ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ သုးမီၤစိရိၤ အတၢ်မၤထီဒါ ကမျၢၢ်ဖိခွဲးယၥ် လၢ ၂၀၂၂ နံၣ် လါအီကထိဘၢၣ် တလါအကတီၢ်ပူၤ

ခ့ၣ်အဲၣ်ယူၣ်-လီၢ်ခၢၣ်သး ၂၀၂၂ နံၣ်, လါနိၣ်ဝ့ဘၢၣ် (၆) သီ

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ခီဖျိလၢ သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ တပယူၥ်ဃီအဃိ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် အဘၢၣ်စၢၤ တၢ်ဒုးကဲထီၣ်ဝဲ ကိးနံၤဒဲးန့ၣ်လီၤ. တၢ်ဘၣ်သဂၢၢ်ခးလိၥ်သး ကဲထီၣ်ဝဲအခါ သုးမီၤစိရိၤအသုး, သုးခိးကီၢ်ဆၢအသုး သ့ၣ်တဖၣ် မၤဘၣ်ဒိဝဲ ကမျၢၢ်ဖိခွဲးယၥ် ဒ်အမ့ၢ် ခးလီၤဝဲကျိဖးဒိၣ်လၢ ကမျၢၢ်ဖိအဒူသဝီပူၤ, ဟဲခးလီၤတၢ်လၢ ကဘီယူၤ လၢကမျၢၢ်ဖိ အတၢ်အိၣ်တၢ်ဆိးအလီၢ်အကျဲန့ၣ်လီၤ. သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် ထီၣ်ဒွဲၣ်အူကွံၥ်ဝဲ ကမျၢၢ်ဖိအဟံၣ်အဃီ, ထီၣ်ဃိကမျၢၢ်အဟံၣ် ဒီး မၤဟးဂီၤဟံၣ် အတၢ်ပီးတၢ်လီ, ဖီၣ်ကမျၢၢ်လၢအတၢ်ကမၣ်တအိၣ်ဘၣ်တဖၣ်, ဟံဆူၣ်ကမျၢၢ်အကျိၣ်အစ့ ဒီး ကမျၢၢ်ဖိအတၢ်ဖိတၢ်လံၤသ့ၣ်တဖၣ် အိၣ်စ့ၢ်ကီးဝဲအါမးန့ၣ်လီၤ. သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ဟုၣ်အီၣ်ဝဲ ကမျၢၢ်အဆၣ်ဖိကီၢ်ဖိသ့ၣ်တဖၣ် အိၣ်စ့ၢ်ကီးဝဲန့ၣ်လီၤ. သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် မၤပျံၤမၤဖုးကမျၢၢ် ဒီး တပျဲကမျၢၢ်မၤအီၣ်က့ၤ အဘုအဟုဘၣ်အဃိ ကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ အါမံၤအါကလုၥ်န့ၣ်လီၤ.
ဒူၣ်သထူၣ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ခးလီၤဝဲကျိဖးဒိၣ်လၢ ကမျၢၢ်ဖိအဒူသဝီပူၤ, ကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲအဃိ ဘၣ်သံဝဲကမျၢၢ် (၄) ဂၤ, ဘၣ်ဒိဝဲ (၁၁) ဂၤ ဒီး ဘၣ်ဟးဂီၤဝဲကမျၢၢ်ဖိအဟံၣ် (၆) ဖျၢၣ်, ဒွဲၣ်အူကွံၥ်ဝဲကမျၢၢ်ဖိအဟံၣ် (၁၈) ဖျၢၣ် ဒီး ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် (၁) ဂၤန့ၣ်လီၤ.
ချၢၣ်လွံၣ်ထူၣ်ကီၢ်ရ့ၣ် ဟိၣ်ကဝီၤပူၤ သုးမီၤစိရိၤအသုး ခးလီၤကျိဖးဒိၣ်လၢ ကမျၢၢ်ဖိအဒူသဝီပူၤ, ကမျၢၢ်ဖိတၢ်ဖံးအီၣ်မၤအီၣ်အလီၢ်အကျဲအဃိ ဘၣ်သံဝဲကမျၢၢ် (၂) ဂၤ, ဘၣ်ဒိဝဲ (၃) ဂၤ ဒီး သုးမီၤစိရိၤအသုး ခးသံဝဲကမျၢၢ် (၁) ဂၤန့ၣ်လီၤ. သုးမီၤစိရိၤအသုး ဒွဲၣ်အူဝဲ ကမျၢၢ်ဖိအဟံၣ် (၆) ဖျၢၣ် ဒီး ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ်တဖၣ် ခဲလၢၥ် (၅၄) ဂၤန့ၣ်လီၤ. ကမျၢၢ်ဖိလၢ သုးမီၤစိရိၤအသုး ဖီၣ်အီၤတဖၣ် တနီၤမၤဒၢၣ်မၤလီၤဝဲ, တနီၤသူဝဲလၢ ကဘၣ်ယိးန့ၢ်အပှၤဘၣ်ဒိသ့ၣ်တဖၣ် ဒီး သူစ့ၢ်ကီးဝဲလၢ ကဘၣ်ဟးဒုးနဲၣ်န့ၢ်အကျဲ ဒီး ဝံစၢၤအသုးတၢ်ဖိတၢ်လံၤန့ၣ်လီၤ. လၢၢ်ဒိၣ်ကီၢ်ဆၣ် ဒီး မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် တပျဲဝဲကမျၢၢ်လၢ ကမၤအီၣ်က့ၤ အဘုအဟုဘၣ်အဃိ ကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်အီၣ်တၢ်အီ တၢ်ဂ့ၢ်ကီသ့ၣ်တဖၣ်န့ၣ်လီၤ.
ဘျံးဒဝဲၢ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် ခးသံဝဲကမျၢၢ် (၂) ဂၤ, ခးဘၣ်ဒိဝဲကမျၢၢ် (၁) ဂၤန့ၣ်လီၤ. သုးမီၤစိရိၤအသုးသ့ၣ်တဖၣ် ဟံဆူၣ်ဝဲ ကမျၢၢ်ဖိအကျိၣ်အစ့ ခဲလၢၥ်အိၣ်ဝဲ စ့ပယီၤ အကလီၢ် (၇၀၀) ကယၤ ဒီး ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် ခဲလၢၥ် (၁၀၀) ဂၤန့ၣ်လီၤ. သုးမီၤစိရိၤအသုးတဖၣ် တြီဝဲ ကမျၢၢ်ဖိလၢ စိၥ်ဝဲဟုသးအဃိ ကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်အီၣ်တၢ်အီတၢ်ဂ့ၢ်ကီန့ၣ်လီၤ.
မုၢ်တြီၢ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ခးလီၤကျိဖးဒိၣ်လၢ ကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲအဃိ ဘၣ်သံဝဲကမျၢၢ် (၂) ဂၤအကျါ ပၣ်ဃုၥ်ဒီး တပွဲဖိတပါ ဒီး ဘၣ်ဒိဝဲ (၈) ဂၤန့ၣ်လီၤ. သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ခးလီၤကျိဖးဒိၣ်အဃိ ဘၣ်ဟးဂီၤဝဲ ကမျၢၢ်ဖိအဟံၣ် (၅) ဖျၢၣ်န့ၣ်လီၤ. သုးမီၤစိရိၤအသုး, သုးခိးကီၢ်ဆၢအသုး ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် (၂) ဂၤန့ၣ်လီၤ. သုးမီၤစိရိၤအသုး သူဝဲကဘီယူၤဒီး ဟဲခးလီၤတၢ်လၢ ကမျၢၢ်ဖိအဒူသဝီ အတၢ်အိၣ်တၢ်ဆိးလီၢ်ကျဲ ခဲလၢၥ်အိၣ်ဝဲ (၂) ဘျီန့ၣ်လီၤ.
ဒူပျၥ်ယၥ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ခးလီၤဝဲကျိဖးဒိၣ်လၢ ကမျၢၢ်ဖိအဒူသဝီ ကမျၢၢ်ဖိတၢ်ဖံးအီၣ်မၤအီၣ်အလီၢ်အကျဲအဃိ ဘၣ်သံဝဲကမျၢၢ် (၂) ဂၤအကျါ ပၣ်ဃုၥ်ဒီး သီခါတပါ ဒီး ဘၣ်ဒိဝဲ (၁၁) ဂၤန့ၣ်လီၤ. သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် ခးလီၤကျိဖးဒိၣ်အဃိ ဘၣ်ဟးဂီၤဝဲ ကမျၢၢ်ဖိအဟံၣ် (၅) ဖျၢၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ခးဘၣ်ဒိစ့ၢ်ကီးဝဲ ကမျၢၢ် (၂) ဂၤန့ၣ်လီၤ. သုးမီၤစိရိၤအသုး သူဝဲကဘီယူၤ ဒီး ဟဲခးလီၤတၢ်လၢ ကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၃) ဘျီန့ၣ်လီၤ.
လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ ခီဖျိလၢ တၢ်ဒုးတၢ်ယၤ အိၣ်ဝဲကိးနံၤဒဲးအဃိ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် ခဲလၢၥ်အိၣ်ဝဲ (၃) ကလီၢ်ဘျဲၣ် ဒီး ကမျၢၢ်ဖိ (၁) ကလီၢ်ဘျဲၣ် လိၣ်ဘၣ်ဝဲ ဂ့ၢ်ဂီၢ်အူ တၢ်ဆီၣ်ထွဲမၤစၢၤန့ၣ်လီၤ.