ခိၣ်ဖိခွဲးယၥ် အိၣ်ဝဲတပယူၥ်ဃီန့ၣ်လီၤ. ကညီဒီကလုၥ်
တၢ်ထူၣ်ဖျဲးသုးမုၢ်ဒိၣ် သုးက့ (၃) စုဒုၣ်တီၤဖီလၥ် သုးရ့ၣ် (၇), သုးရ့ၣ်
(၈), သုးရ့ၣ် (၉) ဒီး ဂၢၤသးသုးရ့ၣ် (၃) ခိၣ်နၢ်သိၣ်ဒူသ့ၣ်တဖၣ်
ဘၣ်ကွၢ်ဆၢၣ်မဲၥ် ဒုးဆၢဝဲ သုးမီၤစိရိၤအသုးသ့ၣ်တဖၣ် ကိးနံၤဒဲးန့ၣ်လီၤ.
စးထီၣ်ဖဲ
၂၀၂၂ နံၣ် လါစဲးပထ့ဘၢၣ်ထီၣ် (၇) သီအနံၤ သုးမီၤစိရိၤအသုးရ့ၣ် လၢအမ့ၢ်ဝဲ
ခလရ-(၄၈), ခမရ-(၅၉၀), ခမရ-(၅၉၉), ခမရ-(၅၈၂), ခမရ-(၃၄၉) ဒီး သုးတြိၤ-၇၇
စုဒုၣ်တီၤဖီလၥ် သုးရ့ၣ်တဘ့ၣ်, သုးရ့ၣ်ခဲလၢၥ် (၆) ရ့ၣ် ဟဲနုၥ်လီၤဟူးဂဲၤဝဲလၢ
KNLA သုးရ့ၣ် (၉) ဒီး ဂၢၤသးသုးရ့ၣ် (၃) အဟီၣ်ကဝီၤပူၤ ဒီး အတၢ်ရဲၣ်တၢ်ကျဲၤ
အိၣ်လၢကဒုးဖျိးကွံၥ်ဝဲ သုးရ့ၣ် (၉) ဒီး ဂၢၤသးသုးရ့ၣ် (၃) န့ၣ်လီၤ.
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၉), ဂၢၤသးသုးရ့ၣ် (၃)
ပၥ်ဖှိၣ်ထီၣ်သးဒီး ကမျၢၢ်တၢ်ဒီသဒၢသုး ဒီး (Federal Wings) အကရူၢ် ဒီး
ကွၢ်ဆၢၣ်မဲၥ်တြီဆၢဒုးဝဲ သုးမီၤစိရိၤအသုး လၢတၢ်သူၣ်ဒူသးဒူအပူၤန့ၣ်လီၤ.
စးထီၣ်
၂၀၂၂ နံၣ်, လါစဲးပထ့ဘၢၣ်ထီၣ် (၇) သီအနံၤ တုၤ လါစဲးပထ့ဘၢၣ် အသီ (၃၀) အနံၤ
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၉) ဒီး ဂၢၤသးသုးရ့ၣ် (၃)
အဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ, တၢ်ဒုးစဲၥ်ပြဲၥ် ကဲထီၣ်ဝဲခဲလၢၥ် (၃၁)
ဘျီ ဒီး သုးမီၤစိရိၤအသုး သံဝဲခဲလၢၥ် (၅၄) ဂၤအကျါ ပၣ်ဃုၥ်ဒီး သုးရ့ၣ်ခိၣ်
(၁) ဂၤ, သုးရ့ၣ်ခိၣ်ခံ (၁) ဂၤ, သုးခိၣ်စိ (၁) ဂၤ, သုးခိၣ်ဂီၢ်ဂ့ၢ် (၁) ဂၤ
ဒီး ဘၣ်ဒိဝဲခဲလၢၥ် (၇၇) ဂၤန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ
ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) သုးရ့ၣ် (၇), သုးရ့ၣ်
(၈), သုးရ့ၣ် (၉) ဒီး ဂၢၤသးသုးရ့ၣ် (၃) ဟီၣ်ကဝီၤပူၤ လါစဲပထ့ဘၢၣ်ထီၣ် (၁)
သီအနံၤ တုၤ လါစဲးပထ့ဘၢၣ် (၃၀) သီ အနံၤ တၢ်ဒုးကဲထီၣ်ဝဲခဲလၢၥ် (၇၁) ဘျီ ဒီး
သုးမီၤစိရိၤအသုးသံဝဲခဲလၢၥ် (၈၃) ဂၤ ဒီး ဘၣ်ဒိဝဲခဲလၢၥ် (၈၆) ဂၤန့ၣ်လီၤ.
တလါအကတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ,
ကမျၢၢ်တၢ်ဒီသဒၢသုး ဟ့ၣ်လီၤအသးသမူလၢ ထံကီၢ်ဒီးကလုၥ်ဂီၢ် ခဲလၢၥ် (၃) ဂၤ
ဒီးဘၣ်ဒိဝဲ (၁၂) ဂၤန့ၣ်လီၤ.
ဖဲတၢ်တြီဆၢခိးခး
ဒုၣ်ဒါလၢ တၢ်မဲၥ်ညါအဆၢကတီၢ် ခိၣ်နၢ်သိၣ်ဒူလၢ အိၣ်လၢ တၢ်ဒုးပျီပူၤသ့ၣ်တဖၣ်
ကအီၣ်ဘၣ်အီဘၣ်အဂီၢ် ချၢၣ်လွံၢ်ထူၣ်ကီၢ်ရ့ၣ် သုးက့ (၃) ပှၤဘၣ်မူဘၣ်ဒါတဖၣ်
ဟ့ၣ်လီၤဝဲမူဒါလၢ ကီၢ်ရ့ၣ်ကညီသးစၢ်ကရၢ, ကညီပိၥ်မုၣ်ကရၢ ကဖီမ့ၤဖီကသူဒီး
ဘိၣ်ဆှၢန့ၢ်သုးမုၢ်သံၣ်ဘိ လၢဒုးတၢ်လၢတၢ်မဲၥ်ညါသ့ၣ်တဖၣ် အဂီၢ်န့ၣ်လီၤ.
ခိၣ်နၢ်သိၣ်ဒူလၢကွၢ်ဆၢၣ်မဲၥ် ဒုးဆၢသုးမီၤစိရိၤအသုးလၢ တၢ်မဲၥ်ညါတဖၣ်
ကအီၣ်ဘၣ်ဝဲ ကသူဟီၣ်ဘီၣ်အဂီၢ် ကမျၢၢ်ဖိလၢ အိၣ်ဘူးအိၣ်တံၢ်ဒီး ကီၢ်ရ့ၣ်
သုးက့ဟီၣ်ကဝီၤတဖၣ် ဟ့ၣ်လီၤမၤဘူၣ်ဝဲအဆီသ့ၣ်တဖၣ် ဒီး
ကမျၢၢ်ဖိလၢအိၣ်လၢကီၢ်ပူၤကီၢ်ချၢသ့ၣ်တဖၣ် ပၥ်ဖှိၣ်ထီၣ်လိၥ်အသးဒီး
ဆှၢလီၤဝဲတၢ်ဆီၣ်ထွဲမၤစၢၤ ကသူပှ့ၤအဃိ ခိၣ်နၢ်သိၣ်ဒူလၢ ဒုးတၢ်သ့ၣ်တဖၣ်
အီၣ်ဘၣ်အီဘၣ်ဝဲ ဂ့ၤဂ့ၤဘၣ်ဘၣ်န့ၣ်လီၤ. ခီဖျိလၢ သုးမုၢ်ဒိၣ်မ့ၢ်ဂ့ၤ,
ပၢပြးမ့ၢ်ဂ့ၤ မၤဝဲအမူအဒါ တဂၤလၢလီၢ်ကျဲသနၢၣ်ဒၣ်ဝဲ ဒီး ထံဖိကီၢ်ဖိလၢ
ကီၢ်ပူၤကီၢ်ချၢ သ့ၣ်တဖၣ် ဆီၣ်ထွဲမၤစၢၤဝဲ တၢ်လိၣ်ဘၣ်တဖၣ်အဃိ သုးမီၤစိရိၤ
အတၢ်ရဲၣ်တၢ်ကျဲၤလၢ ကထီၣ်ဒုးဖျိးကွံၥ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်
သုးရ့ၣ် (၉) ဒီး ဂၢၤသးသုးရ့ၣ် (၃) အတၢ်ရဲၣ်တၢ်ကျဲၤတဖၣ် မၤဝဲတလၢပှဲၤဘၣ်ဒီး
ဘၣ်ဂုၤက့ၤအခံန့ၣ်လီၤ.
ဖဲတၢ်ဘၣ်သဂၢၢ်ခးလိၥ်သး
အိၣ်ထီၣ်တဘျီလၢ်လၢ် သုးမီၤစိရိၤအသုးသ့ၣ်တဖၣ် ခးလီၤဝဲကျိဖးဒိၣ်လၢ
ကမျၢၢ်ဖိအဒူသဝီ တၢ်အိၣ်တၢ်ဆိးလီၢ်ကျဲန့ၣ်လီၤ. သုးမီၤစိရိၤအသုး သူစ့ၢ်ကီးဝဲ
ကဘီယူၤ ဒီး ဟဲခးလီၤတၢ်လၢ ကမျၢၢ်ဖိအတၢ်အိၣ်တၢ်ဆိးလီၢ်ကျဲ ခဲလၢၥ်အိၣ်ဝဲ (၃)
ဘျီန့ၣ်လီၤ. သုးမီၤစိရိၤအသုးတဖၣ် မၢဆူၣ်ဝဲကမျၢၢ်ဖိလၢ ဒူသဝီ (၂) ဖျၢၣ်
ကဘၣ်ဟးထီၣ်ကွံၥ်လၢ အဒူသဝီအပူၤန့ၣ်လီၤ. ၂၀၂၂ နံၣ် လါစဲပထ့ဘၢၣ် တလါအကတီၢ်ပူၤ
သုးမီၤစိရိၤအသုးတဖၣ် ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် (၁) ဂၤ ဒီး
ခးသံဝဲကမျၢၢ်ဖိ (၁) ဂၤ ဒီး ခီဖျိသုးမီၤစိရိၤအသုးတဖၣ် ခးလီၤကျိဖးဒိၣ်လၢ
ကမျၢၢ်ဖိအဒူသဝီ တၢ်အိၣ်တၢ်ဆိးလီၢ်ကျဲအဃိ ဘၣ်သံဝဲကမျၢၢ် (၂) ဂၤ ဒီး ဘၣ်ဒိဝဲ
(၃) ဂၤန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ
ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ကမျၢၢ်ဖိလၢ
ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် အနီၣ်ဂံၢ်အိၣ်ဝဲ
တကလီၢ်ဘျဲၣ်လံန့ၣ်လီၤ.
ပူၤကွံၥ်တယံၥ်ဒံးဘၣ်
