၂၀၂၃ နံၣ်, လါဖ့ၤဘြူၤအါရံၤ တလါအကတီၢ်ပူၤ တၢ်ဒုးကစီၣ်ပၥ်ဖှိၣ်

၂၀၂၃ နံၣ်, လါမးရှး (၁၁) သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ ၂၀၂၃ နံၣ် လါဖ့ၤဘြူၤအါရံၤ တလါအကတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢအသုးသ့ၣ်တဖၣ် အဘၢၣ်စၢၤ တၢ်ဒုးကဲထီၣ်ဝဲ ခဲလၢၥ် (၄၁၈) ဘျီ ဒီး သုးမီၤစိရိၤအသုး သံဝဲ (၃၈၆) ဂၤဒီး ဘၣ်ဒိဝဲ (၂၆၇) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ တခီ လုၢ်ထီၣ်အသးသမူလၢ ထံကီၢ်ဒီးပှၤကလုၥ်ဂီၢ် (၂) ဂၤဒီး ဘၣ်ဒိဝဲ (၂၇) ဂၤန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်, မုၢ်တြီၢ်ကီၢ်ရ့ၣ်, ဒူပျၥ်ယၥ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် သူဝဲကဘီယူၤ ဒီး ဟဲခးလီၤတၢ်လၢ ကမျၢၢ်ဖိအဒူသဝီ, ကမျၢၢ်ဖိတၢ်ဖံးအီၣ်မၤအီၣ်အလီၢ်အကျဲ ခဲလၢၥ်အိၣ်ဝဲ (၂၁) ဘျီန့ၣ်လီၤ. လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢ အသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိတၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၇၆) ဘျီ ဒီး ခးလီၤဝဲကျိဖးဒိၣ် အဖျၢၣ်အါန့ၢ် (၃၅၁) ဖျၢၣ်န့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ အသုးသ့ၣ်တဖၣ် ခးလီၤကျိဖးဒိၣ်အဃိမ့ၢ်ဂ့ၤ ဟဲခးတၢ်လၢကဘီယူၤအဃိမ့ၢ်ဂ့ၤ ဘၣ်ဟးဂီၤကွံၥ်ဝဲ ကမျၢၢ်ဖိအဟံၣ် ခဲလၢၥ် (၄၄) ဖျၢၣ် ဒီး ဘၣ်ဟးဂီၤကွံၥ်ဝဲ တီၤဒိၣ်တုၥ်ကၠိ (၁) ဖျၢၣ်, သီခါဖၠၣ် (၂) ဖျၢၣ်, ခရံၥ်ဖိတၢ်ဘါယွၤသရိၥ် (၂) ဖျၢၣ်, တၢ်ဆါဟံၣ် (၂) ဖျၢၣ် ဒီး ပှၤအါဂၤအတၢ်သူၣ်ထီၣ် ခဲလၢၥ် (၂၅) ဖျၢၣ်န့ၣ်လီၤ.
သုးမီၤစိရိၤအသုးသ့ၣ်တဖၣ် ဒွဲၣ်အူကွံၥ်ဝဲ ကမျၢၢ်ဖိအဟံၣ် ခဲလၢၥ် (၂၁) ဖျၢၣ် ဒီး ဖီၣ်ကမျၢၢ်ဖိလၢ အတၢ်ကမၣ်တအိၣ်ဘၣ် ခဲလၢၥ် (၇) ဂၤ ဒီး (၆) ဂၤအကျါ ဆှိးတရါဝဲ ဒီး ဒုးလီၤဝဲလၢ ဃိၣ်ပူၤ (၆) လါန့ၣ်လီၤ. သုးမီၤစိရိၤအသုးသ့ၣ်တဖၣ် သုးခိးကီၢ်ဆၢ အသုးသ့ၣ်တဖၣ် အတၢ်မၤထီဒါ ဟီၣ်ခိၣ်ဖိခွဲးယၥ် ဒ်အမ့ၢ် ဟဲခးလီၤတၢ်လၢ ကဘီယူၤ, ခးလီၤကျိဖးဒိၣ်လၢ ကမျၢၢ်ဖိအဒူသဝီ, ကမျၢၢ်ဖိတၢ်ဖံးအီၣ်မၤအီၣ် အလီၢ်အကျဲအဃိမ့ၢ်ဂ့ၤ, ခးကမျၢၢ်လၢကျိမ့ၢ်ဂ့ၤ, ဟးဒိးလီၤမ့ၣ်ပိၢ်လၢ ကမျၢၢ်ဖိတၢ်လဲၤတၢ်က့ၤကျဲမ့ၢ်ဂ့ၤ အဃိကမျၢၢ်ဖိသံဝဲ (၁၁) ဂၤ ဒီး ဘၣ်ဒိဝဲ (၄၁) ဂၤအကျါ ပၣ်ဃုၥ်ဒီး သီခါ (၃) ပါ, တပွဲဖိ (၂) ပါန့ၣ်လီၤ.