ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ထီၣ်မၤဟးဂီၤဝဲ သုးမီၤစိရိၤအသုးကလၢၤ (၃) ဖျၢၣ် လၢတနံၤဃီအတီၢ်ပူၤ

၂၀၂၂ နံၣ် လါနိၣ်ဝ့ဘၢၣ် (၁၄) သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၇) ဒီး သုးရ့ၣ် (၉) ပၥ်ဖှိၣ်ထီၣ်သး ဒီးထီၣ်ဒုးမၤဟးဂီၤကွံၥ်ဝဲ သုးမီၤစိရိၤအသုးကလၢၤ (၃) ဖျၢၣ် လၢအမ့ၢ်ဝဲ ဘီကထၣ် သုးကလၢၤ, တိၤသ့ၣ်ဖူ သုးကလၢၤ ဒီး သၣ်ဆ့း သုးကလၢၤ န့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် စးထီၣ်ဝဲ ဒုးယၤအတၢ်ရဲၣ်တၢ်ကျဲၤဖဲ ၁၂-၁၁-၂၀၂၂ နံၤဂီၤခီ (၄း၀၀) နၣ်ရံၣ်အဆၢကတီၢ် ဒီး တၢ်ဒုးအတၢ်ရဲၣ်တၢ်ကျဲၤ ဝံၤဝဲဒၣ်ဖဲ (၁၁း၃၀) နၣ်ရံၣ်န့ၣ်လီၤ. သုးကလၢၤလၢအမ့ၢ်ဝဲ ဘီကထၣ် ဒီး သၣ်ဆ့း သုးကလၢၤ ခံဖျၢၣ်အံၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ထီၣ်မၤဟးဂီၤဝဲ လၢအနီၣ်ကစၢ် ဒီး မ့မ့ၢ် တိၤသ့ၣ်ဖူ သုးကလၢၤတခီ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သူဝဲ (Drone) ဒီး ခးဟးဂီၤကွံၥ်ဝဲဒၣ်န့ၣ်လီၤ. တၢ်ထီၣ်ဒုးမၤဟးဂီၤကွံၥ် သုးမီၤစိရိၤအသုးကလၢၤ (၃) ဖျၢၣ်ဘျီဝဲအံၤ သုးမီၤစိရိၤအသုး သံဝဲလၢ ပသ့ၣ်ညါအီၤလီၤတံၢ်လီၤဆဲး အိၣ်ဝဲ (၁၁) ဂၤ ဒီး မ့မ့ၢ် သုးမီၤစိရိၤ အတၢ်ဘၣ်ဒိဘၣ်ထံးတခီ ပမၤလီၤတံၢ်အီၤ တန့ၢ်ဒံးဘၣ်န့ၣ်လီၤ.
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် မၤန့ၢ်ဝဲ သုးမီၤစိရိၤအသုး တၢ်စုကဝဲၤသ့ၣ်တဖၣ် ဒ်အမ့ၢ် MA ကျိအကလုၥ် (၈) ခိၣ်, ဒီး အချံ (၃၀၇၀) ဖျၢၣ်, 9MM ခံခိၣ်, 81 တခိၣ် ဒီး အချံ (၆၈) ဖျၢၣ်, 60 MM အထီတခိၣ် ဒီး 60 MM အဖုၣ် (၄) ခိၣ် ဃုၥ်ဒီးအချံ (၁၁၃) ဖျၢၣ်, RPG-7 တခိၣ် ဒီး အချံ (၇၇) ဖျၢၣ်, စုကွံၥ် (၂၈) ဖျၢၣ်, ဘီးကၢ်တခိၣ် ဒီး အချံ (၈၈) ဖျၢၣ်, M14 ခီၣ်ယီၢ်မ့ၣ်ပိၢ် (၁၀) ဖျၢၣ်, တိုက်မှိုင်း (၁၀) ဖျၢၣ် ဃုၥ်ဒီးကျိချံဆၣ်အဒၢ (၂၇) ဘ့ၣ် ဒီး တၢ်ဃုခီၣ်ယီၢ်မ့ၢ်ပိၣ်စဲး တဖျၢၣ်န့ၣ်လီၤ.
ဖဲတၢ်ထီၣ်ဒုးမၤန့ၢ် သုးမီၤစိရိၤအသုးကလၢၤဝံၤ ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ရှဲဝဲသုးမီၤစိရိၤအသုးကလၢၤအဆၢကတီၢ် သုးမီၤစိရိၤအကဘီယူၤ ဟဲခးဝဲ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် လၢကဘီယူၤ ကအိၣ်ဝဲအဘျီ (၂၀) ဃၣ်ဃၣ်အဃိ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဟံန့ၢ်ဝဲ သုးမီၤစိရိၤ အသုးတၢ်စုကဝဲၤ တချုးခဲလၢၥ်ဘၣ် ဒီး ဘၣ်သုးကပၤကွံၥ်အသးန့ၣ်လီၤ.
တၢ်ထီၣ်ဒုးမၤဟးဂီၤ သုးမီၤစိရိၤအသုးကလၢၤ ဝံၤအလီၢ်ခံ သုးမီၤစိရိၤအသုး ကဘီယူၤ ဟဲခးလီၤတၢ်လိၤလိၤလၢ ကမျၢၢ်ဖိအဒူသဝီပူၤ ကအိၣ်ဝဲလၢအဘျီ (၁၀) ဃၣ်ဃၣ်န့ၣ်လီၤ. (၁၃-၁၁-၂၀၂၂) နံၤစ့ၢ်ကီး သုးမီၤစိရိၤအသုး ကဘီယူၤ ဟဲခးလီၤဒံးတၢ်လၢ ကမျၢၢ်ဖိအဒူသဝီပူၤန့ၣ်လီၤ. သုးမီၤစိရိၤအသုး ကဘီယူၤ ဟဲခးကမျၢၢ်ဘျီဝဲအံၤ ကမျၢၢ်ဖိအတၢ်ဟးဂုၥ်ဟးဂီၤ တၢ်ဘၣ်ဒိဘၣ်ထံး ပဃုသ့ၣ်ညါ မၤလီၤတံၢ်အီၤ အဖၢမုၢ်န့ၣ်လီၤ. သုးမီၤစိရိၤအသုး ကဘီယူၤ ဟဲခးကမၢၢ်ဖိဘျီဝဲအံၤ ကမျၢၢ်ဖိ လၢကရူၢ် (၃) ဘ့ၣ် သဝီ (၁၈) ဖျၢၣ် ပှၤနီၣ်ဂံၢ်ခဲလၢၥ် (၁၇၆၂၀) ဂၤ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်န့ၣ်လီၤ. ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ အါမံၤအါကလုၥ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ စးထီၣ် သုးမီၤစိရိၤအသုး ဟံန့ၢ်ဆူၣ် တၢ်စိတၢ်ကမီၤဝံၤ ဒီး တုၤခဲအံၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး သ့ၣ်တဖၣ် အဘၢၣ်စၢၤ တၢ်ဒုးကဲထီၣ်ဝဲ တပယူၥ်ဃီန့ၣ်လီၤ. တၢ်ဒုးဖးဒိၣ်, တၢ်ဒုးဆံး, တၢ်ဒုးစဲၥ်ပြဲၥ် လၢဟီၣ်ခိၣ်မဲၥ်ဖံးခိၣ် ကဲထီၣ်ဝဲ (၃၈၂) ဘျီ ဒီး သုးမီၤစိရိၤအသုး သံဝဲ (၄၈၀) ဂၤ ဒီး ဘၣ်ဒိဝဲ (၂၂၀) ဂၤလံန့ၣ်လီၤ. စးထီၣ် (၅-၄-၂၀၂၂) ဒီး တုၤခဲအံၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၃) တီခိၣ်ရိၤမဲ ဒုးအိၣ်ထီၣ်ဝဲ (Drone) တၢ်ဒုး ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒုးဝဲသုးမီၤစိရိၤလၢ (Drone) ခဲလၢၥ်အိၣ်ဝဲ (၆၄) ဘျီ ဒီး သုးးမီၤစိရိၤအသုး သံဝဲလၢ (Drone) တၢ်ဒုးအဃိ အိၣ်လံဝဲ (၇၀) ဂၤ ဒီး ဘၣ်ဒိဝဲ (၄၆) ဂၤလံန့ၣ်လီၤ. ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ စးထီၣ် သုးမီၤစိရိၤအသုး ဟံဆူၣ်တၢ်စိတၢ်ကမီၤဝံၤအလီၢ်ခံ ဒီး တုၤခဲအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ထီၣ်ဒုးမၤဟးဂီၤကွံၥ် ဝဲသုးမီၤစိရိၤအသုးကလၢၤ ခဲလၢၥ်အိၣ်လံဝဲ (၇) ဖျၢၣ်လံန့ၣ်လီၤ.