ချၢၣ်လွံၢ်ထူၣ်ကီၢ်ရ့ၣ် ဟီၣ်ကဝီၤပူၤ တသီအကတီၢ်ပူၤ သုးမီၤစိရိၤအသုး ကဘီယူၤဟဲခးလီၤတၢ် (၁၄) ဘျီလၢ ကမျၢၢ်ဖိအဒူသဝီပူၤ ဒီး ကမျၢၢ်ဖိတၢ်ဖံးအီၣ်မၤအီၣ်အလီၢ်အကျဲ

၂၀၂၂ နံၣ် လါနိၣ်ဝ့ဘၢၣ် ၁၉ သီ ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) လၢၢ်ဒိၣ်ကီၢ်ဆၣ် သုးရ့ၣ် (၉), ဆီထံးကီၢ်ဆၣ် သုးရ့ၣ် (၇) ဟီၣ်ကဝီၤပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၇), သုးရ့ၣ် (၉), ဂၢၤသးသုးရ့ၣ် (၃) ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် တၢ်တီခိၣ်ရိၣ်မဲဖီလၥ် (Federal Wings Drone) သ့ၣ်တဖၣ် ပၥ်ဖှိၣ်ထီၣ်လိၥ်အသး ဒီး ထီၣ်ဒုးဖျိးမၤဟးဂီၤကွံၥ်ဝဲ သုးမီၤစိရိၤအသုးကလၢၤ (၃) ဖျၢၣ် ဝံၤအလီၢ်ခံ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ ဖဲဂီၤခီ (၇း၄၀) အဆၢကတီၢ် သုးမီၤစိရိၤအသုးသ့ၣ်တဖၣ် သူဝဲကဘီယူၤဒုးသုး ဒီး ဟဲခးလီၤတၢ်လၢ ဘီကထၣ်သဝီပူၤ (၂) ဘျီ ဖဲ (၉း၃၀) ဆၢကတီၢ် ဟဲခးလီၤကဒီးဝဲလၢ ကီၢ်သၣ်စ့သဝီပူၤ (၃) ဘျီ ဒီးဖဲ (၁၂း၃၀) ဆၢကတီၢ် ဟဲခးလီၤကဒီးဝဲလၢ ပဒဲကီသဝီပူၤ (၁) ဘျီန့ၣ်လီၤ. ဆီထံးကီၢ်ဆၣ် ဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် သူဝဲကဘီယူၤဒုးသုး ဒီး ဟဲခးလီၤတၢ်လၢ သၣ်ဆ့း ဒီး ကၠီးတါ ဟီၣ်ကဝီၤ ကမျၢၢ်ဖိအဒူသဝီ, ကမျၢၢ်ဖိတၢ်ဖံးအီၣ်မၤအီၣ်လီၢ်ကျဲ အပူၤခဲလၢၥ် (၈) ဘျီန့ၣ်လီၤ.
သုးမီၤစိရိၤအသုးတဖၣ် ဟဲခးလီၤကျိဖးဒိၣ်လၢ ကဘီယူၤ လၢကမျၢၢ်ဖိ အဒူသဝီပူၤ, ကမျၢၢ်ဖိ အတၢ်ဖံးအီၣ်မၤအီၣ် အလီၢ်အကျဲအဃိ ဖဲ ၂၀၂၂ နံၣ် လါနိၣ်ဝ့ဘၢၣ် (၁၂) သီအနံၤ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ သဝီ (၁၃) ဖျၢၣ် ကမျၢၢ်ဖိဟံၣ်ဒူၣ် (၁၈၅၇) ဒူၣ်, ကမျၢၢ်ဖိနီၣ်ဂံၢ် (၈၃၁၅) ဂၤ ဘၣ်ဃ့ၢ်အိၣ်ခူသူၣ်ဝဲလၢ တၢ်ပူၤဖျဲးအလီၢ် ဒီး ဆီထံးကီၢ်ဆၣ် ဟီၣ်ကဝီၤပူၤ သဝီ (၁၂)ဖျၢၣ်, ကမျၢၢ်ဖိဟံၣ်ဒူၣ် (၁၆၄၉) ဒူၣ်, ကမျၢၢ်ဖိနီၣ်ဂံၢ် (၁၅၃၅၆) ဂၤ ဘၣ်ဃ့ၢ်အိၣ်ခူသူၣ်ဝဲလၢ တၢ်ပူၤဖျဲးအလီၢ်န့ၣ်လီၤ. သုးမီၤစိရိၤအသုး ဟဲခးလီၤတၢ်လၢ ကဘီယူၤဘျီဝဲအံၤ ဘၣ်ဟးဂီၤဝဲ ကမျၢၢ်ဖိအဟံၣ် (၃) ဖျၢၣ်, သီခါဖၠၣ် တမၣ်ယိၣ် (၁) ဖျၢၣ်, ကမျၢၢ်တၢ်ဆါဟံၣ် (၁) ဖျၢၣ် ဒီး ကမျၢၢ်ဖိအရီဘၢၣ်ကျီး အူအီၣ်ကွံၥ်ဝဲ အ့ကၢၣ် (၁၀) ဃၣ်ဃၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဟံးဆူၣ်စ့ၢ်ကီးဝဲ အီပလါသဝီဖိတဂၤ အသိလ့ၣ်တခိၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဒွဲၣ်အူကွံၥ်စ့ၢ်ကီးဝဲ တရ့စံၣ်လီၤ သဝီဖိ အစံၥ်ဒဲ (၁) ဖျၢၣ်န့ၣ်လီၤ.
သုးမီၤစိရိၤအသုးသ့ၣ်တဖၣ် ဟူဂဲၤဒံးဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ တပယူၥ်ဃီ ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ ဒီး သုးမီၤစိရိၤအသုးတဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဒံးဝဲ အဖၢမုၢ် ဒီး သုးမီၤစိရိၤအသုး ကဘီယူၤဟဲဆှၣ်တၢ် ကိးနံၤဒဲးအဃိ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်တဖၣ် ဟဲက့ၤအိးဆိးလၢ အဒူသဝီပူၤ တသ့ဒံးဘၣ် ဒီး ဘၣ်အိၣ်ခူသူၣ်ဒံးဝဲ အဖၢမုၢ်အဃိ အဝဲသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်အီၣ်တၢ်အီ တၢ်ဂ့ၢ်ကီသ့ၣ်တဖၣ် န့ၣ်လီၤ. တကီၢ်ခါတၢ်အိၣ်သးခဲအံၤ ချၢၣ်လွံၢ်ထူၣ်ကီၢ်ရ့ၣ် ဟီၣ်ကဝီၤပူၤ ကမျၢၢ်ဖိတဖၣ်, ကမျၢၢ်ဖိသ့ၣ်တဖၣ် ဘၣ်အိၣ်မူလၢ တၢ်ပျံၤတၢ်ဖုး တၢ်ဘၣ်ယိၣ်အပူၤန့ၣ်လီၤ.