ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ ၂၀၂၂ နံၣ် လါအီးကထိဘၢၣ် တလါအကတီၢ်ပူၤ တၢ်ဒုးကစီၣ်

၂၀၂၂ နံၣ်, လါနိၣ်ဝ့ဘၢၣ် (၇) သီ ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ ၂၀၂၂ နံၣ်, လါအီးကထိဘၢၣ် ဒီတလါအကတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢအသုး သ့ၣ်တဖၣ်အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲကိးနံၤဒဲးန့ၣ်လီၤ. တလါအကတီၢ်ပူၤ တၢ်ဒုးဖးဒိၣ်, တၢ်ဒုးဆံး, တၢ်ဒုးစံၥ်ပြဲၥ် ခဲလၢၥ်ကဲထီၣ်ဝဲ (၂၈၆) ဘျီဒီး သုးမီၤစိရိၤအသုး သံဝဲ (၃၆၉) ဂၤ ဒီး ဘၣ်ဒိဝဲ (၃၀၂) ဂၤန့ၣ်လီၤ. ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ တကပၤတခီ ဟ့ၣ်လီၤအသးသမူလၢ ထံကီၢ်ဒီးပှၤကလုၥ်အဂီၢ် ခဲလၢၥ် (၆) ဂၤ ဒီး ဘၣ်ဒိဝဲ (၄၆) ဂၤန့ၣ်လီၤ.
သုးမီၤစိရိၤအသုး ဟဲက့ၤဟ့ၣ်လီၤသး ဃုၥ်ဒီးတၢ်စုကဝဲၤ (၄) ဂၤ, ပၥ်လီၤတၢ်စုကဝဲၤလၢ တၢ်ဒုးပျီပူၤ (၃၂) ဂၤ ဒီး ပပှၤဖီၣ်န့ၢ် သုးမီၤစိရိၤအသုးဖိ (၁) ဂၤန့ၣ်လီၤ. သုးမီၤစိရိၤအသုး အီသံလီၤအသးလၢ အသုးကလၢၤပူၤ (၂) ဂၤ ဒီး ဆိက့သံလၢအသုးကလၢၤပူၤ (၂) ဂၤန့ၣ်လီၤ. သုးမီၤစိရိၤအသုး သိလ့ၣ်ဟးဂီၤကွံၥ်ဝဲ (၁၈) ခိၣ်န့ၣ်လီၤ. သုးမီၤစိရိၤအသုး သူဝဲကဘီယူၤဒုးသုး ဒီး ဟဲခးဝဲ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ခဲလၢၥ်အိၣ်ဝဲ (၆) ဘျီန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ကီၢ်ရ့ၣ် သုးက့ (၆) ဘ့ၣ်အဟီၣ်ကဝီၤပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢအသုးတဖၣ် အဘၢၣ်စၢၤ တၢ်ဒုးတၢ်ယၤအိၣ်ဝဲ တပယူၥ်ဃီန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ စးထီၣ် ၂၀၂၂ နံၣ် လါယနူၤအါရံၤ ဒီး တုၤလါအီးကထိဘၢၣ်အပူၤ တၢ်ဒုးဖးဒိၣ်, တၢ်ဒုးဆံး, တၢ်ဒုးစဲၥ်ပြဲၥ် ကဲထီၣ်ဝဲ ခဲလၢၥ် (၃၈၄၅) ဘျီ ဒီး သုးမီၤစိရိၤအသုးသံဝဲခဲလၢၥ် (၃၆၆၄) ဂၤ ဒီး ဘၣ်ဒိဝဲ (၂၇၀၀) ဂၤန့ၣ်လီၤ. ၂၀၂၁ နံၣ် အကတီၢ်ပူၤ တၢ်ဒုးဖးဒိၣ်, တၢ်ဒုးဆံး, တၢ်ဒုးစဲၥ်ပြဲၥ် ခဲလၢၥ်ကဲထီၣ်ဝဲ (၃၁၅၂) ဘျီ ဒီး သုးမီၤစိရိၤအသုးသံဝဲ (၂၁၉၀) ဂၤ ဒီး ဘၣ်ဒိဝဲ (၂၀၄၈) ဂၤန့ၣ်လီၤ. စးထီၣ်သုးမီၤစိရိၤအသုး ဟံန့ၢ်ဆူၣ်ထံကီၢ် အတၢ်စိတၢ်ကမီၤဝံၤအလီၢ်ခံ ဒီး တုၤခဲအံၤ သုးမီၤစိရိၤအသုးသ့ၣ်တဖၣ် သူဝဲကဘီယူၤဒုးသုး ဒီး ဟဲခးဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ခဲလၢၥ်အိၣ်ဝဲ (၁၀၇) ဘျီန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ သုးမီၤစိရိၤအသုးရ့ၣ် လၢဟီထီၣ်ဟူးဂဲၤလၢ ဟီၣ်ကဝီၤတၢ်ဒိၣ်စိအဂီၢ်မ့ၢ်ဂ့ၤ, ဒုးယၤဂ့ၢ်ဝီ အတၢ်ရဲၣ်တၢ်ကျဲၤမ့ၢ်ဂ့ၤ သုးရ့ၣ်အိၣ်ဝဲအဘ့ၣ် (၅၀) ဘျဲၣ် ဒီး သုးခိးကီၢ်ဆၢ အသုးရ့ၣ် (၄) ဘ့ၣ် ပၥ်ဖှိၣ်မၤသကိးတၢ်ဒီး သုးမီၤစိရိၤအသုး လၢဒုးယၤဂ့ၢ်ဝီ အတၢ်ရဲၣ်တၢ်ကျဲၤဒီး တၢ်ဟံန့ၢ် ဟီၣ်ကဝီၤတၢ်ဒိၣ်စိ အတၢ်ရဲၣ်တၢ်ကျဲၤအပူၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ သုးမုၢ်လၢ အဒီသဒၢက့ၤဟီၣ်ကဝီၤ, ဒီသဒၢကမျၢၢ်ဖိအသးသမူ တၢ်ဘံၣ်တၢ်ဘၢ ဒီး ဒုးထီဒါဝဲ သုးမီၤစိရိၤအသုးတဖၣ် မ့ၢ်ဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် တၢ်တီခိၣ်ရိၣ်မဲဖီလၥ် ကမျၢၢ်တၢ်ဒီသဒၢသုးကရူၢ်သ့ၣ်တဖၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ခီဖျိတၢ်တၢ်ဒုးတၢ်ယၤ အိၣ်ဝဲတပယူၥ်ဃီ ဒီး သုးမီၤစိရိၤအသုးသ့ၣ်တဖၣ် မၤထီဒါဝဲ ဟီၣ်ခိၣ်ဖိခွဲးယၥ် အိၣ်ဝဲထီဘိအဃိ ကမျၢၢ်ဖိသ့ၣ်တဖၣ် ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်န့ၣ်လီၤ. ကမျၢၢ်ဖိ (၃) ကလီၢ်ဘျဲၣ် ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် အကျါကမျၢၢ်ဖိ (၁) ကလီၢ်ဘျဲၣ် လိၣ်ဘၣ်ဝဲ ဂ့ၢ်ဂီၢ်အူ တၢ်ဆီၣ်ထွဲမၤစၢၤ ဒ်အမ့ၢ် တၢ်အီၣ်တၢ်အီ သ့ၣ်တဖၣ်န့ၣ်လီၤ.